ბათუმის "დინამო": მწვრთნელობის მეხუთე კანდიდატი ალექსანდრ შტელინია

ლევან ხომერიკი ბათუმის "დინამოს" მთავარი მწვრთნელის პოსტიდან ურთიერთშეთანხმების საფუძველზე გადადგა. ამ გადაწყვეტილებიდან სამი დღე გავიდა, მაგრამ ჯერაც უცნობია, ვინ დაიკავებს ვაკანტურ თანამდებობას.

"ლელო" წერდა, რომ ბათუმელებს რამდენიმე კანდიდატურა შესთავაზეს - გორის "დილას" ყოფილი მწვრთნელი უჩა სოსიაშვილი, თბილისის "დინამოს" ექსთავკაცი მალხაზ ჟვანია, ისრაელისა და საქართველოს კლუბებში ნამუშევარი გიორგი დარასელია და ოდესის "ჩერნომორეცის" დუბლების, ყაზახეთის 17-წლამდელთა ნაკრებისა და ქობულეთის "შუქურას" ყოფილი მწვრთნელი კონსტანტინ ფროლოვი.

ბოლო ინფორმაციით, ბათუმელები ალექსანდრ შტელინის კანდიდატურასაც განიხილავენ.

ის ქუთაისის "ტორპედოს" ყოფილი დამრიგებელია, ბოლო ერთი წელი კი ლიეჟის "სტანდარდის" დუბლშემადგენლობას ავარჯიშებდა. მაგრამ ამას წინათ "ლელოსთან" ინტერვიუში უკრაინელმა სპეციალისტმა არ დამალა, რომ ბელგიაში წარმატებული მუშაობის მიუხედავად, გაუთვალისწინებელ პრობლემებს წააწყდა - მორალურ კმაყოფილებას ვეღარ ვიღებ და 8 მაისს, სეზონის ბოლო ტურის შემდეგ კონტრაქტი რომ დამიმთავრდება, "სტანდარდს" დავტოვებო...

- შტელინის აზრი ჩაკვეტაძესა და ქართველებზე: ნატურალური ხორცი და მწვანილი

მაგრამ ერთია სხვების შეთავაზება და მეორე, რა სურთ თავად კლუბის თავკაცებს. ეს 21 მაისს "ჩიხურასთან" დაგეგმილი მატჩშის შემდეგ გაირკვევა. საჩხერელებთან კი გუნდს მოედანზე ბათუმელთა ვეტერანი ამირან მუჯირი გაიყვანს.

შეგახსენებთ, რომ 12 ტურის შემდეგ ამდენივე ქულით "დინამო" 10-გუნდიან ლიგაში მე-8 ადგილზეა.

(იბეჭდება მცირე ცვლილებით)
ყოველდღიური სპორტული გაზეთი "ლელო"