გია გიგატაძის მიერ დამოძღვრილი "ტორპედო" აშკარა პროგრესის გზას ადგას. აქამდე, საკუთარ მოედანზე გამართულ ოთხ მატჩში რიონისპირელებს მოგება არ ჰქონდათ და "ზესტაფონის" დამარცხებით ნავსიც გატეხეს. არადა, ფეროელები ქუთაისს ლიდერისა და ფავორიტის სტატუსით ეწვივნენ. გია
სასარგებლოდ ირჯებოდა ქუთაისელთა მარცხენაფლანგელი თორნიკე თარხნიშვილიც, რომლის მწვავე გარღვევებს ზესტაფონელები ხშირად წესების დარღვევით აჩერებდნენ. 28-ე წუთზე სწორედ მისი წაქცევისთვის დანიშნულ ჯარიმას მოჰყვა გიგაურის საგოლე დარტყმა, რომელმაც, როგორც აღმოჩნდა, მატჩის ბედიც გადაწყვიტა, თუმცა ამაზე ქვემოთ...
ზესტაფონელები მცირე ტერიტორიულ უპირატესობას ფლობდნენ, მაგრამ მასპინძლები მოედნის თითოეულ გოჯზე თავგამოდებით იბრძოდნენ და მეტოქეს სივრცეებს უზღუდავდნენ. თავდაპირველად ორივე გუნდმა "სტანდარტულებიდან" გაამწვავა ვითარება. ამას გარდა, თოდუასთან ორთაბრძოლაში გელაშვილი წაიქცა და პენალტს ითხოვდა, მაგრამ არბიტრმა ლაშა სილაგავამ სხვაგვარად განსაჯა...
მე-11 წუთზე ზესტაფონელებს ანგარიშის გახსნა შეეძლოთ. ფეროელთაგან ყველაზე აქტიურმა გელაშვილმა სპრინტერული თვისებები გამოავლინა, სამ მცველს დაუხლტა და მეკარეს ახლო კუთხეში დაურტყა, თუმცა მასპინძლები ძელმა იხსნა.
ტორპედოელები არ დაბნეულან და ზესტაფონელებს რამდენჯერმე მწვავე კონტრშეტევებით უპასუხეს, თუმცა საგოლე მდგომარეობამდე საქმე არ მისულა. ანგარიში 28-ე წუთზე გაიხსნა - მარცხენა ფლანგზე თარხნიშვილის მორიგ აქტიურობას ზესტაფონელთა კარის მიმართულებით საჯარიმო დარტყმა მოჰყვა, დიღმელაშვილმა მეკარის ბაქანთან მაღალი ბურთი ჩააგდო, მცველებმა შეძლეს მისი მოგერიება, მაგრამ პირდაპირ გიგაურს "დააჯდა" ფეხზე და შორიდან დაუშვებლად დარტყმული ბურთი ზესტაფონელთა კარის ბადეში აღმოჩნდა -1:0.
შესვენების შემდეგ მასპინძლებმა შეგნებულად დათმეს უპირატესობა და თავად კონტრშეტევებზე გააკეთეს აქცენტი. ამ ტაქტიკამ გაამართლა. ფეროელები ბურთს აკონტროლედნენ და გაცილებით მეტს უტევდნენ ვიდრე მასპინძლები, თუმცა საგოლე მომენტები ორივე გუნდმა თითქმის თანაბრად შექმნა. 48-ე წუთზე კემუხტაშვილი გაექცა მეურვეებს და კარშიც დაარტყა, მაგრამ კვასხვაძე ფხიზლად დაუხვდა ბურთს. 56-ე წუთზე კი სტუმრები აშკარა გოლს გადაურჩნენ - მცველების გარემოცვაში მყოფმა საბანაძემ საჯარიმოს გარედან შემობრუნებით დაარტყა, კვასხვაძე უძლური იყო, მაგრამ სტუმრები ხარიხამ გადაარჩინა...
გეგუჩაძემ შეცვლებით სცადა მდგომარეობის გამოსწორება და მოედანზე ჯერ ალადაშვილი, მოგვიანებით კი წინამძღვრიშვილი და ბაბუნაშვილი გამოიყვანა. ალადაშვილი კარგად ჩაერთო თამაშში. 68-ე წუთზე მის მიერ მარჯვნიდან ჩაწოდებულ ბურთს მცველებისგან უყურადღებოდ მიტოვებულმა გელაშვილმა თავური დარტყმა მიაყოლა და ოდნავ ააცილა. ამას ელიავას სახიფათო დარტყმა მოჰყვა. კიდევ ორიოდე წუთი და იმავე ალადაშვილის ფლანგური ჩაწოდების შემდეგ დვალმა "მაკრატელა" დაარტყა და ბურთი მცველებმა მოიგერიეს. ალადაშვილის სახიფათო საჯარიმო დარტყმა კი მეკარე მიგინეიშვილმა მოიგერია.
უქმად ქუთათურებიც არ ყოფილან. საბანაძე და კემუხტაშვილი ხშირად აწუხებდნენ მეტოქეს. კარგად ერთვებოდნენ შეტევებში ჩიკვილაძე და დიღმელაშვილი, თუმცა მათ მცდელობას რაიმე განსაკუთრებული ხიფათი არ მოჰყოლია.
თამაშის მიწურულს სიტუაცია კიდევ უფრო დაიძაბა. 78-ე წუთზე დვალი თავისუფალი პოზიციიდან ურტყამდა, მაგრამ უზუსტოდ მოუვიდა. ამას ზესტაფონელთა მხრიდან უხეში თამაში მოჰყვა, რამაც ქუთაისელი ფანები გააბრაზა და ერთ-ერთმა ვაიგულშემატკივარმა მოედანზე ბოთლი ისროლა, თუმცა წესრიგის დამრღვევი სტადიონის დაცვამ მალევე "დააშოშმინა" და ინციდენტს გართულება აღარ მოჰყოლია.
87-ე წუთზე გელაშვილმა, რომელიც მეორე ტაიმში ძირითადად მარცხენა ფრთაზე მოქმედებდა, ფლანგზე გაილაღა და დვალს თავზე დაასვა ბურთი, თუმცა ჯაბას თავური სამიზნეს ოდნავ ასცდა და ზესტაფონელებმა ქულის გადარჩენის ბოლო შანსიც ხელიდან გაუშვეს.
მატჩის შემდეგ
გია გეგუჩაძე (ზესტაფონი): "ქუთაიში ნამდვილი საფეხბურთო ზეიმი იყო. სავსე ტრიბუნები და მხურვალე გულშემატკივრობა. თამაშიც საკმაოდ საინტერესო და დაძაბული გამოვიდა. სახიფათო მომენტებითა და გააზრებული კომბინაციებით. უპირატესობას ვფლობდით, ანგარიშის გათანაბრებაც შეგვეძლო, მაგრამ ვერ მოვახერხეთ. სამწუხაროა, რომ დავმარცხდით, მაგრამ წინ მთელი ჩემპიონატია და დღევანდლ შეცდომებს მომავალი მატჩებისთვის გავითვალისწინებთ".
გია გიგატაძე (ტორპედო): "მადლობა მინდა ვუთხრა ბიჭებს თავდადებული თამაშისთვის. "ზესტაფონი" საქართველოში საუკეთესო გუნდია და ჩვენ მისი დამარცხება მოვახერხეთ".
17.10. ქუთაისი. ცენტრალური. 5 000 მაყურებელი
ტორპედო 1
ზესტაფონი 0
1:0 გიგაური (28)
ტორპედო ზესტაფონი
4-4-1-1 4-4-2
მიგინეიშვილი რ. კვასხვაძე
ფოფხაძე ბენაშვილი
ფარულავა ხიდეშელი
ს. თოდუა გ. ონიანი
ჩიკვილაძე ელიავა
დათუნაიშვილი დაუშვილი
მ. გიგაური ძარია
დიღმელაშვილი აფციაური
თარხნიშვილი გრიგალაშვილი
საბანაძე გელაშვილი
ვ. კვარაცხელია დვალი
მწვრთნელი მწვრთნელი
გ. გიგატაძე გ. გეგუჩაძე
ტორპედო
41. ვ. კვარაცხელია - კემუხტაშვილი
65. თარხნიშვილი - გ. ჩხეტიანი
78. ვ. გიგაური - ლომაშვილი
სათადარიგოები: ქვილითაია, ნ. კვასხვაძე, მაჭავარიანი, გურული
ზესტაფონი
58. ძარია - ალადაშვილი
77. ბენაშვილი - წინამძღვრიშვილი
77. დაუშვილი - ბაბუნაშვილი
სათადარიგოები: მამალაძე, მაკარიანი, გორგიაშვილი, ფიფია
გაფრთხილება: კვარაცხელია (31), ძარია (48), ხიდეშელი (86)
არბიტრი: ლ. სილაგავა
ყოველდღიური სპორტული გაზეთი
"ლელო"
