13 ნოემბერს, ორკვირიანი პაუზის შემდეგ, საფეხბურთო კლუბ "ზუგდიდში" ახალი მწვრთნელ-კონსულტანტი წარადგინეს. არასახარბიელო მდგომარეობაში მყოფი გუნდი სერგო გაბელაიამ ჩაიბარა.
მალხაზ ჭეჟია (ს.კ."ზუგდიდის" დირექტორი):
"უღრმესი მადლობა მინდა გადაგიხადოთ ჟურნალისტებს მობრძანებისთვის და ყოველგვარი შესავლის გარეშე მინდა ს.კ. "ზუგდიდის" ხელმძღვანელობის, ადმინისტრაციისა და ამავე კლუბის სამწვრთნელო შტაბის ერთობლივი გადაწყვეტილება გაგაცნოთ.
იმ ფორსმაჟორულ სიტუაციაში, რაშიც ჩვენი კლუბი იმყოფება მიმდინარე საფეხბურთო სეზონზე და აწ უკვე ყოფილი მწვრთნელის, კობა წიტაიშვილის წასვლის შემდეგ, გუნდი აუცილებლად საჭიროებდა ცვლილების განხორციელებას, რაც ერთობლივად განვახორციელეთ კიდეც და დაინიშნა გუნდის მწვრთნელ-კონსულტანტად სერგო გაბელაია.
მივესალმები
სერგო გაბელაია (მწვრთნელ-კონსულტანტი):
"პირველ რიგში, ყველას მინდა მადლობა გადავუხადო გულთბილი მიღებისთვის და უპირველესად, მადლობას ვეტყვი ს.კ. "ზუგდიდის" ხელმძღვანელობას ნდობისთვის.
არ მინდა ჩემს საქმიანობაზე საუბრით გადაგღალოთ, თუმცა ერთს ვიტყვი: სამწვრთნელო კარიერაში 21-წლიანი მუშაობისას არაერთ სიტუაციაში მომიწია მუშაობა, ის სიტუაცია მაქვს მხედველობაში, რაშიც თქვენი გუნდი იმყოფება ამჟამად.
ასეთი მდგომარეობიდან არაერთი გუნდი გამოგვიყვანია ერთად დგომით და მაგალითისთვის გამოდგება 90-იან წლებში თელავის "კახეთი", რომელსაც პირველ წრეში მოგება არ ჰქონდა და უმაღლესში დარჩა; ცხინვალის "სპარტაკს" სამი წლის წინ სამი ქულა ჰქონდა და იქაც უკეთესობისკენ დავძარით საქმე; ფოთის "კოლხეთი" შვიდი წლის წინ ცხრილის ფსკერზე იყო და იმავე სეზონში ხუთეულში გავიდა.
დანარჩენს საქმე გვიჩვენებს და ერთად დგომით, მინდა კიდევ ერთხელ ხაზი გავუსვა, რომ აქაური პოტენციალი მაძლევს იმის თქმის საბაბს, რომ "ზუგდიდი" უმაღლეს ლიგაში აუცილებლად დარჩება".
წყარო: fczugdidi.ge
