სპარტაკი-გურია 2:2 - თოვლივით გამდნარი უპირატესობა

12.03. თბილისი. ბენდელა. 500 მაყურებელი
სპარტაკი-გურია 2:2
1:0 დ. ლომაია (7. მაისურაძის პასით), 2:0 გაბაშვილი (27. მელქაძის პასით), 2:1 კვერენჩხილაძე (46), 2:2 გ. თოდუა (52. მოსიაშვილის პასით)

სპარტაკი გურია
4-4-2 4-4-2
ნადირაძე ბუბუტეიშვილი
ჭაფოძე ჩენსუ
ტეტუნაშვილი ზ. ჩხეტიანი
ლომაია ბაქრაძე
ნ. მაისურაძე ჯანგიძე
შარაშენიძე სამსეიშვილი
ჩივაძე მაისაშვილი
თ. შონია მოსიაშვილი
ჩაფიძე ტ. კუკულაძე
გაბაშვილი კვერენჩხილაძე
ლ. მელქაძე გ. თოდუა

მწვრთნელი მწვრთნელი
ვ. ხაჩიძე გ. იმნაძე

სპარტაკი
20. შონია - გიორგი გურეშიძე
74. გაბაშვილი - სამხარაძე
76. გურეშიძე - მაჭავარიანი
სათადარიგოები: ბერია, თუხარელი, მ. ჯიშკარიანი, დ. გელაშვილი

გურია
76. მოსიაშვილი - კილაძე
82. ტ. კუკულაძე - ჩარგეიშვილი
89. გ. თოდუა - რ. კუკულაძე
სათადარიგოები: გოგუაძე, ლაღაძე, შეწირული

გაფრთხილება: ჩაფიძე (33), სამსეიშვილი (65)

არბიტრი: ჯ. ხორავა

ეს მატჩი თუნდაც ერთი საათით გვიან რომ დაწყებულიყო, მისი ჩატარება კითხვის ნიშნის ქვეშ დადგებოდა. "ბენდელას" ხელოვნურსაფარიანი მოედანი პირველივე ტაიმში გადათეთრდა, მატჩის მეორე ნახევარი კი გუნდებმა ფერადი ბურთით ჩაატარეს. აუცილებელი გახდა პირითი, გვერდითი და საჯარიმოს ხაზების გადათოვლაც.

ვერ ვიტყვით, რომ თოვლმა შეხვედრის შედეგზე გავლენა მოახდინა, მაგრამ დაგვეთანხმებით, უამინდობის გამო ჩაშლილ-შეფერხებული ამდენი მატჩი უკვე ძალიან გამაღიზიანებელია.

ლანჩხუთიდან ჩამოსული ქომაგები ტრიბუნაზე აბსოლუტურ უმრავლესობაში იყვნენ და "გურიას" ენერგიულად ქომაგობდნენ, რამაც მატჩს გარკვეული ელფერი შესძინა.

შეხვედრის საწყის ნაწილში კი ამ ხალხისთვის სასიამოვნო არაფერი მომხდარა - 27-ე წუთისთვის მასპინძლები ორბურთიანი უპირატესობით იყვნენ წინ და თითქოს გამარჯვება ხელიდან არ უნდა გაეშვათ, მაგრამ სტუმართა სასახელოდ უნდა ითქვას, ხასიათის სიმტკიცე გამოიჩინეს და არასანახაობრივ, მაგრამ არცთუ უხარისხო მატჩში "სპარტაკს" ქულა გამოჰგლიჯეს ხელიდან.

ვლადიმერ ხაჩიძის გუნდი სწრაფი გოლით დაწინაურდა - ნიკოლოზ მაისურაძის გადაცემით საშუალო დისტანციიდან თავი დავით ლომაიამ გამოიჩინა. მალე "გურიამაც" გამოიღო ხელი და გია თოდუასა და ლაშა ჯანგიძეს ანგარიშის გათანაბრებამდე მცირედი დააკლდათ.

მე-20 წუთზე "სპარტაკის" ლიდერი თემურ შონია დაშავდა და შესაცვლელი შეიქნა, თუმცა ცოტა ხანში ლევან მელქაძემ მეკარესთან პირისპირ კონსტანტინე გაბაშვილი გაიყვანა და მასპინძლებმა ანგარიშის სხვაობა გაზარდეს.

გიგლა იმნაძის გუნდი მთელი მატჩის განმავლობაში თამამად უტევდა, შესვენებამდე კი თავის გამოჩენა ჯანგიძეს კიდევ ერთხელ მართებდა - მისი თავური მეკარე გიორგი ნადირაძემ ეფექტური ნახტომით მოიგერია. "სპარტაკის" შემადგენლობიდან კი კარგი შანსი გაუშვა ხელიდან მელქაძემ.

მეორე ტაიმში სანახაობა ნაკლები იყო, თუმცა ინტრიგა თამაშის განახლებიდან რამდენიმე წამში გაცოცხლდა - გიგა კვერენჩხილაძის გოლით ლანჩხუთელებს თამაშის გადარჩენის შანსი გაუჩნდათ. ექვსიოდე წუთში თანაფარდობაც აღდგა - თორნიკე მოსიაშვილის ჩაწოდებულ კუთხურს თავი თოდუამ შეაგება.

თითქოს მთავარი ამბები ამის შემდეგ უნდა დაწყებულიყო, მაგრამ შეხვედრის დასკვნითი ნაწილი მოსაწყენი გამოდგა. "გურია" წინ ისე აქტიურად აღარ მიდიოდა და ნათელი იყო, რომ სტუმრები ფრეზე ყაბულს იყვნენ, მატჩის მიწურულს კი ლაშა ჩაფიძემ ახლო მანძილიდან დაუჯერებელი ბურთი ააცილა და მსაჯის საფინალო სასტვენიც მალე გაისმა.

ყოველდღიური სპორტული გაზეთი "ლელო"