თბილისის "დინამოს" ახალი მთავარი მწვრთნელი, ესპანელი სპეციალისტი ალექს გარსია გუშინდელი დღიდან უკვე "ნაღდი" დინამოელია: 13 საათზე ფეხბურთელებს შეხვდა, 17 საათზე კი თავის ახალ გუნდთან პირველი ვარჯიშიც ჩაატარა. ალექს გარსიას ვარჯიშზე თანაშემწეებიც ეხმარებოდნენ: მარკ უგეტი (ფიზმომზადების მწვრთნელი), რამაზ მუმლაძე (მეორე მწვრთნელი) და გელა ჭანტურია (მეკარეების მწვრთნელი).
სამწვრთნელო თემას გავაგრძელებთ და ბარემ იმასაც ვიტყვით, რომ, ფაქტობრივად, გადაწყვეტილია "დინამოს" დუბლშემადგენლობის ახალი თავკაცის საკითხიც: ამ თანამდებობაზე, სავარაუდოდ, გიორგი დევდარიანი დაინიშნება. ბოლო წლებში დევდარიანი საქართველოს სხვადასხვა ასაკობრივ ნაკრებებს ხელმძღვანელობდა, უმაღლეს ლიგაში კი ერთობ სიმპათიური და
დევდარიანის გარდა "დინამოში" სხვა სიახლეებიცაა; ეგ კი არა, ლამის დღე არ გავა, ჩვენი ქვეყნის ყველაზე ტიტულიან გუნდში მომხდარი საკადრო ცვლილებების შესახებ არ შევიტყოთ. "ლელოს" გუშინდელ ნომერშიც გაუწყეთ, რომ 26 წლის სანდრო იაშვილის გარდა, "დინამოში" კიდევ ორი ახალწვეულიც ჩაირიცხა: 30 წლის დავით ოდიკაძე (ბაქოს "ინტერიდან") და 23 წლის გიორგი რეხვიაშვილი (რუსთავის "ოლიმპიდან"). ოდიკაძეს საქართველოს ჩემპიონატში რამდენიმე გუნდში უასპარეზია, მაგრამ ყველაზე უკეთ საკუთარი შესაძლებლობები თბილისის "დინამოში" წარმოაჩინა, სადაც 2009 წლამდე ასპარეზობდა.
თუმცა, ოდიკაძის გარდა, "დინამოში" კიდევ ერთი ცნობადი სახე დაბრუნდა: 35 წლის სოსო გრიშიკაშვილი სამწლიანი პაუზის შემდეგ კვლავაც დინამოელთა წევრი იქნება. სხვადასხვა დროს გრიშიკაშვილს არაერთი ქართული ("კახეთი", "მეტალურგი", "კოლხეთი", "ლოკომოტივი", "თბილისი", "ბათუმი") თუ უცხოური ("ალანია", "ვენტსპილსი", "დაუგავა", "მიკა") კლუბების ღირსება დაუცავს, ბოლოს კი ცხინვალის "სპარტაკში" ასპარეზობდა.
ვეტერანი მეკარის გარდა "დინამოში" გუშინ კიდევ ერთი ახალწვეული გამოჩნდა: 27 წლის გოგა ბერაია; ეს უკანასკნელი ამპლუით ნახევარმცველია და ბოლო დროს აზერბაიჯანის ჩემპიონატში ასპარეზობდა, - კერძოდ, "გაბალას" კაპიტანიც გახლდათ. სხვათა შორის, "გაბალას" მთავარი მწვრთნელი ინგლისის ნაკრების ყოფილი კაპიტანი ტონი ადამსია...
სლოვენიაში გამგზავრებამდე (12 ივნისს), "დინამოს" ახალი თავკაცი ალექს გარსია თავის ახალ გუნდთან ერთად ყოველდღიურ ვარჯიშებს ჩაატარებს. აქვე, იმასაც ვიტყვით, რომ თბილისში ხვალ უნდა ჩამოვიდეს კიდევ ერთი ესპანელი სპეციალისტი - ანდრეს კარასკო "დინამოს" ბავშვთა აკადემიის ხელმძღვანელი იქნება.
