ესპანურ ქალაქ ლუგოს "ანხელ კაროს" სტადიონზე საქართველოს ახალგაზრდული ნაკრები ესპანეთთან მეორედაც დამარცხდა - ამჯერად უფრო "ადამიანური" ანგარიშით - 0:2. ხორვატიასთან თუნდაც სტუმრად მოგების შემდეგ ესპანელებთან ორი წაგება მოულოდნელი არც ყოფილა, მაგრამ საერთო პასივი 2:9 ერთობ დამამცირებელი იყო.ცხადია, საინტერესოა, როგორი გამოხმაურება მოჰყვა ესპანეთში ქართველთა თამაშს.
მარკა
ესპანეთის ახალგაზრდულმა ნაკრებმა საქართველოსთან მეორედაც მოიგო და ევროპის ჩემპიონის ტიტულის შენარჩუნებისკენ მორიგი ნაბიჯი გადადგა.
ლუის მილიას გუნდი მთელი მატჩის განმავლობაში დიდ უპირატესობას ფლობდა. ესპანეთი ბევრად უკეთ გამოიყურებოდა, ვიდრე სუსტი საქართველო და საბოლოოდ უპირატესობა შედეგშიც
საქართველო მთელი გუნდით იცავდა თავს. სერხიო კანალესმა რამდენიმე რეალური საგოლე მომენტი ვერ გამოიყენა, მაგრამ საბოლოოდ დაცვაში ჩამსხდარი ქართველების რიგების გარღვევა ისევ მან მოახერხა.
მართალია, ლუის მილიას გუნდმა ოთხი დღის წინადელივით შთამბეჭდავად ვერ გაიმარჯვა, მაგრამ მორიგი 3 ქულით პირველი ადგილი განიმტკიცა.
სერხიო კანალესი: მთავარი 6 ქულა იყო
სერხიო კანალესი: "გარკვეული სირთულეების მიუხედავად, ქართველები ორჯერ დავამარცხეთ, რადგან ესპანელები ერთმანეთს კარგად ვგრძნობთ და ვიცნობთ. დარწმუნებული ვიყავი, ქუთაისის მსგავსი ანგარიშით ვერ გავიმარჯვებდით, რადგან ასეთი დიდი უპირატესობით მოგება მაინც იშვიათია. ჩვენი მთავარი ამოცანა ქართველებთან ორ შეხვედრაში ექვსი ქულის მოპოვება იყო და მიზანს მივაღწიეთ. ახლა კი ხორვატიაშიც უნდა გავიმარჯვოთ".
"გუნდმა უმაღლესი კონცენტრაცია გამოავლინა. ჩვენ ვახერხებდით მეტოქის მოედანზე ბურთის სწრაფ გადატანას. სხვათა შორის, კანალესი, რომელმაც ქართველებს ორი გოლი გაუტანა, თამაშამდე ნორმალურად ვერ სუნთქავდა. ქუთაისში 2:7 წაგების შემდეგ ჩვენმა მეტოქემ სწორი დასკვნები გამოიტანა და ჩვენი შეტევების შესაჩერებლად ნახევარდაცვა და დაცვა გააძლიერა.
თამაშში უპირატესობას მეტწილად ჩვენ ვფლობდით და გამარჯვება საეჭვო არ გაგვიხდია. საწყის ეტაპზე ორი გამარჯვება თავდაჯერებას შეგვმატებს, რაც ძალიან მახარებს - ამ ახალი გუნდის შემადგენლობა ხომ 20-წლამდელებიდან გადმოყვანილებით შევავსეთ. მხოლოდ მუნიაინი და დავიდ დე ხეა არიან ევროპის ჩემპიონები და მათ შეუძლიათ, ახალგაზრდებზე დადებითი ზემოქმედება მოახდინონ.
მიხარია, რომ ასეთი ფეხბურთელები გვყავს. მათ ბავშვობიდან კარგად წვრთნიან, ანათლებენ და ნაკრებში მიწვეულებმა უკვე იციან, გუნდს რა სჭირდება", - ეს უკვე ესპანეთის ნაკრების მთავარი მწვრთნელის, ლუის მილიას სიტყვებია.
ყოველდღიური სპორტული გაზეთი "ლელო"
