ჰოდა, ბურთის ნელ-ნელა გორებით ჩაამთავრეს კიდეც ქვემოქართლური ”დერბი”, მატჩამდე ”რაღაც” ინტრიგას რომ გვპირდებოდა. ეს ”ინტრიგა” კი, რაღა
წინა ტურთან შედარებით ”სიონი” აშკარად სახეშეცვლილი შემადგენლობით გამოვიდა _ ძირითადში შვიდი ახალი ფეხბურთელი იყო; ”ოლიმპში” კი მხოლოდ ორი ცვლილება ვიხილეთ _ დენის დობროვოლსკისა და გიორგი ბერიაშვილის ნაცვლად რევაზ გეწაძე და ჯაბა უგულავა გამოჩნდნენ. ახალმა მწვრთნელმა გუნდის ტაქტიკური განლაგებაც შეცვალა და ”ოლიმპმა” 4-4-2 სქემით ითამაშა; დაახლოებით ანალოგიური იყო სტუმართა განლაგებაც, ოღონდ ეს მხოლოდ პირველ ტაიმზე ითქმოდა. ანუ, მატჩის იმ მონაკვეთს ვგულისხმობთ, როცა მოედანზე ფეხბურთს-მიმსგავსებული სპორტის სახეობას ვუცქერდით.
მასპინძლებმა შეხვედრა აქტიურად დაიწყეს და მაქსიმალურად ცდილობდნენ ფლანგების გამოყენებას; განსაკუთრებით კარგად გამოიყურებოდნენ განაპირა ნახევარმცველები და ალბათ, ლოგიკურიც იყო, პირველ გოლში სწორედ მათ რომ მიიღეს მონაწილეობა: რევაზ გეწაძემ კუთხური ჩამოაწოდა, გიორგი ქავთარაძემ კი რთული მდგომარეობიდან ზუსტი თავური დარტყმით ანგარიში გახსნა. გეწაძე, საერთოდაც, ყველაზე აქტიური იყო ორივე გუნდის შემადგენლობაში და ტაიმის ბოლომდე არაერთხელ ”ააწიოკა” თავის საყვარელ მარცხენა ფლანგზე მეურვეები; ეგ კი არა, ორჯერ შორი მანძილიდან ”სტანდარტულიც” შეასრულა, მაგრამ ერთ ეპიზოდში ბურთი მცირე მანძილით აცდა სტუმართა კარს, მეორეჯერ კი მინდია ბობღიაშვილმა იყოჩაღა და ”სიონი” მეორე გოლს გადაარჩინა. სტუმრებმა პირველი სახიფათო მომენტი 24-ე წუთზე შექმნეს, როცა მიხეილ ბობოხიძე საკმაოდ მახვილი კუთხიდან ცდილობდა გოლის გატანას. თუმცა, რამდენიმე წუთის შემდეგ ”სიონის” გამოცდილ ფეხბურთელს ამ შეხვედრაში აქტიურობა მაინც დაუფასდა: მეტოქის საჯარიმოში შეჭრილი ბობოხიძე ”ოლიმპის” მცველმა ლაშა ჯაფარიძემ წესების დარღვევითთ შეაჩერა და შეხვედრის არბიტრმა ლევან კვარაცხელიამ პენალტი უყოყმანოდ დანიშნა. თერთმეტმეტრიანი დაზარალებულმა ზუსტად შეასრულა და საყაიმო ანგარიშიდან გამომდინარე, სტადიონზე შეკრებილი მცირერიცხოვანი მაყურებელი დაძაბულ პაექრობას რომ მოელოდა, მწარედ შეცდა. თავად განსაჯეთ: 30-ე წუთიდან შეხვედრის ბოლომდე, სტუმრებს ”ოლიმპის” კარში, ფაქტობრივად, აღარც დაურტყამთ! ეგ კი არა, მეორე ტაიმში ერთი ხეირიანი შეტევაც არ განუხორციელებიათ, მაგრამ, ალბათ, ”გასამართლებელი საბუთიც” ექნებათ: ზედ შესვენების წინ ”სიონის” საყრდენმა ნახევარმცველმა გიორგი ოქროპირიძემ სრულიად უწყინარ სიტუაციაში მეორე ყვითელი ბარათი მიიღო და თამაშიც ნაადრევად დაასრულა.
შესვენების შემდეგ გიორგი ყიფიანმა მოედანზე ერთდროულად ორი ახალი ფეხბურთელი გამოიყვანა, რამდენიმეს ამპლუა შეუცვალა, მაგრამ, როგორც უკვე აღვნიშნეთ, მეორე ტაიმში ორივე გუნდის მოთამაშეები დადიოდნენ! თუმცა, ვიდრე მართლაც სიარულს დაიწყებდნენ, ”სიონის” მცველების ორი უხეში და პოზიციური შეცდომა სტუმრებს ძვირად დაუჯდათ: გიორგი ქავთარაძის ფლანგურ გადაცემას დავით ბოლქვაძის ახლოდან გატანილი გოლი მოჰყვა; სულ მალე კი თემურ ღონღაძის წინააღმდეგ დაირღვა თამაშის წესები და პენალტი ამჯერად უკვე სტუმართა კარში დაინიშნა: როგორც წესი, ლუკა რაზმაძე ასეთ შანსს ხელიდან არ უშვებს-ხოლმე და ასე მოხდა ამჯერადაც, ამის შემდეგ კი, დაახლოებით ნახევარი საათი მოედანზე საინტერესო არაფერი მომხდარა, ტრიბუნებზეც სამარისებური სიჩუმე სუფევდა და ერთადერთხელ დაირღვა ქომაგთა მყუდროება, როცა ალექსანდრე კვახაძის შორეული დარტყმა მინდია ბობღიაშვილმა გაჭირვებით მოიგერია. ისე კი გვინდა გვჯეროდეს, რომ ორივე გუნდის ფეხბურთელთა უღიმღამო თამაში... ძალების დაზოგვას ემსახურებოდა; ანუ, შესაძლოა, ”ოლიმპისა” და ”სიონის” მწვრთნელ-ფეხბურთელები სამი დღის მერე ჩასატარებელ განმეორებით სათასო მატჩზე ფიქრობდნენ.
ოლიმპი-სიონი 3:1
11.12.2010. რუსთავი. ფოლადი. 300 მაყურებელი
1:0 ქავთარაძე (14, გეწაძის პასით), 1:1 ბობოხიძე (30, პენალტით), 2:1 დ. ბოლქვაძე (53. ქავთარაძის პასით), 3:1 რაზმაძე (58, პენალტით).
ოლიმპი სიონი
4-4-2 4-4-2
ბედიაშვილი ბობღიაშვილი
ღონღაძე ქურასბედიანი
კვახაძე დიდავა
რეხვიაშვილი თარგამაძე
ჯაფარიძე ლ. ჭელიძე
ქავთარაძე ვაშაკიძე
რაზმაძე გ. მელქაძე
დ. ბოლქვაძე გ. ოქროპირიძე
გეწაძე ნოზაძე
ჯ. უგულავა ბობოხიძე
მოდებაძე გოცირიძე
მწვრთნელი: თ. მაისურაძე მწვრთნელი: გ. ყიფიანი
ოლიმპი
58. ჯ. უგულავა-გ. ნუგზარის ძე ჭელიძე
69. ღონღაძე-ქემოკლიძე
76. გეწაძე-ყაზაიშვილი
სათადარიგოები: ჭანტურია, ბერიაშვილი, დობროვოლსკი, ხურციძე
სიონი
46. მელქაძე-უგრეხელიძე
46. ბობოხიძე-ქორიძე
74. გოცირიძე-მ. ოქროპირიძე
სათადარიგოები: გავაშელი, ჩივაძე, სანიკიძე, გ. ნოდარის ძე ჭელიძე
გაფრთხილება: ჯაფარიძე (9), გ. ოქროპირიძე (18), ბობოხიძე (28), რეხვიაშვილი (90)
გაძევება: გ. ოქროპირიძე (45)
არბიტრი: ლ. კვარაცხელია (ზუგდიდი)
ყოველდღიური სპორტული გაზეთი
"ლელო"
