"ქართულ კლასიკოს" ინტრიგა არასდროს აკლდა და არც 4 ნოემბერს გამართული შეხვედრა იყო გამონაკლისი. 
ვიდეო "დინამო" ქუთაისს ლიდერის რანგში სტუმრობდა და დუშან უჰრინის გუნდის მიზანი ლიდერობის კიდევ უფრო გამყარება იყო, ქუთათურებს კი (რომლებიც გასულ ტურში "ზუგდიდთან" დამარცხდნენ) საკუთარი გულშემატკივრების წინაშე რეაბილიტაციისთვის და "დინამოსთან" ქულათა სხვაობის შემცირებისთვის უნდა ეზრუნათ.
კარგი ამინდი და ლამაზი საფეხბურთო გარემო საინტერესო მატჩის წინაპირობას იძლეოდა. ნიკა საბანაძის არყოფნას თუ არ ჩავთვლით, რომელიც "ტორპედოს" დისკვალიფიკაციის გამო ვერ დაეხმარა, გუნდები ერთმანეთს ოპტიმალური შემადგენლობებით დაუპირისპირდნენ.
გია გეგუჩაძემაც და უჰრინმაც შემტევ ტაქტიკას მიმართეს.
ამ გუნდების პირველი წრის დაპირისპირებაც უხვგოლიანი იყო, თუმცა XIII ტურში გულშემატკივრებმა ერთ-ერთი საუკეთესო "კლასიკო" იხილეს. გუნდებმა ერთმანეთს თავიდანვე მაღალი ტემპი შესთავაზეს, ბურთი მოედნის ცენტრში, ფაქტობრივად, არ ჩერდებოდა და შეხვედრა ორმხრივ შეტევებში მიმდინარეობდა.
დებიუტში "დინამო" უფრო აქტიურობდა. ტორპედოელებს ძალიან უჭირდათ ჯაბა დვალისა და ჩისკოს განეიტრალება, რომლებიც სტუმართაგან ყველაზე სახიფათოდ უტევდნენ. დვალმა დებიუტში მცველებს დაასწრო და სახიფათოდაც დაარტყა, მაგრამ მცირედით ააცილა.
გეგუჩაძის შეგირდებმა პასუხი არ დააყოვნეს: ელგუჯა გრიგალაშვილის აქტიურობის შემდეგ ბექა ტუღუშმა სტუმართა კარის ბადე გარედან შეარხია.
თამაშის "გახურებასთან" ერთად ორივე კართან იმატა სახიფათო მომენტებმა. ალვაროს ფლანგური ჩაწოდების შემდეგ ჩისკოს თავური სულ მცირედით ასცდა სამიზნეს. ცოტა ხანში ყოფილმა ვალენსიელმა ჯარიმიდან ძელს გაარტყა ბურთი. დამატებაზე ლევან ხმალაძე ურტყამდა, მაგრამ ომარ მიგინეიშვილმა აკრობატულ ნახტომში შეძლო ბურთის მოგერიება.
მომდევნო 20 წუთი ამ შეხვედრაში ყველაზე დინამიკური და ლამაზი სანახავი გამოდგა. გუნდები "უკანმოუხედავად" უტევდნენ ერთმანეთს და მომენტი-მომენტზე იქმნებოდა.
თბილისელთა სწრაფ კონტრშეტევას მახვილი კუთხიდან ჩისკო აგვირგვინებდა, მაგრამ მიგინეიშვილმა კვლავ შესაშური რეაქცია გამოავლინა და საკუთარი გუნდი კიდევ ერთხელ იხსნა. ქუთაისელებმა სწრაფადვე უპასუხეს. საბანაძის არყოფნაში თავდასხმის ხაზში გიორგი ბერიაშვილთან შეწყვილებულმა ბექა ტუღუშმა დინამოელი მცველების სიმრავლე არად ჩააგდო, ბოლომდე იბრძოლა და იმდენი მოახერხა, რომ მისი უცნაური დარტყმის შემდეგ თბილისელები ხარიხამ იხსნა.
ქუთაისელთა მორიგ შეტევას კი ელგუჯა გრიგალაშვილის გოლი მოჰყვა. მისი დარტყმისას ბურთი ოთარ ხიზანეიშვილს მოხვდა ფეხზე და გიორგი ლორიამ ბურთის დამორჩილება ვეღარ მოახერხა.
გრიგალაშვილზე ცალკე უნდა ვთქვათ - "ტორპედოს" ახალგაზრდა ნახევარმცველი აშკარად გუნდის ლიდერად ჩამოყალიბდა. იგი 4 ნოემბერს გამართულ შეხვედრაში ქუთაისელთაგან საუკეთესო იყო და გვარსაც აშკარად ამართლებდა: დინამოელებს მისი შეტევები გრიგალივით ატყდებოდა თავს; მეორე ტაიმში კი გრიგოლ დოლიძის გადაცემის შემდეგ ერთი შეხებით მეკარისგან დაბალ კუთხეში ისე "ჩასვა" ბურთი, რომ ასეთ შესრულებას ნებისმიერი ვარსკვლავი მოაწერდა ხელს...
ახლა კი პირველ ტაიმს დავუბრუნდეთ. უჰრინის შეგირდები გაშვებულ გოლს არ დაუბნევია. უფრო მეტიც, თბილისელებმა იაქტიურეს და მალევე მოახერხეს ანგარიშის გათანაბრება: გიორგი მერებაშვილის ფლანგურ ჩაწოდებას დვალმა საჯარიმოში მოხდენილი თავური მიაყოლა და მიგინეიშვილი უშანსოდ დატოვა.
აქ აშკარა იყო ქუთაისელთა ცენტრალურ მცველთა შეცდომა, რომლებმაც ჯერ ცუდად მოიგერიეს ბურთი, შემდეგ კი დვალს გოლის გატანის საშუალებაც მისცეს.
ტაიმის ბოლომდე ორივე კართან შეიქმნა სახიფათო ეპიზოდები, თუმცა შესვენებამდე ანგარიში აღარ შეცვლილა.
მეორე ტაიმში მოვლენები არანაკლებ საინტერესოდ წარიმართა. გრიგალაშვილის გოლს სტუმრებმა ალვაროს გოლით უპასუხეს, რომელიც მერებაშვილის ჯარიმას, გივი კვარაცხელიას აქტიურობასა და ქუთაისელი მცველების შეცდომას მოჰყვა.
დარჩენილ დროში ორივე გუნდს შეეძლო გოლის გატანა. ბერიაშვილის აქტიურობის შემდეგ შეცვლაზე შესულმა გიორგი ფანცულაიამ ხელსაყრელი სიტუაციიდან ვერ იხეირა. ბოლო წუთზე კი ქუთაისელები თავადვე გადაურჩნენ გაშვებულ გოლს: ჩისკოს კუთხურის შემდეგ ერთ-ერთ ტორპედოელს ბურთი საკუთარი კარისკენ მოეჭრა და მასპინძლები ძელმა იხსნა.
დრამატული მატჩი უხვგოლიანი ფრეთი დასრულდა. ორივე გუნდის სასახელოდ უნდა ითქვას, რომ მათ ლამაზი საფეხბურთო საღამო გვაჩუქეს...
სამწუხაროდ, ასეთ ლამაზ შეხვედრას მატჩის შემდეგ განვითარებულმა მოვლენებმა დაასვა დაღი. საქმე ისაა, რომ თამაშის დამთავრებისთანავე ტრიბუნებზე "ტორპედოსა" და "დინამოს" გულშემატკივართა შორის დაპირისპირება მოხდა და სიტუაცია სამართალდამცველებმა განმუხტეს.
მატჩის შემდეგ
დუშან უჰრინი (დინამო):
"ძალიან კარგი თამაში იყო. ქუთაისში მოგებისთვის ჩამოვედით და კარგადაც ვითამაშეთ. საწყის წუთებში უპირატესობას ვფლობდით, მაგრამ ლორიას შეცდომის შედეგად გოლი მივიღეთ...
არაერთი საგოლე მომენტი გვქონდა და ჩვენი მოგებაც ლოგიკური იქნებოდა, მაგრამ მხოლოდ ორი გამოვიყენეთ".
გია გეგუჩაძე (ტორპედო):
"ძალიან საინტერესო შეხვედრა იყო. მოგება გვსურდა და შემტევი შემადგენლობა დავაყენე. გახსნილი ფეხბურთი ვითამაშეთ და ალბათ, ამის გამო იყო, ჩვენს კართანაც არაერთი საგოლე მომენტი რომ შეიქმნა.
თუმცა ვერ დავეთანხმები ჩემს კოლეგას, რომ "დინამოს" უფრო მეტი შანსი ჰქონდა. მეტი თუ არა, ნაკლები საგოლე ეპიზოდები ჩვენც არ გვქონია..."
საქართველოს ჩემპიონატი. უმაღლესი ლიგა. XIII ტური
ქუთაისი. ცენტრალური. 8000 მაყურებელი
ტორპედო-დინამო 2:2 (იხილეთ ვიდეო)
გოლები: 1:0 გრიგალაშვილი (30), 1:1 დვალი (37. მერებაშვილის პასით), 2:1 გრიგალაშვილი (53. დოლიძის პასით), 2:2 ალვარო (68)
ტორპედო დინამო
4-4-2 4-2-3-1
მიგინეიშვილი ლორია
რიგვავა სეთურიძე
კვახაძე გ. კვარაცხელია
ზ. ჭელიძე ხიზანეიშვილი
გ. გურული რეხვიაშვილი
დოლიძე ხმალაძე
გ. დათუნაიშვილი ძარია
კუხიანიძე მერებაშვილი
ე. გრიგალაშვილი ალვარო
ბერიაშვილი ჩისკო
ტუღუში დვალი
მწვრთნელი: მწვრთნელი:
გ. გეგუჩაძე დ. უჰრინი
ტორპედო
62. დოლიძე - ფანცულაია
79. ტუღუში - ფირცხალავა
83. გრიგალაშვილი - გიგაური
სათადარიგოები: ქვილითაია, ტაბატაძე, შერგელაშვილი, ვ. ბოლქვაძე
დინამო
84. მერებაშვილი - რობერტინიო
87. დვალი - ვოსკობოინიკოვი
სათადარიგოები: ზარქუა, ტვილდიანი, კვეკვესკირი, ჯიღაური, გლიშიჩი
გაფრთხილება: რიგვავა (10), ხმალაძე (25), ძარია (54) ფირცხალავა (90)
არბიტრი: ლ. სილაგავა
სხვა მატჩები:
ჩიხურა-დილა 0:2 - ვინ შეაჩერებს გორელებს? ასეთი თამაშით ვერავინ! [VIDEO]
მეტალურგი-ზესტაფონი 1:1 - ლოგიკა და კურიოზი [VIDEO]
დინამო (ბთ)-ზუგდიდი 0:4 - კორიდა "ჩელე-არენაზე"
ვიტ ჯორჯია-მერანი 0:0 - მხოლოდ რამდენიმე ეპიზოდი ქართული ფეხბურთიდან
კოლხეთი-სიონი 0:1
გოლი: 0:1 რ.ჯიქია (80)
სატურნირო ცხრილი
| ა | გუნდი | თ | მ | ფ | წ | ბ | ქ |
| 1 | დინამო (თბ) | 13 | 9 | 3 | 1 | 36-10 | 30 |
| 2 | დილა | 13 | 9 | 1 | 3 | 22-8 | 28 |
| 3 | ტორპედო | 13 | 8 | 2 | 3 | 29-12 | 26 |
| 4 | ზუგდიდი | 13 | 6 | 5 | 2 | 18-9 | 23 |
| 5 | ჩიხურა | 13 | 7 | 2 | 4 |
17-14 |
23 |
| 6 | ზესტაფონი | 13 | 6 | 3 | 4 | 16-9 | 21 |
| 7 | მეტალურგი | 13 | 5 | 1 | 7 | 9-18 | 16 |
| 8 | ვიტ ჯორჯია | 13 | 4 | 3 | 6 | 10-16 | 15 |
| 9 | მერანი | 13 | 4 | 1 | 8 | 7-23 | 13 |
| 10 | სიონი | 13 | 3 |
4 |
6 |
11-20 | 13 |
| 11 | დინამო (ბთ) | 13 | 2 | 2 |
9 | 10-26 | 8 |
| 12 | კოლხეთი | 13 | 0 | 3 | 10 | 5-25 | 3 |
ბომბარდირები:
დვალი (დინამო თბ) 10
ალვარო (დინამო თბ) 8
საბანაძე (ტორპედო) 7
ჩისკო (დინამო) 6
ჯორბენაძე (დინამო ბთ) 6
რ.ჯიქია (6) 6
მომდევნო ტური
11 ნოემბერი, კვირა
ზესტაფონი-ტორპედო
დინამო (თბ)-დინამო (ბთ)
ზუგდიდი-კოლხეთი
სიონი-დილა
ჩიხურა-ვიტ ჯორჯია
მერანი-მეტალურგი
ყოველდღიური სპორტული გაზეთი "ლელო"
