ვალერი ყაზაიშვილმა ჰოლანდიაში სამუშაო ვიზა მიიღო და ერედივიზიონშიც ითამაშებს. ასეა ზოგადად არაევროკავშირელი მოთამაშის საქმე - ვისთანაც უნდა, კონტრაქტს კი გააფორმებს, მაგრამ სამუშაო ვიზის გარეშე არათუ გუნდში ვერ ითამაშებს, ვერც ივარჯიშებს და, ცხადია, განაცხადშიც ვერ მოხვდება."საბურთალოსა" და საქართველოს ახალგაზრდული ნაკრების შემტევმა ნახევარმცველმა არნემის "ვიტესთან" 3,5 წლიანი კონტრაქტი აგვისტოს დასაწყისში გააფორმა, მაგრამ მას შემდეგ სამუშაო ვიზას ელოდა.
ყაზაიშვილი ახლა თბილისშია და საქართველო-ესპანეთის ახალგაზრდულ ნაკრებთა მატჩის მოლოდინშია...
- ჯერ სიახლით დავიწყოთ, ჰოლანდიაში თამაშის უფლება მიგიღია.
- თამაშის უფლებას "ვიტესთან" კონტრაქტის გაფორმების, ანუ
- საქართველოს ჩემპიონატში რიგიანად არც გითამაშია და უცებ ჰოლანდიის უმაღლესი ლიგის კლუბში აღმოჩნდი. ეს არა მხოლოდ შენი ტოლებისთვის, ეროვნული ნაკრების ბევრი წევრისთვისაც კი სანატრელი ლიგაა.
- ჰოლანდიის უმაღლესი ლიგის კლუბში მოხვედრა მართლაც დიდ ტრამპლინზე შედგომის ტოლფასია, თანაც, როგორც თქვით, ეს იმ დროს, როდესაც საქართველოს ჩემპიონატში, ფაქტობრივად, არც მითამაშია - სულ რაღაც 10 თამაში ჩავატარე. ამიტომაც მიხარია ამ დონის ლიგის კლუბის წევრობა - ეს წინსვლის დიდი შანსია.
- სამუშაო ვიზა თუ არ გქონდა, "ვიტესში" როგორ ვარჯიშობდი?
- სულ ოთხჯერ ვივარჯიშე და მერე მე და ჭანტურია ახალგაზრდულ ნაკრებს მოლდოვაში გავყევით. როდესაც ჰოლანდიაში უნდა დავბრუნებულიყავი, აღმოჩნდა, რომ ერთჯერადი ვიზა მქონია და ქვეყანაში მეორედ შესვლის უფლება არ მქონდა. ამიტომაც ნაკრების წევრებთან ერთად საქართველოში ჩამოსვლა და ვიზის ლოდინი დამჭირდა
- ჰოლანდიური ვარჯიშები ხომ არ გეუცხოვა?
- აქაურს ნაჩვევისთვის საოცრად მაღალი ტემპია - საქართველოში მსგავსი სისწრაფეები არც ვარჯიშებზეა და არც თამაშებზე. განსხვავებულია წვრთნისადმი დამოკიდებულებაც - ყველაფერი სათამაშო ვითარებასთან არის მიახლოებული, ისევე ხისტად გეთამაშებიან, როგორც მეტოქეები.
- ჩვენებურებს ასეთ ხისტ ფეხბურთთან შეჩვევა უჭირთ.
- არაფერია, შევეჩვევი, ბოლო დროს ფიზიკურად საკმაოდ მოვღონიერდი და ასეთი ფეხბურთი აღარ მაშინებს.
- ეს მართლაც თვალშისაცემია - გაცილებით ათლეტური გახდი.
- ეს საქართველოში ვარჯიშის შედეგია, ივანე ლუცენკო კარგად მავარჯიშებდა, საფეხბურთო საკითხებში კი თემურ ფოცხვერიამ და გიორგი დევდარიანმა მომამზადეს სათანადოდ. ასე რომ, იმედი მაქვს, ჰოლანდიაში არ დავიჩაგრები.
- "ვიტესის" ქართველებზეც გვითხარი.
- გიორგი ჭანტურია და გურამ კაშია მშვენიერ ფორმაში არიან და "ვიტესშიც" აფასებენ. საერთოდ, გუნდიც მომეწონა, მეგობრული ვითარებაა.
- ძირითადში დამკვიდრების იმედი თუ გაქვს?
- ცხადია, მაქვს და ისე ვივარჯიშებ, ძირითადში თამაში რომ დავიმსახურო.
- მოლდოვიდან ჩამოსვლის შემდეგ სად ვარჯიშობ?
- ფორმიდან რომ არ ამოვვარდნილიყავი, დევდარიანმა თბილისის "დინამოს" დუბლებში ვარჯიშის საშუალება მომცა.
- ესპანეთთან წყვილი სანაკრებო მატჩი გელით. შენი აზრით, მოლდოვასთან სპარინგი წაგადგათ?
- რა თქმა უნდა, რადგან საკმაოდ ძლიერ ნაკრებს შევხვდით. რომ არა მსაჯის არაობიექტურობა, უნდა მოგვეგო კიდეც. რაც მან ჩაიდინა, ამაზე ბევრი ითქვა და დაიწერა, თუმცა, ვიმეორებ, თამაში მაინც სასარგებლო იყო.
- ახლა ყველა ესპანეთთან ქუთაისური მატჩის მოლოდინში ვართ.
- ყველამ კარგად იცის, რა თამაში იქნება, მაგრამ მე რატომღაც იმედიანად ვარ განწყობილი და მიმაჩნია, რომ სამი ქულის მოპოვებაც შეგვიძლია. მაგრამ საამისოდ სავსე ტრიბუნები გვჭირდება და იმედია, ასეც იქნება - ქუთაისელებს ხომ ფეხბურთი განსაკუთრებულად უყვართ და გულშემატკივრობაც იციან.
- ესპანეთთან გამარჯვება კი არა, ბევრისთვის ქულაც სანატრელია.
- გასაგებია, ესპანეთი მსოფლიოს ჩემპიონია და ასაკობრივი ნაკრებებიც ძლიერი ჰყავს, მაგრამ ჩვენ განსაკუთრებული სტიმული გვაქვს. ხორვატიაში ჩვენს გამარჯვებას ვერავინ წარმოიდგენდა, მაგრამ ხომ მოხდა ასე და ამ წარმატების შემდეგ ბიჭები იმედიანად ვართ, უფრო თავდაჯერებულნიც გავხდით. უეჭველია, ძალიან მძიმე შეხვედრა გველის, მაგრამ ვფიქრობ, მინიმუმ არ წავაგებთ.
ყოველდღიური სპორტული გაზეთი "ლელო"
წარმატებებს ვუსურვებ ყაზაიშვილს!