"ტორპედომ" "დილა" დაამარცხა, "დინამომ" კი ლიდერობა განიმტკიცა [VIDEO]

6 აპრილს საქართველოს საფეხბურთო ჩემპიონატის უმაღლესი ლიგის 26-ე ტურის მატჩები გაიმართა.

ტურის ცენტრალური შეხვედრა გორში, თენგიზ ბურჯანაძის სახელობის სტადიონზე ჩატარდა, სადაც ერთმანეთს უმაღლესი ლიგის ზედა ექვსეულის სატურნირო ცხრილში მეორე და მეოთხე ადგილზე მყოფი გუნდები,"დილა" და ქუთაისის "ტორპედო" დაუპირისპირდნენ.

საგულისხმოა, რომ სტუმრებმა მატჩის დებიუტშივე შეძლეს ორბურთიანი უპირატესობით დაწინაურება. მასპინძლები შოკში გიორგი ბერიაშვილმა ჩააგდო, რომელმაც მესამე და მეოთხე წუთებზე, ზედიზედ დალაშქრა გორელთა კარი.

ვალდას ივანაუსკასის შეგირდებმა მცდელობა არ დააკლეს, თუმცა მხოლოდ ანგარიშში სხვაობის შემცირება შეძლეს.

შეხვედრის 86 წუთზე, საჯარიმოს მისადგომებიდან გოგოტა გოგუას დარტყმული ბურთი ძელს მოხვდა, დამატებაზე კი ირაკლი მოდებაძემ იყოჩაღა. საბოლოოდ 1:2 "ტორპედოს" სასარგებლოდ.



გატანილი გოლის გარეშე გაილია შეხვედრა "ზუგდიდსა" და "ზესტაფონს" შორის, ისევე როგორც, ქვედა ექვსეულში რუსთავის "მეტალურგისა" და ბოლნისის "სიონის" დაპირისპირება.

ამ ტურში, ტორპედოელი ბერიაშვილის მსგავსად, დუბლით გამოირჩა საბა ლომია, რომელმაც "მერანს" მარტვილის ცენტრალურ სტადიონზე "ვიტ ჯორჯიასთან" გამართულ მატჩში გაამარჯვებინა.

მარტვილელთა ბომბარდირმა თავი 37-ე და 68-ე წუთზე გამოიჩინა.

ფოთში ქულას დასჯერდა ბათუმის "დინამო", რომელიც ბესიკ ჩიმაკაძის გოლით 43-ე წუთზე დაწინაურდა. თუმცა გიორგი ბუხაიძემ 62-ეზე გაათანაბრა და მატჩის საბოლოო ანგარიში დააფიქსირა - 1:1.

ტურის ბოლო შეხვედრა თბილისში, "დინამო არენაზე" გაიმართა, სადაც "დინამომ" შესუსტებული შემადგენლობით მოთამაშე საჩხერის "ჩიხურას" სამი უპასუხო გოლი გაუტანა.

დუბლი შეასრულა ჩისკომ, რომელმაც სოსო ფრუიძის გუნდის კარი 28-ე და 61-ე წუთებზე აიღო, შუალედში კი გატანა ლევან ხმალაძემ შეძლო (32).



ამ გამარჯვებით თბილისის "დინამომ" სატურნირო ცხრილში ლიდერობა განიმტკიცა (60 ქულა) და მეორე ადგილზე მყოფ "დილას" (56) ახლა უკვე ოთხი ქულით უსწრებს. მეოთხედან მესამე საფეხურზე აინაცვლა ქუთაისის "ტორპედომ" (51 ქულა), რომელმაც ადგილი საჩხერის "ჩიხურას" გაუცვალა (50).