ამ მატჩის შედეგს ორივე გუნდისთვის დიდი მნიშვნელობა ჰქონდა. ქუთაისელთა მთავარი კონკურენტი თბილისის "დინამო "კოლხეთთან დამარცხდა და გამარჯვების შემთხვევაში "ტორპედო" ევროპის თასზე გასვლას გაინაღდებდა. "მეტალურგი" კი ჩემპიონობისთვის იბრძვის და ერთპიროვნული ლიდერობის შესანარჩუნებლად მასაც გამარჯვება სჭირდებოდა.
პრინციპული მატჩი დაძაბულად და საინტერესოდ წარიმართა, თუმცა სანახაობრივ მხარეზე მეტად ორთაბრძოლები და ხისტი თამაში ჭარბობდა.
შეხვედრა სტუმრებმა უფრო აქტიურად დაიწყეს. რუსთაველები ბევრს მოძრაობდნენ, ერთმანეთს კარგად ეხსნებოდნენ და კომბინაციური თამაშით სწრაფად ცდილობდნენ მეტოქის კართან მიახლოებას. ქუთათურები კი პირიქით, მოედნის ცენტრში აყოვნებდნენ ბურთს და მეტოქის საჯარიმოსთან მიახლოებას უფრო
შეხვედრის დებიუტში სტუმართა გამოკვეთილმა ფორვარდმა ირაკლი სიხარულიძემ საჯარიმოს მისადგომებიდან ორჯერ დაარტყა, თუმცა ომარ მიგინეიშვილი ორივე შემთხვევაში ბურთს იოლად დაეუფლა. პროდუქტიული იყო რუსთაველთა მარცხენაფლანგელი რევაზ გეწაძე, რომლის სოლორეიდები მასპინძლებს დიდ პრობლემებს უქმნიდა.
უნდა გავიხსენოთ რუსთაველთა სწრაფი კონტრშეტევა, როცა გეწაძემ ირაკლი მაისურაძე გაიყვანა მეკარესთან პირისპირ, თუმცა მიგინეიშვილმა კარი დროულად დატოვა და სტუმართა შემტევს გოლის გატანის საშუალება არ მისცა.
ტაიმის შუაწელამდე ბურთი, ძირითადად, მოედნის ცენტრში ტრიალებდა, შემდეგ კი მასპინძლები გააქტიურდნენ და რამდენიმე სახიფათო შეტევის შემდეგ რეალური საგოლე მომენტიც შექმნეს. დოლიძემ დიღმელაშვილთან "კედელი" გაითამაშა და საჯარიმოში მყოფი საბანაძისკენ გამჭოლი გადაცემა გააკეთა. ქუთაისელთა ფორვარდის ახლოდან დარტყმულ ბურთს კარის ხაზთან ახლოს მცველი გადაეღობა, თორემ ძნელი სათქმელია, შეძლებდა თუ არა ბედიაშვილი მის მოგერიებას.
მასპინძლებს ვალში რუსთაველებიც არ დარჩნენ და გეწაძის გამჭოლი გადაცემის შემდეგ სიხარულიძეს დაახლოებით 5 მეტრიდან ვარდნაში უფრო ხეირიანად რომ დაერტყა, ანგარიშიც გაიხსნებოდა.
ტაიმის ბოლოს ვითარება კიდევ ერთხელ დაიძაბა, თუმცა ამის მიზეზი არბიტრის გადაწყვეტილება იყო, რომელმაც რაზმაძეზე ხელით თამაში არ დააფიქსირა და ადგილობრივი გულშემატკივრების წყრომა გამოიწვია.
შესვენებისას ტორპედოელებისთვის "კოლხეთი"-"დინამოს" მატჩის შედეგი ცნობილი გახდა და, როგორც ჩანს, ამან მათზე უარყოფითად იმოქმედა. ალბათ, მასპინძლებმა საქმე მოთავებულად ჩათვალეს და მეორე ნახევარში უფრო ინერტულად გამოიყურებოდნენ. რუსთაველები კი პირიქით, გააქტიურდნენ და რომ არა მეკარე მიგინეიშვილის კარგი თამაში, სანუკვარ სამ ქულასაც მოიპოვებდნენ.
თუმცა, სანამ ქუთაისელთა გოლკიპერი საკუთარ გუნდს რამდენჯერმე იხსნიდა, ერთი უხეში შეცდომა თავადაც მოუვიდა, როცა შეცვლაზე შესულ გიორგი ქავთარაძეს ჩააბარა ბურთი. მანაც უმალ წინ გამოსულ მეკარეს თავზე გადაუგდო, მაგრამ მიგინეიშვილმა შეცდომა გამოასწორა და ცარიელ კარში მიმავალ ბურთს ნახტომში დაეუფლა.
თავის მხრივ, რუსთაველთა მეკარეს, გრიგოლ ბედიაშვილსაც მოუვიდა "მარცხი", როცა მცველისგან დაბრუნებულ ბურთს ფეხი ააცილა. რუსთაველთა ბედად, ბედიაშვილის კარების "ტერიტორიაზე" არავინ იმყოფებოდა, თორემ...
კობა ჟორჟიკაშვილმა თამაშში რუსთაველთა ერთ-ერთი გოლეადორი დიმიტრი ტატანაშვილი ჩართო, რომელსაც შეეძლო ქვემოქართლელებისთვის ესოდენ საჭირო გამარჯვება მოეპოვებინა. მატჩის დასკვნით ნაწილში ტატანაშვილს სამჯერ მიეცა გოლის გატანის შესაძლებლობა. ჯერ იყო და, მის დარტყმას გიორგი გურული და მიგინეიშვილი ერთდროულად გადაეღობნენ. მალე გეწაძის ფლანგური ჩაწოდებისა და ქავთარაძის გამჭოლი გადაცემის შემდეგ ტატანაშვილი ვარდნაში ცდილობდა მასპინძელთა კარის დალაშქვრას, თუმცა მიზნამდე მცირედი დააკლდა.
ამის შემდეგ კიდევ ერთხელ ჰქონდა თავის გამოჩენის შანსი, როცა გამეზარდაშვილის შეცდომით ისარგებლა და მეკარესთან პირისპირ გავიდა, თუმცა ამ ეპიზოდში ისევ მიგინეიშვილმა იმარჯვა და ბურთი კუთხურზე მოიგერია.
ცოტა ხანში ქუთაისელთა მეკარემ რაზმაძის სახიფათო თავურიც მოიგერია და საკუთარი გუნდი კიდევ ერთხელ იხსნა.
შეხვედრის დამატებით წუთებზე უკვე მასპინძლები გააქტიურდნენ (განსაკუთრებით, შეცვლაზე შემოსული გივი იოსელიანი), თუმცა რეალური საგოლე მომენტი ქუთაისელებს არ ჰქონიათ.
მატჩის შემდეგ
კობა ჟორჟიკაშვილი (მეტალურგი): "ზესტაფონთან შინ განცდილი მარცხის შემდეგ მძიმე ფსიქოლოგიურ მდგომარეობაში ვიყავით და ეს შეხვედრა ჩვენთვის ძალზედ მნიშვნელოვანი იყო. ქუთაისში მაყურებელი მე-12 მოთამაშის ფუნქციას ასრულებს და აქ რთულია თამაში. მოგება შეგვეძლო, მაგრამ ბევრი საგოლე მომენტი ვერ გამოვიყენეთ".
გია გეგუჩაძე (ტორპედო): "ძალიან დაძაბული შეხვედრა იყო. საგოლე მომენტები ჩვენც გვქონდა და, ვფიქრობ, რომ ფრე ლოგიკური შედეგია".
ქუთაისი. ცენტრალური. 8000 მაყურებელი.
ტორპედო-მეტალურგი 0:0
ტორპედო მეტალურგი
4-4-2 4-5-1
მიგინეიშვილი ბედიაშვილი
რიგვავა სეთურიძე
ფარულავა კვარაცხელია
გამეზარდაშვილი მახვილაძე
გ. გურული ჯაფარიძე
დოლიძე თექთურმანიძე
დიღმელაშვილი დობროვოლსკი
კუხიანიძე ი. მაისურაძე
გ. დათუნაიშვილი რაზმაძე
საბანაძე გეწაძე
გოცირიძე სიხარულიძე
მწვრთნელი: მწვრთნელი:
გ. გეგუჩაძე კ. ჟორჟიკაშვილი
ტორპედო
60. კუხიანიძე - ვ. ბოლქვაძე
64. გოცირიძე - თარხნიშვილი
75. დოლიძე - იოსელიანი
სათადარიგოები: ქვილითაია, შერგელაშვილი, ფანცულაია, დ. ჯანელიძე
მეტალურგი
46. თექთურმანიძე - ქავთარაძე
67. სიხარულიძე - ტატანაშვილი
90. მაისურაძე - გავაშელიშვილი
სათადარიგოები: თებიძე, მოდებაძე, გ. მიქაბერიძე, ჭედია
გაფრთხილება: რაზმაძე (8), რიგვავა (45), ჯაფარიძე (89)
არბიტრი: გ. ვადაჭკორია
სხვა მატჩები
ზესტაფონი-ბაია 4:1 (იხილეთ ვრცლად)
მერანი-დილა 1:2 (იხილეთ ვრცლად)
კოლხეთი-დინამო 2:1
1:0 ტუღუში (59),1:1 ჩისკო (63), 2:1 ტუღუში (75.პენ)
სატურნირო ცხრილი
შენიშვნა: ცხრილი მომზადებულია www.gff.ge-ს მიხედვით
მომდევნო ტური
16 მაისი, ოთხშაბათი
მერანი-კოლხეთი
დილა-ზესტაფონი
ბაია-ტორპედო
მეტალურგი-დინამო
ყოველდღიური სპორტული გაზეთი "ლელო"
