უმაღლესი ლიგის XXVII ტურის წინ: "დინამო" "დინამოს" წინააღმდეგ!

ფოტოზე: თბილისში გამართულ პირველი წრის მატჩში გამარჯვება ბათუმელებს დარჩათ
დღეს, 9 მაისს, ქობულეთის "ჩელე არენაზე", ბათუმისა და თბილისის დინამოელთა პრინციპული დაპირისპირება გაიმართება. შეხვედრა 17:00 სთ-ზე დაიწყება და მის ტელერეპორტაჟს "პირველი არხი" შემოგვთავაზებს.

ისტორიულად, ამ გუნდებს შორის მატჩები თითქმის ყოველთვის უკომპრომისო ბრძოლაში მიმდინარეობს. გეხსომებათ, საქართველოს დამოუკიდებელი ჩემპიონატის პირველ წლებში ქვეყნის თასის მფლობელის ვინაობა ძირითადად ამ ორი გუნდის დაპირისპირებაში ირკვეოდა...

ჩემპიონატების ისტორიაში კი ეს მატჩი რიგით 47-ე იქნება. აქამდე გამართული 46 მატჩიდან 33 თბილისელებმა მოიგეს, 7 თამაში ფრედ დასრულდა, ხოლო 6-ჯერ გამარჯვება ბათუმელებმა იზეიმეს. ცხადია, გატანილ-გაშვებული გოლების მხრივაც დედაქალაქელთა უპირატესობა ფრიად შთამბეჭდავია - 101:42.

როგორც თბილისური კლუბის ოფიციალური ვებგვერდი წერს, დინამოელთა ურთიერთშეხვედრებში ყველაზე პოპულარული ანგარიშებია 3:1 და 3:0, რაც ექვსჯერ დაფიქსირდა. ყველაზე უხვგოლიანი მატჩი 1994 წლის 18 სექტემბერს გაიმართა, როცა თბილისელებმა აჭარის მთავარ ქალაქში 5:3 მოიგეს. ჰეთ თრიკი შეასრულა არჩილ არველაძემ, ხოლო დუბლი - მისმა ტყუპისცალმა შოთამ. ამავე ანგარიშით იმარჯვა თბილისის "დინამომ" 2012 წლის 11 ნოემბერსაც.

ბათუმელებს ქართული საკლუბო ფეხბურთის ფლაგმანისთვის დიდი ანგარიშით (3:0) აქვთ მოგებული 2004 წელს, XVI ჩემპიონატის მე-9 ტურში. ყველაზე დიდი ანგარიშით თბილისელებმა მეტოქე 2007 წლის 29 სექტემბერს დაამარცხეს - 7:0.

ამ გუნდებს შორის ბოლო შეხვედრა კი 2014 წლის 6 ნოემბერს, მიმდინარე პირველობის მე-12 ტურში "დინამო არენაზე" გაიმართა და ბათუმელთა გამარჯვებით 1:0 დასრულდა.

უმაღლესი ლიგა. XXVII ტური
8 მაისი
ვიტ ჯორჯია-შუქურა 0:1
გოლი: 0:1 ზვიად მეტრეველi (70).

მერანი-მეტალურგი 3:0
გოლები: 1:0 აკაკი შულაია (47), 2:0 დათა ციცხვაია (49), 3:0 ნოდარ კიკნაველიძე (75).

9 აპრილი
ზუგდიდი. "ბაიას საწვრთნელი ბაზა". 17:00
ზუგდიდი-ჩიხურა
პირველი წრე 0:1
ურთიერთშეხვედრები
7: +1 =0 -6, 7:14
დისკვალიფიკაცია: ლაშა ღონღაძე, გოდერძი მაჩაიძე (ორივე - ზუგდიდი)

ქუთაისი. "რამაზ შენგელია". 17:00
ტორპედო-სიონი
პირველი წრე 0:1
ურთიერთშეხვედრები
39: +25 =6 -8, 80:36

გორი. "თენგიზ ბურჯანაძე". 17:00
დილა-კოლხეთი
პირველი წრე 1:0
ურთიერთშეხვედრები
42: +17 =6 -19, 43-54

ლანჩხუთი. "ევგრაფი შევარდნაძე". 17:00
გურია-სამტრედია
პირველი წრე 1:3
ურთიერთშეხვედრები
20: +6 =2 -12, 32:50
დისკვალიფიკაცია: ერეკლე კილაძე, კობა შალამბერიძე (ორივე - გურია) - ზურაბ ხიზანიშვილი (სამტრედია)

ქობულეთი. "ჩელე არენა". 17:00, LIVE I არხზე
დინამო (ბთ)-დინამო (თბ)
პირველი წრე 1:0
ურთიერთშეხვედრები
46: +6 =7 -33, 42:101

ყოველდღიური სპორტული გაზეთი "ლელო"