შეგახსენებთ, მას სანაკრებო დებიუტი აგვისტოში, პალანგის საერთაშორისო ტურნირზე ჰქონდა, სადაც საუკეთესო ნახევარმცველის პრიზი დაიმსახურა. საქართველოს 17-წლამდელთა ნაკრების მთავარი მწვრთნელი კობა ჟორჟიკაშვილი მისი საფეხბურთო მონაცემებითაც მოიხიბლა და პიროვნული თვისებებითაც.
ახლა კი, ლუკას ჰუფნაგელთან დაპირებულ ინტერვიუს გთავაზობთ.
- ფეხბურთს 5 წლის ასაკიდან ვთამაშობ, "ბაიერნის" საფეხბურთო აკადემიაში კი 8 წლის ვიყავი, როცა მიმიღეს. მას შემდეგ მუდმივად ამ კლუბის წევრი ვარ და ვცდილობ, წლიდან წლამდე პროგრესს მივაღწიო.
- ორიოდე სიტყვა შენს ოჯახზეც გვითხარი.
- როგორც იცით, მყავს ქართველი დედა. მამაჩემი კრისტიანი კი პოპულარული გერმანული გაზეთის "ზუდდოიჩე ცაიტუნგის" ერთ-ერთი რედაქტორია და ამავდროულად ბავშვთა საფეხვბურთო მწვრთნელია. მყავს ასევე უფროსი ძმა, 18 წლის სანდრო, რომელიც ასევე ფეხბურთელია და ერთ-ერთ მიუნხენურ კლუბში თამაშობს. საქართველოსთან კი მხოლოდ ფეხბურთი არ გვაკავშირებს. აქ ძალიან ბევრჯერ ვარ ნამყოფი.
- როდის და როგორ გადაწყდა თქვენი საქართველოს ნაკრებში თამაშის საკითხი?
- ორი წლის წინ გაზეთ "ლელოში" გამოქვეყნდა სტატია საზღვარგარეთ მოთამაშე ქართველ ფეხბურთელებზე. სტატიაში მეც მიყავი მოხსენიებული. ამით საქართველოს ფეხბურთის ფედერაცია დაინტერესდა და ჩემს მშობლებს დაუკავშირდა. ბევრი აღარ გვიფიქრია და ყველამ ერთად გადავწყვიტეთ, რომ საქართველოს ნაკრებში უნდა მეთამაშა.
- ეს გადაწყვეტილება ყველას გვახარებს, მაგრამ წარმოუდგენელია, "ბაიერნის" ფეხბურთელს გერმანიის ნაკრებში თამაშზე არ ეფიქრა.
- ასეც იყო, მაგრამ არჩევანი მაინც საქართველოს სასარგებლოდ გავაკეთე. მე ხომ ნახევრად ქართველი ვარ, - რატომ უნდა მეთქვა ასეთ საპატიო შემოთავაზებაზე უარი?!
- გერმანიის რომელიმე ასაკობრივი ნაკრების კანდიდატი არ ყოფილხარ?
- საქმე ისაა, რომ მძიმე ტრავმის გამო ცხრა თვე გამიცდა და მოედანს არც თუ დიდი ხნის წინ დავუბრუნდი. ასე რომ, ნაკრებების მწვრთნელთა ყურადღების ცენტრში ობიექტური მიზეზების გამო ვერ მოვხვდებოდი.
- რა იცი ქართულ ფეხბურთზე?
- სიმართლე გითხრათ, ბოლო დრომდე ბევრი არაფერი ვიცოდი. თუმცა, როგორც კი გაირკვა, რომ საქართველოს 17-წლამდელთა ნაკრებში ვითამაშებდი, მაშინვე მოვიპოვე ინფორმაცია ქართული ფეხბურთის წარსულსა და დღევანდელობაზე. ბოლო პერიოდში საქართველოს ეროვნული ნაკრების უკლებლივ ყველა მატჩი მაქვს ნანახი.
- როგორ მიგიღეს ქართველმა თანაგუნდელებმა?
- ძალიან კარგად მიმიღეს ფეხბურთელებმაც, მწვრთნელებმაც და ნაკრების მთელმა პერსონალმაც. მათ ყველაფერი გააკეთეს იმისთვის, რომ ჩემთვის უცხო გარემოსთან გაშინაურება არ გამჭირვებოდა. შესანიშნავი ბიჭები არიან და ყველას უცებ დავუმეგობრდი. თითოეულ მათგანს იდეალურად ვუგებ როგორც მოედანზე, ასევე მის მიღმა. ბევრი მქონდა გაგონილი გერმანულ და ქართულ მენტალიტეტებს შორის სხვაობაზე. სხვაობა მართლად თვალშისაცემია, მაგრამ ჩემთვის მიუღებელი ჯერ არაფერი მინახავს. პირიქით, აღფრთოვანებული ვარ ქართველების გულთბილობით და ამ საოცარ თვისებას მათი ვერც ერთი ნაკლი ვერ გადაფარავს. ასეთები არიან საქართველოს ნაკრების წევრებიც. არადა, დარწმუნებული ვარ, გერმანიის ნაკრებში ძალიან ცივად მიმიღებდნენ, თუნდაც იმიტომ, რომ კონკურენტის გამოჩენა იქ არავის ახარებს.
- საკუთარ სათამაშო სტილზე რას გვეტყოდი?
- როგორც იცით, ვარ ცენტრალური ნახევარმცველი, ვასრულებ როგორც დაცვით, ასევე შეტევით ფუნქციებს. ვფიქრობ, ეს ორივე ნორმალურად გამომდის, დანარჩენი კი ორშაბათიდან ქართველმა გულშემატკივრებმა უნდა შეაფასონ. შეტევების წამოწყება მაინც ყველაზე მეტად მსიამოვნებს, თუმცა ყოველთვის იმ საქმეს გავაკეთებ, რომელიც გუნდს კონკრეტულ შემთხვევაში დასჭირდება.
- როგორ შეხვდნენ "ბაიერნში" შენს გადაწყვეტილებას?
- წინააღმდეგობა არავის გაუწევია, პირიქით, ჩემი ნაბიჯი მოიწონეს და წარმატებები მისურვეს.
- ვინ არის შენი მწვრთნელი "ბაიერნში"?
- ფრანც ბეკენბაუერის ვაჟი შტეფან ბეკენბაუერი.
- "ბაიერნს" მხოლოდ კარგ ფეხბურთელად ჩამოყალიბების საშუალებად განიხილავ თუ გინდა, შენი პროფესიული კარიერაც მას დაუკავშირო?
- ბავშვობიდანვე "ბაიერნის" გულშემატკივარი ვარ და ბედნიერი ვიქნები, დიდ ფეხბურთს სწორედ მის შემადგენლობაში ვითამაშებ.
- რომელი ფეხბურთელების სათამაშო მანერა მოგწონს?
- ჩემი იდეალი ყოველთვის ზიდანი იყო. ასევე მომწონდა ბარსელონასდროინდელი რონალდინიო. ახლა კი ყველაზე მეტად კრისტიანო რონალდოს ვაფასებ, მაგრამ ეს მხოლოდ მის ფეხბურთს ეხება, თორემ ცხოვრებაში ასეთი ტიპები გულზე არასოდეს მეხატებოდნენ. გერმანელებიდან ჩემს პოზიციაზე შვაინშტაიგერი მიმაჩნია ყველაზე ძლიერად.
- და რომელ ფეხბურთელს გინდა რომ ჰგავდე?
- სხვას არავის, მხოლოდ ლუკას ჰუფნაგელს.
ყოველდღიური სპორტული გაზეთი
"ლელო"
