"არანაირი 50/50, ეს თამაში უნდა მოვიგოთ!" - თამაშის წინა დღეს საქართველოს ახალგაზრდული ნაკრებისგან ასეთი რამეც მოვისმინეთ.ეს ფეხბურთია და ყველაფერი ხდება; ისეთებიც მომხდარა, საქართველოს ნაკრებზე ძლიერ გუნდსაც წაუგია დიდი ანგარიშით. ისიც გახსოვთ, ალბათ, ვლადიმერ გუცაევის გაწვრთნილმა საქართველოს ახალგაზრდულმა ნაკრებმა იტალიასთან სტუმრად 0:6 რომ წააგო, მაგრამ იმავე შესარჩევში შინ 2:0 დაამარცხა ახალგაზრდული "სკუადრა აძურა".
0:6-ის მერე ძალიან ადვილია კრიტიკა, ოღონდაც, უკვე ისე შევეჩვიეთ საერთაშორისო სარბიელზე ქართული გუნდების მარცხს, საკრიტიკოდ ფანტაზიის მოკრება არ არის იოლი საქმე.
ჰოლანდიელ ახალგაზრდებს სულ სხვა სკოლა აქვთ
იხილეთ ვიდეო
ამ ყველაფერში სხვაობა დიდია ჩვენსა და ჰოლანდიას შორის, თუმცა მხოლოდ ამით არ შეიძლება მარცხის და, მით უმეტეს, ასეთი მარცხის გამართლება.
ჰოლანდიელი ახალგაზრდები თითქოს სკოლაში ნასწავლ გაკვეთილს ჰყვებოდნენ ვაკეში. არც ერთი ზედმეტი მოძრაობა, სწორი თამაში, პრესინგი, ბურთის ამოტანა, მოედნის ბურთიან მონაკვეთში რიცხობრივი უპირატესობის შექმნა - საქართველოს ნაკრები ჰოლანდიას ამაში ვერ აჯობებდა, თუმცა ჩვენ სულ სხვა კოზირი უნდა გვქონოდა - ინდივიდუალური ოსტატობა, ფანტაზიის უნარი... ანუ ის თამაში, რაც ქართველებს სისხლში გვაქვს. გიორგი ჭანტურია, ვაკო ყაზაიშვილი, ჯანო ანანიძე - ეს ყველაფერი ამათ უნდა ეტვირთათ, თანაგუნდელებიც უნდა აეყოლიებინათ და იქნებ რეტიც დაგვესხა ჰოლანდიისთვის - 10 ოქტომბერს გამართული თამაშის შემხედვარე, ამ ყველაფრის წაკითხვა ძალიან ადვილი გამოდგა.
ჰოლანდიელთაგან ცენტრფორვარდი ლუკ კასტაინიოსი გამოირჩა. ის "ტვენტეს" ფეხბურთელია. ეს გუნდი ამ დროისთვის ერედივიზიონის ლიდერია, კასტაინიოსმა კი მიმდინარე სეზონში 4 გოლი გაიტანა. გახსნა, აგრესიული თამაში, ბურთის მიღება, სწორი გადაწყვეტილების უნარი - კასტაინიოსი უკვე შემდგარი ფეხბურთელია და მისი ამოკეტვა ჩვენებს ძალიან გაუჭირდათ.
პირველ წუთებზე მას ორი საგოლე შანსი ჰქონდა - ჯერ გიორგი ნადირაძის ხელებს შეაწყვიტა ბურთი, მერე კი მასთან პირისპირ გავიდა და ქართველ მეკარეს ვერ აჯობა.
ჩვენმა ახალგაზრდებმა ჰოლანდიელთა ორ ჩხვლეტას ყაზაიშვილის მიერ წამოწყებული იერიშით და ანანიძის არაზუსტი დარტყმით უპასუხეს - ამ ეპიზოდიდან გოლის გამოდნობა შეიძლებოდა.
კასტაინიოსმა კი მესამე ჯერზე უკვე პირწმინდად მოარღვია ჩვენი ახალგაზრდების დაცვა - ჯერ ნიკა კვეკვესკირს აჯობა, მერე არჩილ ტვილდიანს და ჟან-პოლ ბუტიუსს ისე დაუგორა ბურთი, რომ ამ უკანასკნელმა ახლოდან გადაგზავნა კარში.
გოლმა მასპინძლები ვერ გატეხა. მარჯვენა გარემარბი ჭანტურია აქტიურობდა და რამდენჯერმე გვარიანად აანერვიულა კიდეც ჰოლანდიური დაცვა. ერთხელ დავით სხირტლაძემ და ანანიძემაც მოახერხეს კარგი იერიშის განხორციელება. სხირტლაძე რთული მდგომარეობიდან ურტყამდა და სტუმართა მეკარემ ფეხით მოიგერია ბურთი.
ამის შემდეგ ჭანტურიამ ერთხელაც გაიბრწყინა ინდივიდუალური თამაშით, მას ანანიძეც მიეხმარა, ჭანტურიამ მეკარეს ხვეული დარტყმით გადაავლო ბურთი, რომელიც ხარიხამ აისხლიტა. ჭანტურიამ ამის შემდეგ კიდევ გაახერხა რეიდი, ფლანგიდან შუისკენ შეიწია და ოციოდე მეტრიდან ააცილა კარს.
ერთი სიტყვით, იყო იმის იმედიც და შანსიც, რომ ჩვენი ახალგაზრდები ანგარიშს გაათანაბრებდნენ, თუმცა ტაიმის მიწურულს აქეთ გაუშვეს ბურთი - დავით უბილავამ ცუდად დაუგორა ბურთი მეკარეს, ნადირაძემაც კარიდან გამოსვლა დაახანა, ბურთი კასტაინიოსმა ჩაჭრა და - 0:2.
ჩვენი განაპირა მცველები შეტევაში, ფაქტობრივად, ვერ ერთვებოდნენ და დაცვით ფაზაშიც ვერ გამოირჩეოდნენ - ამანაც მნიშვნელოვნად განაპირობა თამაშის პერიპეტიები.
შესვენების შემდეგ საქართველოს 21-წლამდელთა ნაკრები ისევ მონდომებული ჩანდა, თუმცა ისევ კურიოზული გოლი გაუშვა - კასტაინიოსმა ისეთი წერტილიდან დაარტყა, საიდანაც ფლანგურ ჩაწოდებას აკეთებენ. ბურთი უცნაური ტრაექტორიით გაფრინდა და კარში ჩაეშვა - რა თქმა უნდა, ნადირაძე ვალდებული იყო, ასეთი დარტყმა მოეგერიებინა.
სამბურთიანი ჩამორჩენა, ისიც ჰოლანდიასთან - თამაშის შემოტრიალება უკვე შეუძლებელი იყო, თუმცა ჩვენები არ ცხრებოდნენ. ისეთი იერიშიც მიიტანეს მეტოქეზე, რომ რამდენიმე წამის განმავლობაში ორი საგოლე მომენტი შექმნეს - უორნერ ჰანმა ჯერ ყაზაიშვილის დარტყმა მოიგერია, მერე ლაშა პარუნაშვილს არ დაანება კარი.
ყველაფერი მაშინ დამთავრდა, როცა კვეკვესკირი ბოლო იმედის ჯარიმისთვის გააძევეს. ჰოლანდიამ გაილაღა, საქართველოს ახალგაზრდული ნაკრები კი ძალიან უსუსური იყო.
მატჩის შემდეგ
ალბერტ სტაიფენბერგი (ჰოლანდიის ნაკრების მთავარი მწვრთნელი):
"პირველი ტაიმი რთული გამოდგა. მეორე ტაიმში ველოდით, რომ ქართველები ისევ მონდომებით ითამაშებდნენ. როცა მეტოქეს ფეხბურთელი გაუძევეს, უფრო მეტი გოლის საშუალება მოგვეცა.
საქართველოს ახალგაზრდულ ნაკრებს კარგი ფეხბურთელები ჰყავს, ორი მათგანი ჰოლანდიაში თამაშობს და დღევანდელი ანგარიში არ ასახავს ძალთა რეალურ თანაფარდობას".
ალექსანდრე ჩივაძე (საქართველოს ნაკრების მთავარი მწვრთნელი):
"ალბათ, ხვდებით, რა მდგომარეობაშიც ვარ. შოტლანდიასთან მატჩის შემდეგ შევხვდეთ და ყველაფერზე ვილაპარაკოთ".
ყოველდღიური სპორტული გაზეთი "ლელო"
რას იტყვით ხოლმე...