დუგოპოლიეში "ჰრვატსკი ვიტეზოვის" სტადიონი მე-5 წუთზე დადუმდა, როდესაც საქართველოს ახალგაზრდული ნაკრების ფეხბურთელმა ხორვატთა კარი დალაშქრა. მასპინძლები თავს იმშვიდებდნენ, ანგარიშის გათანაბრებისა და გამარჯვების ურყევი რწმენა ჰქონდათ, მაგრამ თორნიკე თარხნიშვილის გატანილი გოლი ერთადერთი გამოდგა და ქართველმა ახალგაზრდებმა ბალკანეთი თავაწეულებმა დატოვეს.ქუთაისის "ტორპედოს" 20 წლის ნახევარმცველს, რომელმაც თამაში შეუცვლელად ჩაატარა, ამ სენსაციურ შეხვედრაზე ველაპარაკეთ.
- მატჩი ვერ ვნახეთ და, ცხადია, ყველაფერი გვაინტერესებს. უპირველესად, გაიხსენე, როგორ გაიტანე.
- მარცხენა ფლანგზე ბურთი ნიკა ჯიშკარიანმა მიიღო და შეტევა ცენტრისკენ გააგრძელა, ვაკო ყაზაიშვილმა გაატარა და ლევან მჭედლიძეს
სხვათა შორის, ხორვატიაში ბიჭებს ვეუბნებოდი, გული მიგრძნობს, გავიტან-მეთქი და ასეც მოხდა. რატომღაც დარწმუნებული ვიყავი.
- ისიც იცოდი, შენი გოლი გადამწყვეტი რომ იქნებოდა?
- ამდენი საიდან მეცოდინებოდა. სერიოზულად თუ ვიტყვით, მეხუთე წუთზე ნამდვილად ვერ წარმოვიდგენდი, ჩემი გოლი გადამწყვეტი თუ იქნებოდა. 85 წუთი დიდი დროა, მაგრამ ხორვატებმა ვერაფერი მოგვიხერხეს.
ჩვენ კიდევ რამდენჯერმე შეგვეძლო გატანა. ორჯერ ახლოს იყო მიზანთან მჭედლიძე, მაგრამ ჯერ მცველები ჩაუწვნენ და დარტყმის საშუალება არ მისცეს, მერე კი მეკარემ აუღებელი აუღო. მომენტები სხვებსაც ჰქონდათ. ორჯერ მსაჯმა მასპინძლები დაინდო და პენალტი არ დაგვინიშნა. პირველად კუთხურიდან მოწოდებული ბურთს აფაქიძე კარში თავით აგზავნიდა, მაგრამ ხორვატმა მცველმა ხელით ითამაშა. მეორედაც დაახლოებით ასეთ ვითარებაში გადიოდა გოლი - მსაჯმა ამაზეც დახუჭა თვალები.
- ანუ ყრუ დაცვაში არ ჩამსხდარხართ.
- არა, რა დაცვაში, მოსაგებად ჩავედით და საკმაოდ მწვავედ ვუტევდით. გამარჯვება რეალური რომ იყო, ორთაბრძოლებში გამოჩნდა.
- რას გულისხმობთ?
- ხომ ამბობდნენ, რომ ხორვატები ძალიან ტექნიკურები და ფიზიკურად ძლიერები არიან, მაგრამ ორთაბრძოლების უმრავლესობა მოვუგეთ. ეს პატარა ამბავი არ იყო, ამან გამარჯვების რწმენა შეგვმატა. ეტყობა, ჩვენ მეტი მონდომებითა და ჟინით ვითამაშეთ და შეხვედრაც ლოგიკური შედეგით დასრულდა.
- მატჩისას კოკისპირული წვიმა წამოვიდა, ეს კი უფრო შემტევს აზარალებს. ამჯერადაც ასე მოხდა?
- ვერ ვიტყვი, რადგან წვიმა სწრაფ კონტრშეტევებში ჩვენც არანაკლებ გვიშლიდა ხელს. უკვე ვთქვი, რომ დაცვაში არც ჩავმსხდარვართ, რადგან ასეთ შემთხვევაში ხორვატები მოგვაწვებოდნენ და შეტევებისთვის ვეღარ მოვიცლიდით.
საერთოდ, ჩვენი გუნდი შეკრული და ერთსულოვანია, მოტივაცია ყველას ეტყობა. რა თქმა უნდა, ყველას თავის წარმოჩენა და ჩვენი ხალხის გახარება გვსურდა. ასეთი სულისკვეთება რომ გვქონდა, მწვრთნელების დამსახურებაა, ფეხბურთელებთან ადამიანურად დალაპარაკება და ჩვენი მოტივირება მოახერხეს.
- შეუთამაშებელი ფეხბურთელებით სტუმრად, თანაც ხორვატებთან მოგება წარმოუდგენელი ჩანდა.
- მესმის, რომ ყველას ასე ეგონა.
- ალბათ, ფეხბურთელებსაც.
- ვერ დაგეთანხმებით, მოგება წარმოუდგენლად ნამდვილად არ გვეჩვენებოდა. სხვაგვარად რა აზრი ჰქონდა გამგზავრებას და ათდღიან შეკრებას? თუ არ იბრძოლე, ვერც მოიგებ.
- წარმატებული სტარტი სხვა მეტოქეებთან უფრო თამამად განგაწყობთ.
- რა თქმა უნდა, ძალიან კარგმა დასაწყისმა გაგვამხნევა. სექტემბერში ესპანეთი ჩამოდის და კარგად უნდა მოვემზადოთ. ასეთი მატჩების ღირსეულად ჩატარება ჩვენთვისაც ბევრს ნიშნავს და ქვეყნისთვისაც. ვიმეორებ, თუ ვიომებთ, შანსი ყველაზე ძლიერ მეტოქესთანაც გვექნება. წინასწარ ვიცით, რომ ესპანეთი მსოფლიო ფეხურთის გრანდია, მაგრამ არანაკლები წარმოდგენა გვქონდა ხორვატიაზეც. ასე რომ, წარმოდგენები არაფერს ნიშნავს, მთავარია, მოედანზე რა განწყობით და მომზადებით გადიხარ.
