ქართული გუნდებიდან უცხოურ შეკრებაზე ყველაზე ადრე რუსთავის "მეტალურგი" გაემგზავრა, გუშინდელი დღიდან კი ახალი სეზონისთვის მზადების გადამწყვეტ ეტაპს თბილისის "დინამო" შეუდგა. შეგახსენებთ, რომ ჩვენი ქვეყნის ყველაზე ტიტულიანმა გუნდმა ახალი მწვრთნელის, ესპანელი სპეციალისტის, ალექს გარსიას ხელმძღვანელობით ვარჯიში 7 ივნისს დაიწყო. გარსიას საწვრთნელ პროცესში თანამემამულე მარკ უგეტი (ფიზმომზადების მწვრთნელი) და დუბლშემადგენლობიდან ძირითადი გუნდის მეორე მწვრთნელად დაწინაურებული რამაზ მუმლაძე ეხმარებოდნენ.
ვიდრე უცხოურ შეკრებაზე გაემგზავრებოდა, "დინამოს" ირგვლივ უამრავი სატრანსფერო ჭორ-მართალი ვრცელდებოდა: ხან რომელ ფეხბურთელს უკავშირებდნენ ამ გუნდში ჩარიცხვას, ხან - რომელს და აი, ყველაფერს თუ
ახლა კი, "დინამოს" სლოვენიურ შემადგენლობას გავეცნოთ, ხოლო ახალწვეულებსა თუ გუნდიდან წასულ ფეხბურთელებზე ქვემოთ ვისაუბროთ.
მეკარეები: გიორგი ლორია, სოსო გრიშიკაშვილი, გიორგი ნადირაძე;
მცველები: ლევან ხმალაძე, შოთა კაშია, გულვერდ თომაშვილი, ლევან კაკუბავა, ირჟი ჰომოლა, გიორგი რეხვიაშვილი;
ნახევარმცველები: ალექსანდრე კოშკაძე, გიორგი კახელიშვილი, დავით ოდიკაძე, ლადო ახალაია, სამირ ჰაჯიბულიჩი, გიორგი თექთურმანიძე, ნიკა ფირცხალავა, ნიკა კვეკვესკირი, რობერტინიო, ირაკლი ლეკვთაძე, ჯამბულ ჯიღაური, გოგა ბერაია;
თავდამსხმელები: ვახტანგ ფანცხავა, დონალდ ჯუისი, სანდრო იაშვილი.
როგორც ზემოთ უკვე აღვნიშნეთ, სლოვენიურ შეკრებაზე "დინამოს" შემადგენლობაში 6 ახალწვეულია, თუმცა, 35 წლის სოსო გრიშიკაშვილს, 30 წლის დავით ოდიკაძეს, 28 წლის ლადო ახალაიასა და 26 წლის სანდრო იაშვილს სხვადასხვა დროს წარმატებით უასპარეზიათ ჩვენი ქვეყნის ყველაზე ტიტულიანი გუნდის რიგებში. ანუ, ამ დროისთვის "დინამოს" მხოლოდ ორი დებიუტანტი ჰყავს: საქართველოს ეროვნული ნაკრების კანდიდატი, 23 წლის ცენტრალური მცველი გიორგი რეხვიაშვილი (რუსთავის "ოლიმპიდან") და 27 წლის ნახევარმცველი გოგა ბერაია, რომელიც ბოლო დროს აზერბაიჯანულ "გაბალაში" თამაშობდა და ამ გუნდის კაპიტანიც გახლდათ.
ისე, ამა წლის ზამთრის სატრანსფერო პერიოდსა და ახლანდელ სიტუაციას თუ შევადარებთ, აღმოჩნდება, რომ "დინამოში" სერიოზული ცვლილებებია მომხდარი; თანაც, ყველაზე საინტერესო (უფრო ზუსტად, დამაფიქრებელი) ის არის, რომ ზამთრის სატრანსფერო პერიოდში "დინამოში" ჩარიცხული 12 ახალწვეულიდან შვიდს გუნდის დატოვება მოუხდა! აი, ისინიც, ვინც "დინამოს" მხოლოდ ოთხი-ხუთი თვის განმავლობაში ეხმარებოდა: მეკარე - თორნიკე ზარქუა, მცველები - მარკო მაროვიჩი, თეიმურაზ ღონღაძე, გიორგი ციმაკურიძე, ნახევარმცველი - ზურაბ არზიანი, თავდამსხმელები - დიმიტრი ტატანაშვილი, პეტარ ელიჩი; ამათ გარდა, გუნდიდან წავიდნენ გამოცდილი ნახევარმცველებიც - გივი კვარაცხელია და ედნილსონი.
ანუ, "დინამო" დღესდღეობით ცხრა ფეხბურთელმა დატოვა და ამათგან, რამდენიმეს წასვლა, ცოტა არ იყოს, მოულოდნელად გვეჩვენა; უპირველესად, 32 წლის გივი კვარაცხელიასა და 23 წლის ზურაბ არზიანს ვგულისხმობთ: ორივე მათგანი, ფაქტობრივად, ძირითადი შემადგენლობის ფეხბურთელი იყო მეორე ეტაპზე და სხვებზე სუსტად გამოიყურებოდნენო, ცოტა არ იყოს, ძნელი სათქმელია.
ასევე მოულოდნელი იყო 27 წლის დიმიტრი ტატანაშვილის წასვლაც - გივი კვარაცხელიასი არ იყოს, წინა სეზონის მიწურულს ამ ფორვარდის გადამწყვეტი გოლებითაც "დინამომ" რამდენიმე გამარჯვება მოიპოვა. აი, დანარჩენებს კი (განსაკუთრებით - ლეგიონერებს) ძირითადში ადგილის დამკვიდრებაც გაუჭირდათ და "დინამოში" თავი ვერაფრით გამოიჩინეს.
სლოვენიაში "დინამოს" სამი სპარინგ-მატჩი აქვს დაგეგმილი: ავსტრიის მეორე ლიგის ერთ-ერთ გუნდთან, ხორვატიის თასის ფინალისტ "ვარტექსთან" და სლოვენიის ჩემპიონ "მარიბორთან". შეკრების ბოლო ორ დღეს კი "დინამო" ავსტრიაში გაატარებს და თუ რაიმე არ შეიცვალა, ავსტრიის ჩემპიონს, "შტურმს" გაეჯიბრება სპარინგ-მატჩში. "დინამოს" სლოვენიური შეკრების სხვა დეტალებზე კი უფრო დაწვრილებით "ლელოს" უახლოეს ნომრებში ვისაუბროთ...
