საქართველოს 17-წლამდელთა ნაკრები სლოვაკებთან ისპარინგებს, 19-წლამდელთა - იტალიასთან

ფოტოზე: საქართველოს 17-წლამდელთა ნაკრები

საქართველოს ფეხბურთის ფედერაციის სპორტულმა დირექტორმა არჩილ არველაძემ ერთი მეტად მნიშვნელოვანი ინფორმაცია მოგვაწოდა: საქართველოს 17-წლამდელთა ნაკრები, ევროპის ჩემპიონატის ელიტრაუნდისთვის რომ ემზადება, 24 და 26 თებერვალს თბილისში ორ ამხანაგურ მატჩს გამართავს სლოვაკ თანატოლებთან.

ცხადია, გოჩა ტყებუჩავას გუნდისთვის, რომელმაც ახლახან მინსკის საერთაშორისო ტურნირში მიიღო მონაწილეობა და V ადგილი დაიკავა, ეს მატჩები მისწრება იქნება. ქართველ 17-წლამდელებს ჰოლანდიურ ელიტრაუნდამდე თბილისში რუმინეთთან უნდა ესპარინგათ, თუმცა კარპატელებმა შემოთვალეს - ამ ეტაპზე სათბილისო ფული არ გვაქვს და ვერ გეწვევითო.

სლოვაკეთი რუმინეთს თუ არ სჯობს, არც არაფრით ჩამოუვარდება. ამის შემდეგ ტყებუჩავას გაწვრთნილი ნაკრები გერმანიაში გადაინაცვლებს, სადაც იქაურ კლუბებთან მოსინჯავს ძალებს, მერე კი ელიტრაუნდის ჯერიც მოვა, სადაც ჩვენი მეტოქეები ჰოლანდია, ბელგია და ჩრდილოეთი ირლანდია იქნებიან.

და ერთიც: როგორც შევიტყვეთ, საქართველოს ფეხბურთის ფედერაციამ ქვეყნის 19-წლამდელთა ნაკრებს იტალიასთან საგარეო ამხანაგური მატჩი გაუხერხა. შეგახსენებთ, რომ თბილისურ ელიტრაუნდში გიორგი დევდარიანის გუნდს მეტოქეებად ესპანეთი, პორტუგალია და თურქეთი ეყოლება.

(იბეჭდება მცირე ცვლილებით)
ყოველდღიური სპორტული გაზეთი "ლელო"