თუკი ამ ტურამდე "ზესტაფონის" ჩემპიონობაში ბევრი დარწმუნებული იყო, მოქმედი ჩემპიონების მიერ ზუგდიდში დაკარგულმა ქულებმა და რუსთავის "მეტალურგის" გამარჯვებამ ოქროს მედლებისთვის ბრძოლა დაძაბა. მართალია, "ზესტაფონი" კვლავ რჩება უმაღლესი ლიგის უმთავრეს ფავორიტად, მაგრამ დღეისთვის ფეროელთა უპირატესობა არც ისე შთამბეჭდავია. ჩემპიონატის დასრულებამდე ცხრა ტურია დარჩენილი და სულაც ვერ ვიტყვით, რომ რუსთაველებს ოთხქულიანი ჩამორჩენის აღმოფხვრის შანსი არ აქვთ.
სხვა საქმეა, რომ "მეტალურგს" საჩემპიონო პერსპექტივა მხოლოდ და მხოლოდ ჩემპიონატის უცნაური სისტემის წყალობით დარჩა - სანამ ზედა რვა გუნდს აუტსაიდერებთან მოპოვებული ქულები ჩამოაკლდებოდა, "ზესტაფონი" "მეტალურგს" უზარმაზარი
თუმცა "მეტალურგის" წარმატებას ამით სულაც არ ვაკნინებთ. კობა ჟორჟიკაშვილის გუნდმა ხომ ქულების სტაბილურად დაგროვება ყველაზე საჭირო მომენტში დაიწყო და რუსთაველთა კონკურენტებს ისღა დარჩენიათ, დღევანდელ მოცემულობას შეეგუონ - "ზესტაფონს" ამიერიდან წაფორხილების უფლება, ფაქტობრივად, აღარ აქვს; "დინამოსა" და "ტორპედოს" კი, რომლებმაც ქულები მეორე ეტაპზე მრავლად დაკარგეს, ისღა დარჩენიათ, ჩემპიონობა დაივიწყონ და მესამე საპრიზო ადგილისთვის იბრძოლონ.
"ზესტაფონის" უპირატესობის შემცირება სულაც არ ნიშნავს იმას, რომ ზემოიმერლებს კრიზისი დაეწყოთ. ზუგდიდში ვერმოგება ნამდვილად არ არის ტრაგედია - "ბაია" შინ ერთიორად ძლიერია და ესეც რომ არ იყოს, ყველა მატჩში ვერავინ გაიმარჯვებს.
გიორგი ჭიაბრიშვილის გუნდი წელს საერთოდ არ დამარცხებულა და ვერც იმას იტყვის ვინმე, რომ "დინამოსა" და "ტორპედოსთან" ნათამაშები ფრეები ცუდი შედეგია. რაც მთავარია, "ზესტაფონმა" საკუთარ მოედანზე "მეტალურგს" სძლია და უპირველესად, სწორედ ამის ხარჯზე შეინარჩუნა ლიდერობა.
თუმცა, როგორც ჩანს, მთავარი საჩემპიონო ბრძოლები წინაა და თუ რუსთაველებმა წარმატებული სერია გააგრძელეს, მეორე წრეში შინ "ზესტაფონთან" ჩასატარებელ შეხვედრას მათთვისაც და ზესტაფონელთათვისაც გადამწყვეტი მნიშვნელობა ექნება.
მანამდე კი ამ ორ გუნდს შორის საქართველოს თასზე არანაკლებ საინტერესო ორრაუნდიან დაპირისპირებას ვიხილავთ.
ბრინჯაოსაც ოქროს ფასი აქვს
დიდი ალბათობით, ამ სეზონში მესამე და მეოთხე ადგილებს შორის დიდი ზღვარი იქნება - თუ "დილამ" საქართველოს თასი მოიგო ან ფინალში ჩემპიონთან დამარცხდა (ჩემპიონი აუცილებლად მეორე ნახევარფინალური წყვილიდან იქნება), ჩემპიონატის მესამეადგილოსანი ევროპის ლიგაზე ითამაშებს, მეოთხეადგილოსანი კი ამ ზაფხულს საერთაშორისო ასპარეზზე ვერ გავა.
"ტორპედოს" ევროპის ლიგამდე შარშან ერთი ნაბიჯი დააკლდა და, ბუნებრივია, ამბიციური ქუთაისელების გეგმებში სულაც არ შედის ევროტურნირებს მიღმა დარჩენა.
რა თქმა უნდა, ანალოგიურია "დინამოს" ქომაგთა განწყობაც - საქართველოს ყველაზე ტიტულოვან კლუბს არაპრესტიჟულ ინტერტოტოს თასზე კი უთამაშია, მაგრამ ჩვენი ქვეყნის დამოუკიდებელი ჩემპიონატების ისტორიაში ევროთასებზე ერთი სეზონიც კი არ ჩაუგდია და თუ ეს წელს ვერ შეძლო, ავტომატურად გამოვა, რომ "დინამოსთვის" ეს სეზონი დამოუკიდებელი საქართველოს ისტორიაში ყველაზე წარუმატებელი იქნება.
ვიმეორებთ, ქუთაისელთა და თბილისელთა შორის ერთ-ერთს ხელი მხოლოდ იმ შემთხვევაში მოეცარება, თუ საკუთარი მიზანი "დილამ" ვერ შეასრულა; მაგრამ, დაგვეთანხმებით, გორელთა საევროპო შანსები საკმაოდ მაღალია და "ტორპედოსა" და "დინამოს" წევრებს ნამდვილად არ უღირთ "დილას" წარუმატებლობის იმედზე ყოფნა.
ხუთმატჩიან ფრეთა სერიის ავტორის, "დინამოს" კრიზისზე ახალი რა უნდა ვთქვათ - ფაქტია, რომ კლუბში ძალიან ბევრი რამაა მოსაწესრიგებელი და ამის გარეშე "დინამო" არათუ საერთაშორისო, არამედ საშინაო ასპარეზზეც ვერ იქნება კონკურენტუნარიანი. ვნახოთ, რა პერიოდი დასჭირდება კლუბის ხელმძღვანელობასა თუ სამწვრთნელო შტაბს მდგომარეობის გამოსასწორებლად, ვითარება ამჟამინდელ დინებას გაჰყვება თუ კრიზისიდან გამოსასვლელად მკვეთრი ნაბიჯები გადაიდგმება.
იდეალურად საქმე არც "ტორპედოშია", მაგრამ გია გეგუჩაძეს ბრძოლისუნარიანი გუნდის ჩამოყალიბება და ამის პარალელურად, ევროსაგზურისთვის ბრძოლა შედარებით ნაკლებად სტრესულ გარემოში უწევს. ქუთაისელი ქომაგი ძალიან მომთხოვნია, მაგრამ ამჟამინდელ სამწვრთნელო შტაბს ნდობის მანდატი ნამდვილად აქვს.
"ტორპედო" "დინამოს" დაკარგული ქულებით უსწრებს და თუ მარტვილის "მერანთან" გადადებული შეხვედრა მოიგო, მესამე ადგილზე გადაინაცვლებს.
სამი ეფექტური გამარჯვება
"მეტალურგის" გარდა, გასულ ტურში კიდევ სამმა გუნდმა გაიმარჯვა და სამივემ საკმაოდ დამაჯერებლად - "დილამ" ახალი სამწვრთნელო შტაბის ხელმძღვანელობით მეორე მატჩი ჩაატარა და "დინამოსთან" სტუმრად მიღწეულ ფრეს "მერანის" სოლიდურად ძლევა მოაყოლა.
"დილამ" მწვრთნელის გემოვნების შესაფერისი შემტევი ფეხბურთი ითამაშა და ვნახოთ, ამ ფილოსოფიას დადებითი შედეგებიც თუ მოჰყვება. მათე ვაწაძის ჰეთ-თრიქი კი უდავოდ ხაზგასასმელი ფაქტია. ჩვენს ჩემპიონატში ხომ მაღალი დონის თავდამსხმელთა დეფიციტია და, შესაბამისად, ჰეთ-თრიქიც იშვიათი ხილია.
"ჩიხურამ" და "გურიამ" კი უმაღლესი ლიგისკენ მორიგი შთამბეჭდავი ნაბიჯი გადადგეს და კიდევ ერთხელ დაგვიმტკიცეს, რომ ბრძოლისუნარიანი გუნდები პირველ ლიგაშიც არიან. გასულ ორშაბათს თვით უიმედო აუტსაიდერმა "მერცხალმაც" კი იყოჩაღა და პლეი აუტში სადებიუტო ქულა მოიპოვა.
მოკლედ, თუ უმაღლეს ლიგაში კვლავაც 12 გუნდი დატოვეს, ელიტის საგზურებისთვის პლეი აუტში ბოლო ტურებამდე უშეღავათო ბრძოლებია მოსალოდნელი; ხოლო, თუ უმაღლესი ლიგის მონაწილეთა რაოდენობის გაზრდის თაობაზე ხმები გამართლდა, მაშინ პლეი აუტს აზრი საერთოდ დაეკარგება.
გაწითლებული ტური
გასულ ტურში ერთბაშად ოთხი ფეხბურთელი გააძევეს. აქედან ორს ნაადრევად მოედანი "სიონისა" და "სპარტაკის" მატჩში დაატოვებინეს. მიმდინარე ჩემპიონატში ეს ტური ყველაზე უხეში გამოდგა და ამ ფაქტზე ყურადღება იმიტომ გავამახვილეთ. თუმცა სულაც არ ვართ დარწმუნებულნი, რომ გასული ტური გაძევებათა რაოდენობით სარეკორდო ჩემპიონატის ბოლომდე დარჩება.
ტურიდან ტურამდე დაძაბულობა კიდევ უფრო გაიზრდება და შესაძლოა, "სიონი"-"სპარტაკზე" უფრო "წითელი" შეხვედრის მომსწრენიც კი გავხდეთ.
ყოველდღიური სპორტული გაზეთი "ლელო"
თუ შეუძლია ან ჟურნალისტებს ან ფედერაციას აგვიხსნას რა შუაშია ან ერთი ტერმინი ან მეორე?
ლეიბორისტებმა ხომ არ გამეცადინეს ინგლისურში?