გიორგი ჭანტურია უკვე ჰოლანდიის ერედივიზიონის "ვიტესის" ძირითადი შემადგენლობის სრულუფლებიანი წევრია, ამჟამად კი აქ არის და საქართველო- ესპანეთის ახალგაზრდულ ნაკრებთა დღევანდელი მატჩისთვის იმედიანად ემზადება. - როგორც იქნა, "ვიტესში" თამაშობ და გოლიც გაიტანე. ერთწლიანი უთამაშებლობის პერიოდში რა იყო შენთვის ყველაზე ძნელი?
- ლოდინი. ველოდებოდი, როდის გავხდებოდი 18 წლის და მომცემდნენ თამაშის უფლებას. გუნდთან ერთად კი ვვარჯიშობდი, მაგრამ შაბათ-კვირას მხოლოდ ტრიბუნაზე ვიჯექი და გუნდს ვერ ვეხმარებოდი. საბედნიეროდ, ეს ყველაფერი დასრულდა და, რაც მთავარია, ჰოლანდიური კარიერა კარგად დავიწყე.
- შენი ასაკის ფეხბურთელებს მცირე წარმატებაც
- კარგად მესმის ბატონი ოთარის, მსგავსი რამ მართლაც ბევრჯერ მომხდარა, მაგრამ მე გაჩერება კი არა, წინსვლა და წარმატებების მიღწევა მინდა. ეს პლაკატი ჩემთვის სტიმული იყო და მეტი არაფერი. აბა, ახლა რა ტიტულები მაქვს, ან თავში რა უნდა ამივარდეს, როდესაც ჰოლანდიაში ჯერ მხოლოდ ერთი გოლი გავიტანე...
საერთოდ, მე მცირედი არ მაკმაყოფილებს, მინდა, ვიყო ინიციატივიანი, ყველა თამაშისას კონცენტრირებული, რათა პირველივე სეზონში გამოვიჩინო თავი. ეს არის ჩემთვის სტიმული, რომლის გამოც ვარჯიშებსა და თამაშებზე ორმაგად მონდომებული ვარ.
- ახლა "ვიტესში" შენი მეგობარი ვაკო ყაზაიშვილიც ჩარიცხეს და პასის მიმცემიც გეყოლება.
- ყაზაიშვილი უსიტყვოდ მიგებს და მისი გადმოსვლა ძალიან მახარებს. ჩემი თქმა საჭიროც არ არის, ყველამ იცის, რომ ის გამორჩეული ნიჭის მოთამაშეა და მიმაჩნია, რომ "ვიტესს" გამოადგება. ფიზიკურადაც ძლიერია და პასიც მშვენივრად ეხერხება. ერთად ბევრ კარგს შევძლებთ, იმედია, უპირველესად, საქართველოს ნაკრებისთვის.
საერთოდ კი, კარგ გუნდში ვარ, სადაც ყველა პოზიციაზე მაღალი კლასის მოთამაშეები არიან. თუმცა ჯერ ახალგაზრდული გუნდია, მისი შენება ახლა დაიწყო, გაზრდა, გამოცდილება გვჭირდება, პირველივე სეზონში დიდი მიზნებისთვის ვერ ვიბრძოლებთ.
- წლევანდელ სეზონში რას უმიზნებთ?
- ევროპის ლიგაზე მოხვედრას.
- "ბარსელონას" მესამე გუნდიდან ჰოლანდიის უმაღლეს დივიზიონში აღმოჩნდი. ყმაწვილებიდან უფროსებში გადართვა არ გაგიჭირდა?
- ადაპტაციის პრობლემა არასოდეს მქონია. პირიქით, ამ დროს განსაკუთრებულად მობილიზებული და მონდომებული ვხდები.
- ახალგაზრდულ ნაკრებში მომხდარი უსიამოვნებაც წარსულს ჩაბარდა...
- ამის გახსენება და დეტალებზე ლაპარაკი აღარც მსურს. ცხოვრებაში ყველაფერი ხდება, მთავარია, გაბელიამ ყველაფერი დაივიწყა, გაუგებრობა დასრულდა და ნაკრებში კვლავ გამომიძახა. მწვრთნელსა და მოთამაშეს შორის რომ უნდა იყოს, ახლა ასეთი ურთიერთობა გვაქვს.
- ესპანეთის ნაკრებიდან რომელიმე მოთამაშეს იცნობ?
- ხუთ ფეხბურთელს ვიცნობ, რადგან "ბარსელონაში" ერთად ვთამაშობდით და ვიცი, ვის რა შეუძლია. ეს ცოდნა მათ წინააღმდეგ თამაშში დამეხმარება, მაგრამ თავადაც მიცნობენ და თუ ბატონი ოთარი მათამაშებს, ჩემს წინააღმდეგ ისინიც მომზადებულები გამოვლენ. მეც ძალიან მაინტერესებს, რა შემიძლია - ეს ქუთაისის შეხვედრაში გამოჩნდება.
- მრჩება შთაბეჭდილება, რომ ესპანელთა ძალას სათანადოდ ვერ ვაფასებთ.
- მე ასე ვიტყოდი: ეს არის არა დაუფასებლობა, არამედ ბრძოლის სურვილი. დღეს ფეხბურთი ისე განვითარდა, ბრძოლა ყველასთან შეიძლება. ესპანეთი ჩვენთან ფავორიტია, მაგრამ საქართველოში ვთამაშობთ, ჩვენი მაყურებელი გაგვამხნევებს და მეტი მოგვეთხოვება.
ბიჭები კი მონდომებულები ვართ, რადგან თავის გამოჩენა ყველას გვინდა. თუ მწვრთნელის დავალებებს კარგად შევასრულებთ და ერთსულოვნები ვიქნებით, ალბათ, შედეგს მივაღწევთ. წინასწარ ლაპარაკი წესი არც არის, მხოლოდ ერთს ვიტყვი - მოგებისთვის მაქსიმუმი უნდა გავიღოთ.
ყოველდღიური სპორტული გაზეთი "ლელო"
