ცხადია, გუნდის გასაძლიერებლად მოსალოდნელია საკადრო ცვლილებები, მაგრამ ჯერ ოფიციალურად არ ხმაურდება, ვინ დატოვებს აჭარის მთავარ გუნდს და ვის დაიმატებენ.
რადგან "დინამო" სახელმწიფო დოტაციაზეა, ბათუმშიც, ისევე, როგორც მსგავსი სტატუსის მქონე სხვა კლუბში, ხანგრძლივი ხელშეკრულება ბევრ ფეხბურთელს არ აქვს.
ერთ-ერთი იშვიათი გამონაკლისი კამერუნელი არნო ჩუენსუა. 23 წლის მარჯვენა მცველს ბათუმელებთან კონტრაქტის ვადა დეკემბრის ბოლოს ეწურება. მაგრამ მის არყოფნაში, "დინამომ" მთელი სეზონი, ფაქტობრივად, მარჯვენა
ჩუენსუ "დინამოში" შარშან ჩაირიცხა და კონტრაქტი 1+1 სისტემით გააფორმა. მაგრამ აჭარულ გუნდში მხოლოდ ორჯერ ითამაშა - 2014 წლის 9 სექტემბერს "ვიტ ჯორჯიასთან" შეხვედრაში მძიმედ დაშავდა და მას შემდეგ მკურნალობდა. კამერუნელმა ინდივიდუალური ვარჯიში აპრილში დაიწყო და ევროთასებზე მისი იმედი ჰქონდათ. თუმცა ცნობილი გახდა, რომ ჩუენსუმ მეორე ოპერაციაც მოითხოვა და აჭარლებს ევროპა ლიგაზე ვერ დაეხმარება.
ამდენად, ბათუმელები კვლავ ეძებენ მარცხენა მცველს და რამდენიმე კანდიდატიც შეარჩიეს, მაგრამ ჯერ საბოლოო გადაწყვეტილება არ მიუღიათ.
გუნდის მთავარი მწვრთნელი ნახევარდაცვისა და შეტევის ხაზის გაძლიერებასაც ცდილობს. როგორც შევიტყვეთ, ორი მოთამაშის მიწვევა უკვე გადაწყვეტილია. პირველი - თავდამსხმელი გიორგი გაბედავაა. "გაგრის" აღზრდილი ფორვარდი ბოლოს "სამტრედიაში" ირიცხებოდა, მაგრამ საჩხერის "ჩიხურაში" ყოფნისას ევროპა ლიგაზე მიღებული ტრავმა მხოლოდ სეზონის ბოლოს მოირჩინა და "სამტრედიაში" შესაძლებლობები ვერ გამოავლინა.
ბათუმელთა სამწვრთნელო შტაბის სამიზნეში "სამტრედიის" კიდევ ერთი ფეხბურთელი - თორნიკე გორგიაშვილი მოხვდა. ის თავიდან "ზესტაფონში" თამაშობდა, მერე თბილისის "დინამოში" გადავიდა, ბოლოს კი - "სამტრედიაში". გორგიაშვილს თემურ ქეცბაია ეროვნულ ნაკრებშიც იწვევდა. "ჯვაროსნების" ფორმით მან 4 მატჩიც ჩაატარა.
ბათუმელებს მარტვილის "მერანის" საყრდენი ნახევარმცველისა და ვიცე-კაპიტნის, პაპუნა ფონიავას დამატებაც სურთ. 21 წლის ფონიავა გია ცეცაძის 19-წლამდელთა ნაკრების კანდიდატი გახლდათ. 16 წლის იყო, როცა მალხაზ ჟვანია ენდო და უმაღლეს ლიგაში "მერანის" ფორმით სადებიუტო შეხვედრა ჩაატარა, სულ კი მარტვილელთა შორის უკვე მეოთხე სეზონია, თამაშობს.
შარშან ფონიავათი თბილისის "დინამო", გორის "დილა" და "ზესტაფონი" იყვნენ დაინტერესებულნი, მაგრამ მარტვილელებს ფინანსურ საკითხებზე ვერ შეუთანხმდნენ.
გარდა ამისა, ბათუმელები ცენტრალურ თავდამსხმელსაც ეძებენ. მათ თბილისის "ლოკომოტივის" ბომბარდირის, მამია გავაშელიშვილის (პირველი ლიგის რეგულარულ სეზონში და პლეი ოფის მატჩებში 46 გოლი გაიტანა) აყვანაც სურთ, ეგ არის, "ლოკომოტივის" თავდამსხმელი უცხოეთში წასვლას იმედოვნებს და მისი გადაბირება იოლი არ იქნება.
(იბეჭდება მცირე ცვლილებით)
ყოველდღიური სპორტული გაზეთი "ლელო"