ქვედა ექვსეულში, სატურნირო ცხრილიდან გამომდინარე, უშეღავათო ბრძოლები მიმდინარეობს. ეს ბუნებრივიცაა, რადგან რუსთავის "მეტალურგის" გარდა, ყველა გუნდი დგას უმაღლესი ლიგიდან გავარდნის საშიშროების წინაშე. "მერანი" და "ვიტ ჯორჯია" უკანასკნელი მატჩების შედეგებმა პირველი ლიგის კანდიდატებად აქცია. ამის გათვალისწინებით, ცხადი იყო, რომ შეხვედრა დაძაბულ გარემოში წარიმართებოდა. ამიტომაც ფეხბურთის ფედერაციამ მარტვილში, სხვათა შორის, პირველად, მსაჯთა ექვსკაციანი ბრიგადა მიავლინა.
აქვე ვთქვათ ისიც, რომ დიდი ხნის "პაუზის" შემდეგ სტუმართა პირველ გუნდს კვლავ ზურაბ ბერიძე დაუბრუნდა, რომელიც 14 წელიწადია, ვიტელთა გუნდშია. ის ბოლო დროს დუბლებს ავარჯიშებდა. ვერ ვიტყვით,
მატჩმა მთლიანობაში მოლოდინი გაამართლა. მასპინძლებმა თავიდანვე დიდი ძალებით შეუტიეს მოწინააღმდეგეს. პირველი სახიფათო დარტყმა მერანელთა შუახაზელმა ფონიავამ განახორციელა, თუმცა მიზანმა უმტყუნა. მოგვიანებით დიდავას წამოწყებული იერიშის დაგვირგვინება მართებდა კუჭუხიძეს, თუმცა ბოლო წამს მცველი წამოეწია და გაურკვეველ სიტუაციაში საჯარიმოში წაიქცა. ბეუქლიშვილმა ეპიზოდს ყურადღება არ მიაქცია.
გულხელდაკრეფილები არც ვიტელები ყოფილან: მე-20 წუთზე უბილავამ შესანიშნავი გადაცემით კუხალეიშვილი მოძებნა, რომელმაც ერთი შეხებით ბურთს თავით შეუცვალა მიმართულება, თუმცა დარტყმა არაზუსტი გამოუვიდა.
გატანის შანსი ქარს გაატანა ვასაძემაც.
თითქოს შეხვედრა სტუმრებს ცუდს არაფერს უქადდა, ტაიმის შუაში თამაშიც გაათანაბრეს, მომენტებიც შექმნეს, თუმცა ერთ ეპიზოდში ბურთი მოედნის ცენტრის სიახლოვეს დაკარგეს და ლაშა კუჭუხიძის გამოზომილი პასით ლომიამ ანგარიში გახსნა - 1:0.
შესვენების შემდეგ თბილისელები გათანაბრებას ლამობდნენ, თუმცა არაფერი გამოსდიოდათ. ფონს გასვლას მხოლოდ და მხოლოდ შორეული დარტყმებით ეშურებოდნენ.
მორიგი შეტევისას დაცვაში მიუტევებელი შეცდომა დაუშვეს და ლომიამ თავისი გუნდის უპირატესობა ორამდე გაზარდა - დუბლით გამოიჩინა თავი. სხვათა შორის, მიმდინარე ჩემპიონატში ლომიას ანგარიშზე 15 გოლია. ამ შედეგით მხოლოდ დინამოელებს - ჩისკოსა და დვალს ჩამორჩება.
"ვიტ ჯორჯიას" არც ამის შემდეგ დაუყრია ფარ-ხმალი, დრო კიდევ ბევრი იყო დარჩენილი თამაშის გადასარჩენად. ზურაბ ბერიძემ ახალშემოსულ ლობჟანიძესა და გოგიაშვილს გაბრიჭიძეც დაამატა.
სახიფათო მომენტებიც უმალ შექმნეს: ლაშა გაბიჭიძის ძლიერად გასროლილი მოიგერია შეროზიამ, რომელიც მერანელთაგან ერთ-ერთი საუკეთესო იყო, რა თქმა უნდა, ლომიასთან ერთად.
აშკარაა, რომ შეროზია ნიჭიერი და შრომისმოყვარეა. წესით, ქართულ ფეხბურთს კიდევ ერთი მაღალი დონის მეკარე უნდა შეემატოს.
დრო იწურებოდა, "ვიტ ჯორჯიას", ფაქტობრივად, არაფერი გამოსდიოდა, კლასი და გამოცდილება მაინც უფრო "მერანის" მხარეს რჩებოდა. ბოლო აკორდი ფონიავას დარტყმა იყო, რომელიც მცირე მანძილით ასცდა კარს.
მასპინძლებმა საკმაოდ მძიმე ბრძოლაში საჭირო სამი ქულა მოიპოვეს და მნიშვნელოვანი ნაბიჯი გადადგეს საუკეთესოთა მარაქაში ადგილის შესანარჩუნებლად. "ვიტ ჯორჯიას" წაგებათა სერია კი გრძელდება...
მომავალ ტურში ეს გუნდი აუტსაიდერ "კოლხეთს" მასპინძლობს, "მერანი" კი შედარებით კარგ ხასიათზე ბოლნისს ეწვევა.
ყოველდღიური სპორტული გაზეთი "ლელო"
