უპირატესობა თავიდანვე ფოთელებმა იგდეს ხელთ, პირველი ტაიმი 2:0 მოიგეს და შესვენების შემდეგაც არ დამცხრალან - ანგარიში 4:0-ამდე გაზარდეს. მატჩის დასკვნითი ნაწილი კი 17-წლამდელთა კარნახით წარიმართა და კობა ჟორჟიკაშვილის ფეხბურთელებმა ორი ბურთის გაქვითვაც შეძლეს. "კოლხეთის" შემადგენლობიდან დუბლი გულუამ შეასრულა, თითო ბურთი კი წიქარიშვილისა და ცხვიტარიას ანგარიშზეა. ნაკრების შემადგენლობიდან თავი გოგიჩაიშვილმა გამოიჩინა, რომელმაც "კოლხეთს" ორი ჯარიმა გაუტანა.
კოლხეთი: ძაგანია
შეცვლაზე შევიდნენ: ლობჟანიძე, ქორჩილავა, გელაჭეიშვილი, ფურთუხია, ნაჭყებია.
საქართველოს 17-წლამდელთა ნაკრები: მიქავა - მთივლიშვილი, ღაღანიძე, ჭიღვარია, მონიავა - მარკოზაშვილი (ექვთიმიშვილი), ენდელაძე (ღირდალაძე), გოგიჩაიშვილი, სამუშია - დიასამიძე - ფანცულაია (კაჭარავა).
შედეგის მიუხედავად, ჟორჟიკაშვილი საკუთარი გუნდის თამაშით კმაყოფილი დარჩა. "ასაკში სხვაობა მაინც საგრძნობი ფაქტორია და უმაღლესი ლიგის ბინადართან წაგება გასაკვირი ნამდვილად არ არის. შედეგს ჩვენთვის არ ჰქონდა გადამწყვეტი მნიშვნელობა, მაგრამ მაინც შეგვეძლო, მარცხი თავიდან აგვეცილებინა. მეორე ტაიმში არაერთი საგოლე მომენტი გავაფუჭეთ, რაც გამოუცდელობის ბრალია. გუნდის კონდიციებით კი კმაყოფილი ვარ. მიხარია, რომ ბიჭები დაკისრებულ ამოცანას კარგად ართმევენ თავს, ნაკრები სწრაფ და კომბინაციურ ფეხბურთს თამაშობს", - ამბობს ჩვენი ნაკრების თავკაცი.
აქვე იმასაც გეტყვით, რომ 17-წლამდელებს უძლიერესი შემადგენლობით არ უთამაშიათ. უკვე გამცნეთ, რომ ბაჩანა არაბული და ლუკას ჰუფნაგელი გუნდს ურეკში არ გაჰყოლიან, ზღვისპირეთში ჩასულ ფეხბურთელთაგან კი "კოლხეთის" წინააღმდეგ სანდოხაძეს, ცნობილაძესა და ძირითად მეკარე თებიძეს სხვადასხვა უმნიშვნელო პრობლემის გამო არ უთამაშიათ, მაგრამ საგანგაშო არაფერია, მწყობრში სამივე მალე ჩადგება. ფოთელებთან სპარინგის პირველივე ტაიმში დაშავდა და შესაცვლელი შეიქნა მარკოზაშვილი, მაგრამ მასაც უკვე ყველაფერი რიგზე აქვს.
დღეს ჟორჟიკაშვილის გუნდი ბოლნისის "სიონთან" მოსინჯავს ძალებს და ნაკრების სამწვრთნელო შტაბი იმ ფეხბურთელებსაც მისცემს თავის გამოჩენის შანსს, ვისაც წინა სპარინგებში ვერ დააკვირდა.
.
