გია გრიგალავა და გიორგი მერებაშვილი "ცხინვალს" ევროპალიგაზე დაეხმარებიან?

გიორგი მერებაშვილი და გია გრიგალავა "ცხინვალში" ვარჯიშობენ. ისე მოხდა, რომ ორივე მათგანი უკლუბოდ დარჩა. 28 წლის მერებაშვილის წინა გუნდი, ბერძნული ოფი, ფინანსური პრობლემების გამო დაიშალა, 25 წლის გრიგალავამ კი მახაჭყალის "ანჟიდან" წამოსვლის შემდეგ ჯერაც ვერ იპოვა სასურველი კლუბი.

ახალგაზრდულ "ცხინვალს" სულ მალე ევროპალიგაზე უწევს ასპარეზობა და, ალბათ, ურიგო არ იქნება, თუ ორი გამოცდილი მოთამაშე გუნდს ამ ტურნირზე დაეხმარება.

მოსალოდნელ ტრანსფერებთან დაკავშირებით, კომენტარი "ცხინვალის" მთავარ მწვრთნელ კახა კაჭარავას ვთხოვეთ:

"ვადასტურებ, რომ მერებაშვილი და გრიგალავა ჩვენი გუნდის შემადგენლობაში ვარჯიშობენ.

"ცხინვალისთვის" ქართული ფეხბურთის ინტერესები უზენაესია და, აქედან გამომდინარე, ყოველთვის მიზნად გვაქვს, დავეხმაროთ იმ მოთამაშეებს, რომლებიც ეროვნული ნაკრებისთვის საინტერესონი არიან.

გრიგალავა და მერებაშვილი ზამთრის სატრანსფერო პაუზის დროსაც ჩვენთან ვარჯიშობდნენ. გიორგი ოფი-ში სწორედ "ცხინვალიდან" წავიდა. უგუნდოდ ყოფნის დროს ჩვენთან ვარჯიშობდა აკაკი ხუბუტიაც... "ცხინვალი" მომავალშიც ყველანაირად დაეხმარება ამ და სხვა ფეხბურთელებს.

რაც შეეხება ევროპალიგას, თუ ეს ფეხბურთელები დაგვეხმარებიან, ძალიან კარგი იქნება", - გვითხრა ცხინვალელთა დამრიგებელმა.

(იბეჭდება მცირე ცვლილებით)
ყოველდღიური სპორტული გაზეთი "ლელო"