ფოთის "კოლხეთის" თავკაცის პოსტზე ზაზა ინაშვილი გელა სანაიამ შეცვალა

ფოტოზე: გელა სანაია და თემურ ბარქაია
ფოთის "კოლხეთში" მთავარი მწვრთნელი შეიცვალა. ზაზა ინაშვილმა პოსტი თავისი ნებით დატოვა. ცხადია, მან ეს ნაბიჯი ცუდი სტარტის გამო გადადგა. 7 ტურის შემდეგ ფოთელებმა მხოლოდ ერთი შეხვედრა მოიგეს, ერთიც ფრედ ითამაშეს და 4 ქულით მე-14 ადგილზე იმყოფებიან.

"ეს გადაწყვეტილება რამდენიმე ტურის წინ მივიღე, როცა ტყიბულში საქართველოს თასის მატჩი მოვიგეთ და შემდეგ ეტაპზე გავედით. მაშინ პოსტზე კლუბის ხელმძღვანელობის თხოვნით დავრჩი, მაგრამ ვითარება ამის შემდეგაც არ შეცვლილა, დიდი იმედების მიუხედავად. ჩვენი პრობლემები უცვლელია, სატურნირო ცხრილშიც საკმაოდ მძიმე მდგომარეობაში აღმოვჩნდით. ამიტომ ჩავთვალე, რომ უკეთესი იქნებოდა, ამ გუნდს სხვა ჩაუდგეს სათავეში", - ამბობს ინაშვილი.

"კოლხეთის" ხელმძღვანელობამ მისი შემცვლელი გუშინ, 8 ოქტომბერს დაასახელა. ეს ამბავი კლუბის დირექტორმა თემურ ბარქაიამ გაგვიმხილა:

"გუნდს გელა სანაია გაწვრთნის. ეს პირადად ჩემი ინიციატივაა. იქიდან გამომდინარე, რომ ახალგაზრდა, ნიჭიერი სპეციალისტია, რაც სხვადასხვა გუნდში მუშაობით დაამტკიცა, არის PRO-ლიცენზიის მფლობელი და მიმაჩნია, რომ აუცილებლად უნდა მისცემოდა უმაღლესი ლიგის გუნდში მუშაობისა და საკუთარი შესაძლებლობის რეალიზაციის შანსი.

ყველამ იცის, რომ ჩვენ დიდად არ გვილხინს. მასზე არჩევანი ამის გამოც შევაჩერეთ, რადგან ის სწორედ ასეთ გუნდებში კარგი მუშაობითაა ცნობილი. მჯერა, სანაია "კოლხეთსაც" გამოიყვანს კრიზისიდან", - ამბობს ბარქაია.

"კოლხეთის" დირექტორი არ მალავს, რომ სანაიასთან ფოთი შერცხვენილი იყო:

"ერთ-ერთი მთავარი ფაქტორი, რის გამოც სანაია მოვიწვიეთ, ესაა: სირცხვილი იყო, რომ ის 2011 წელს ქალაქის მერმა ჩამოიყვანა, კონტრაქტი გაუფორმეს და ჩვენდა სამარცხვინოდ, მხოლოდ ერთი დღე იყო გუნდის მთავარი მწვრთნელი. მაშინ მე კლუბში არ ვმუშაობდი და მიკვირდა, ასე ადამიანთან მოქცევა როგორ შეიძლებოდა?! ახლა კი, მიმაჩნია, რომ სამართლიანობა აღვადგინე და ქალაქს ნამუსი მოვწმინდე".

ბარქაიას თქმით, დიდი სურვილი აქვს, გუნდში ინაშვილიც დარჩეს:

"მისი დამსახურებაა, ფეხბურთში რომ მოვედი, ინტერესი მან გამიჩინა და ინიციატივაც მას ეკუთვნოდა. 2006 წლიდან "კოლხეთის" დაფინანსება დავიწყე. რეგიონული ლიგიდან ერთად მოვდივართ, გუნდი უმაღლეს ლიგაში ორჯერ დავაბრუნეთ.

ზაზა არა მხოლოდ მწვრთნელი, არამედ ჩემი მეგობარია და ასევე იქნება მომავალშიც. მან წასვლისას კომენტარი გააკეთა. მისი უფლებაა, რას იტყვის, მაგრამ გუნდს ახალი სისხლი სჭირდება, ეს თავად და შედეგიდან გამომდინარე, ტაიმ-აუტი აიღო.

კიდევ ერთხელ მადლობა მას გუნდის წინაშე გაწეული შრომისთვის. მას "კოლხეთში" რაიმე პოზიციაზე დარჩენას შევთავაზებ და იმედია, დათანხმდება".

"კოლხეთის" დირექტორი ამბობს, რომ კლუბში ფინანსური პრობლემები გვარდება:

"ფეხბურთელებს მხოლოდ სექტემბრის ხელფასები არ აუღიათ. ვერ ვიტყვი, რომ ფინანსურად ძალიან ცუდად ვართ, მაგრამ ისიც გაცნობიერებული გვაქვს, რომ ამ ბიუჯეტით დეკემბრის ბოლომდე უნდა მივიდეთ".

"ლელომ" კომენტარი ახალ მთავარ მწვრთნელსაც სთხოვა. სანაიამ გვითხრა:

"ჩემთვის მნიშვნელოვანი იყო, ვისთან ვიმუშავებდი და სწორედ ბარქაიას ფაქტორმა განაპირობა "კოლხეთში" ჩემი მისვლა. ამას გარდა, გამიხარდა, რომ სწორედ "კოლხეთში" მიმიწვიეს, რადგან ეს რიგითი კლუბი არ არის.

სასიამოვნოა, რომ ამ ხალხთან, ამ ქალაქსა და ამ გუნდში მომიწევს მუშაობა. მესმის, რომ ახლა არასახარბიელო მდგომარეობაში ვართ, მაგრამ მჯერა, ამ კონტინგენტით პრობლემების დაძლევას მოვახერხებთ".

ფოთის "კოლხეთი" უმაღლეს ლიგას 2014/15 წლების სეზონში დაუბრუნდა. კლუბს ბიუჯეტი არ გაუზარდეს და არსებობა სულ რაღაც 300 ათასი ლარითა და პორტის მხრიდან დაფინანსებით უწევდათ. გარდა ამისა, გუნდი საკუთარ სტადიონზე ვერ თამაშობდა. ამ ურთულესი პირობების მიუხედავად, ინაშვილმა საინტერესო, ანგარიშგასაწევი გუნდის ჩამოყალიბება და მისი ათეულში შეყვანა მოახერხა.

დაიწყო ახალი სეზონი და ფოთელებს კიდევ ერთხელ გაუჩნდათ ილუზია, რომ გასული სეზონის გმირობას დაუფასებდნენ, მაგრამ... ქალაქმა კლუბი კვლავ 300 ათასი ლარის იმედად დატოვა. ზაფხულში მცირედი თანხა გამოუყვეს - მხოლოდ 160 ათასი ლარი, მაგრამ უმაღლესი ლიგის გუნდისთვის ესეც მიზერია.

გულშემატკივრები აღშფოთებულები იყვნენ, უმაღლესი ლიგის კლუბისთვის ამ თანხის გამოყოფა სირცხვილია, მაშინ, როცა 187 ათასად მუსიკალურ სკოლას აფინანსებენ, "კოლხეთმა" ამ ფულზე საერთოდ უარი უნდა თქვას, ეს ქალაქის სირცხვილი იქნებაო...

იმედია, "კოლხეთს" უმაღლესი ლიგიდან გავარდნისთვის ახლა მაინც არ გაიმეტებენ.

(იბეჭდება მცირე ცვლილებით)
ყოველდღიური სპორტული გაზეთი "ლელო"