შეხვედრა მასპინძლების აქტიურობით დაიწყო. პავლიაშვილის დარტყმის შემდეგ მეკარე ზუხბაიას სველი ბურთის დამორჩილება გაუჭირდა. მე-6 წუთზე ჩომახიძის "მოჭრილი" საჯარიმო დარტყმა გარედან მოხვდა ზუგდიდელთა კარის ბადეს. რამდენიმე წუთში თანაგუნდელებს კაკალაძე გაჰყავდათ მეკარესთან პირისპირ, მაგრამ ზუხბაიამ დაასწრო და მდგომარეობა განმუხტა.
სტუმართა პირველივე გააზრებული შეტევაც კინაღამ გოლით დასრულდა - ერთ-ერთ სამტრედიელ მცველს ცუდად აეჭრა ბურთი,
25-ე წუთზე მასპინძლებმა მეტოქეს მწვავე შეტევით უპასუხეს, ქებაძემ პავლიაშვილი გაიყვანა მეკარესთან პირისპირ, მაგრამ ზუხბაიამ კვლავ დროულად დატოვა კარი და სამტრედიელთა შემტევს დარტყმა არ დაანება. შეხვედრა ორმხრივ შეტევებში მიმდინარეობდა და ორიოდე წუთში უკვე ზუგდიდელთა ჯერი დადგა. წურწუმიას გამჭოლი გადაცემა იმერელთა მეკარემ ხელში ვერ შეიმაგრა, მაგრამ დამატებაზე სტუმრებმა ვერ ივარგეს და ბურთს ისევ ძაგანია დაეუფლა.
39-ე წუთზე პავლიაშვილის ფლანგურ ჩაწოდებას ტყემალაძის "მაკრატელა" მოჰყვა, თუმცა ბურთი სამიზნეს ასცდა. საპასუხო შეტევისას, მეგრელაძის პასის შემდეგ, ონიანის სახიფათო დარტყმა ასცდა ხარიხას. 42-ე წუთზე კი სამტრედიელებმა 100%-იანი საგოლე მომენტი ვერ გამოიყენეს - ჩომახიძემ ცენტრიდან ოდნავ ქვევით მიიღო ბურთი და ბრწყინვალე გადაცემით კაკალაძე მეკარესთან პირისპირ დატოვა. ფორვარდი კარიდან დაახლოებით 25 მეტრში იყო, ხელსაც არავინ უშლიდა, მაგრამ კაკალაძემ მომენტი ვერ გამოიყენა და ბურთი კარს ააცილა...
მატჩის სცენარი არც შესვენების შემდეგ შეცვლილა, თუმცა მეორე ტაიმი უფრო სანახაობრივი და, რაც მთავარია, გოლებით დახუნძლული აღმოჩნდა. ანგარიში სტუმრებმა გახსნეს: 57-ე წუთზე წურწუმიას მოწოდებულ კუთხურს ახალაიამ თავური დარტყმა მიაყოლა და ძაგანიას შანსი არ დაუტოვა - 0:1.
ზუგდიდელებს გოლის აღნიშვნა არ ჰქონდათ დასრულებული, რომ ბურთი უკვე მათი კარის ბადეში ფართხალებდა - ჩომახიძემ კუთხური ჩააწოდა და ბაკურაძემ თავური დარტყმით აღადგინა წონასწორობა.
ერთ წუთში გელა სანაიამ კაკალაძის ნაცვლად მოედანზე პაატა ბაკარანძე შეუშვა. მოგვიანებით კი თამაშში დავით კირკიტაძეც ჩართო. ახალგაზრდა მწვრთნელს ცვლილებებმმა გაუმართლა და სწორედ შეცვლაზე შესულმა ფეხბურთელებმა გადაწყვიტეს თამაშის ბედი. ბაკარანძის ანგარიშზე გოლი და საგოლე პასია, ამას გარდა მან პენალტიც (ჭიჭვეიშვილის მიერ ხელით თამაშისთვის რომ დაინიშნა) დაარტყა, მაგრამ ზუხბაიამ აუღო.
თუმცა ბაკარანაძემ შეცდომა ერთ წუთში გამოასწორა - დრიბლინგით რამდენიმე ზუგდიდელს აუარა გვერდი და მეკარესთან პირისპირ გავიდა, თუმცა კარში დარტყმას კირკიტაძისთვის გადაცემის გაკეთება ამჯობინა და არც შემცდარა - სამტრედიელთა 18 წლის ნახევარმცველმა თანაგუნდელს გარჯა გოლით დაუფასა -3:1.
მატჩის შემდეგ
ელგუჯა ქომეთიანი (ბაია): "იმედგაცრუებული ვარ. სამტრედიაში მოსაგებად ჩამოვედით და ქულის აღებაც ვერ მოვახერხეთ. ასეთ შედეგს ნამდვილად არ ველოდი. მეტოქემ საკუთარი თამაში მოგვახვია თავს, რაშიც ჩვენც ავყევით და დავისაჯეთ, თანაც სამტრედიას ჩვენზე მეტად გაუმართლა".
გელა სანაია (სამტრედია): "ყოფითი პრობლემების მიუხედავად ბიჭებმა თავდადებით ითამაშეს და მატჩში ყველაფერი ჩააქსოვეს, რამაც ეს შედეგი განაპირობა. შეცვლებმაც გამიმართლა, ბაკარანძე და კირკიტაძე კარგად ჩაერთვნენ თამაშში... ეს მოგება ჩვენთვის სატურნიროსთან ერთად, ფსიქოლიგიური თვალსაზრისითაც ძალზედ მნიშვნელოვანია".
დავით კოხრეიძე სამტრედიიდან
სამტრედია 3
ბაია 1
03.10. სამტრედია. ე. მანჯგალაძე. 1 500 მაყურებელი
0:1 ახალაია (57. წურწუმიას პასით), 1:1 ბაკურაძე (58. ჩომახიძის პასით), 2:1 ბაკარანძე (64. ჩომახიძის პასით), 3:1 კირკიტაძე (81. ბაკარანძის პასით)
სამტრედია ბაია
4-4-2 4-4-2
ძაგანია ზუხბაია
კუპრეიშვილი კვეკვესკირი
თ. შალიკაშვილი კვესიეშვილი
გოგია ჭიჭვეიშვილი
ბაკურაძე რ. ონიანი
ქებაძე დოლიძე
ტყემალაძე გოგობერიშვილი
ჩომახიძე წურწუმია
პავლიაშვილი კ. ჩხეტიანი
კვერენჩხილაძე ახალაია
კაკალაძე მეგრელაძე
მწვრთნელი მწვრთნელი
გ. სანაია ე. ქომეთიანი
59. კაკალაძე - ბაკარანძე
73. კვერენჩხილაძე - დ. კირკიტაძე
83. ბაკურაძე - ნინუა
სათადარიგოები: ბანძავა, ხუმარაშვილი, სოსელია, გუჩუა
66. წურწუმია - ლომია
86. კ. ჩხეტიანი - სიხარულია
სათადარიგოები: ზარქუა, აფაქიძე, აკობია, ხიდეშელი, ეხვაია
გაფრთხილება: კვერენჩხილაძე (69), ჭიჭვეიშვილი (79), ქებაძე (88), კვესიეშვილი (90)
გამოუყენებელი პენალტი: ბაკარანძე (80)
არბიტრი: დ. ხარიტონაშვილი
ყოველდღიური სპორტული გაზეთი
"ლელო"
