უმაღლეს ლიგას, "კოლხეთთან" ერთად, ბათუმის "დინამოც" დაემშვიდობა [VIDEO]

18 მაისს საქართველოს ეროვნული საფეხბურთო პირველობის ბოლო, 32-ე ტურის მატჩები გაიმართა.

გაირკვა იმ გუნდის ვინაობაც, რომელიც უმაღლეს ლიგას ფოთის "კოლხეთთან" ერთად დაემშვიდობა. ეს ბათუმის "დინამოა", რომელმაც ბოლო ტურში ვაჟა ქორიძის ერთადერთი გოლით კი შეძლო რუსთავში "მეტალურგის" ძლევა, მაგრამ ზღვისპირელთა საუბედუროდ, ასევე სტუმრად იმარჯვა ბოლნისის "სიონმა".

ბოლნისელებმა მარტვილში "მერანს" დავით სვანიძისა (მე-8 წუთი) და ლადო ახალაიას (70) გოლებით 2:1 აჯობეს. მასპინძელთაგან ერთადერთი გოლით 62-ე წუთზე მამუკა ტორონჯაძე გამოირჩა.

თბილისის "დინამომ", რომელმაც ჩემპიონობა ვადამდე გაინაღდა, "დინამო არენაზე" "ზესტაფონს" უმასპინძლა და ანგარიშით 6:1 გაანადგურა.

შარშანდელ და წლევანდელ ჩემპიონთა პაექრობაში ანგარიში დუშან უჰრინის შეგირდებმა მატჩის მე-15 წუთზე, პეტერ გრაიციარის გოლით გახსნეს. ორიოდე წუთში ორ ბურთამდე სხვაობა ჯაბა დვალმა გაზარდა. სტუმართაგან გატანა და სხვაობის შემცირება ბოტი დემელიმ 37-ე წუთზე კი შეძლო, თუმცა ამის შემდეგ დინამოელებმა მეტოქეს კიდევ ოთხჯერ გაუტანეს.

შესვენებამდე სტატუს-ქვო უსტარიცმა აღადგინა (40 წუთი), მეორე ტაიმში კი ჯერ გრაიციარმა მიითვალა დუბლი (62), შემდეგ კი 66-ე და 74-ე წუთებზე ჩემპიონატის საუკეთესო ბომბარდირმა ჩისკომ.



უხვგოლიანი თამაში გაიმართა ზუგდიდსა და გორშიც. ზუგდიდში ადგილობრივ გუნდს ქუთაისის "ტორპედო" ესტუმრა და ანგარიშით 4:1 მოუგო, "დილამ" კი შინ  საჩხერის "ჩიხურა" არ დაინდო - 4:0.



ფოთში გამარჯვება იზეიმა პირველ ლიგაში დაქვეითებულმა "კოლხეთმა", რომელმაც უმოტივაციო "ვიტ ჯორჯიას" ორი უპასუხო გოლი გაუტანა.