ლეგიონის უქმეები: დვალიშვილის დუბლი, ჭანტურიას გოლი და ვაკოს პასი [VIDEO]

თითქმის 13 თვის მერე ლადო დვალიშვილმა გაიტანა, თანაც, ორი გოლი. საგოლე პასით გამოირჩა ვაკო ყაზაიშვილი. კვლავ გაიტანა "ემპოლის" დუბლების ფორვარდმა რომან ჭანტურიამ...

საფრანგეთი. ლიგა 1. მე-10 მატჩი "რეიმსის" რიგებში და მე-7 ყვითელი ბარათი (პლუს, ერთი წითელი) - ასეთია ჯაბა კანკავას "მონაგარი". მორიგი გაფრთხილება მან "ნიცასთან" მატჩის (1:1) მიწურულს მიიღო. "მაქსიფუტმა" მას 5,5 ბალი დაუწერა.

"გუნდისთვის სარგებელი მოჰქონდა, მაგრამ რამდენიმე იოლი პასი უზუსტოდ შეასრულა", - წერს გამოცემა.

ინგლისი. ჩემპიონშიფი. "ბრენტფორდი" სტუმრად აკაკი გოგიას გარეშე დაუზავდა "ფულემს" - 2:2.

იტალია. სერია A.

ლევან მჭედლიძე კვლავ ტრავმირებულია, მის გარეშე წარმატებით თამაშობს "ემპოლი".

აი, გუნდის დუბლშემადგენლობაში კი თავი გამოიჩინა რომან ჭანტურიამ, "ემპოლიმ" 3:1 მოუგო "ასკოლის". 46-ე წუთზე რომანმა გაიტანა და ანგარიში 2:1 გახადა. ეს ქართველი ფორვარდის მე-11 გოლია ჩემპიონატში. ჭანტურია 85-ე წუთზე შეცვალეს.

გერმანია. II ბუნდესლიგა. როგორც გერმანული მედია ვარაუდობდა, გიორგი ჭანტურია მწვრთნელმა სათადარიგოთა სკამზე დასვა, "დუისბურგი" კი "კაიზერსლაუტერნს" ესტუმრა და 0:2 დამარცხდა. ჭანტურია თუ სათადარიგო იყო, ლაშა დვალი განაცხადში ვერ მოხვდა.

"ფრაიბურგმა" სტუმრად "ნიურნბერგთან" 1:2 წააგო. ლუკას ჰუფნაგელმა, რომელმაც ახლახან "ფრაიბურგთან" ახალი ხელშეკრულება გააფორმა, მეორე ტაიმი ითამაშა.

III ლიგა. "ვერდერის" დუბლებმა 1:1 ითამაშეს "ჰანზასთან". გიორგი პაპუნაშვილი (გააფრთხილეს) 86-ე წუთზე შეცვალეს.

ჰოლანდია. ერედივიზიე. ქართველთა "ვიტესი" სტუმრად დაუზავდა "ჰერაკლესს". კვლავ ვერ მოხვდა სასტარტო შემადგენლობაში გუნდის კაპიტანი გურამ კაშია, რომელიც ბოლომდე სკამზე დარჩა. ვაკო ყაზაიშვილმა შეუცვლელად ითამაშა და სწორედ მისი პასით რაშიცამ "ვიტესი" მარცხისგან იხსნა.

პორტუგალია. სეგუნდა ლიგა. ავთო ებრალიძის (65-ე წუთზე შეცვალეს) "ჟილ ვისენტემ" 1:0 მოუგო "ავეშს".

გიორგი მაკარიძის "ფეირენშემ" 2:0 იმარჯვა "აკადემიკასთან".

ბელგია. ჟუპილერლიგა. "გენკი" სტუმრად "ვესტერლოს" 0:0 დაუზავდა. ამ შეხვედრაში თორნიკე ოქრიაშვილი სტუმართა რიგებში 66-ე წუთზე გამოჩნდა, ხოლო ლუკა ზარანდია განაცხადში არ ყოფილა.

პროქსიმუსი. ლევან შენგელიას (63-ე წუთზე შევიდა) "ტუბიცე" შინ 2:2 დაუზავდა "ბრიუსელს".

თურქეთი. სუპერლიგა. ნიკა ძალამიძე "რიზეს" განაცხადში არ ყოფილა, მისმა გუნდმა კი "ტრაბზონი" დერბიში 3:0 დაამარცხა.

I ლიგა. ალეკო ამისულაშვილის (90 წუთი) "ქარშიაქა" შინ 0:1 დამარცხდა "მალათიასთან".

პოლონეთი. ექსტრაკლასა. როგორც იქნა, თავი ლადო დვალიშვილმაც შეგვახსენა - შჩეცინში მისმა "პოგონმა" 2:0 დაამარცხა "პოდბესკიძიე" და ორივე გოლი ქართველი ფორვარდის ანგარიშზეა. მან 55-ე წუთზე გახსნა ანგარიში და 77-ე წუთზე დუბლი შეასრულა.

აღსანიშნავია, რომ დვალიშვილმა მხოლოდ მეორე ტაიმი ითამაშა. ეს მისი პირველი გოლებია "პოგონის" მაისურით. ლადომ "მშრალი" სერია მე-13 თვეზე დაასრულა.

ყველაზე ქართული გუნდი "პაფოსი" კი აეკ-თან გასვლაზე 0:3 დამარცხდა. კარში როინ კვასხვაძე იდგა; შეუცვლელად ითამაშეს ნიკოლოზ გელაშვილმა (გააფრთხილეს), გია გრიგალავამ და ლევან ხმალაძემ; 69-ე წუთზე გამოჩნდა ელგუჯა გრიგალაშვილი.

"ანორთოსისმა" სტუმრად 1:0 მოუგო აელ-ს. გიორგი აბურჯანია 62-ე წუთზე შეცვალეს, ხოლო ირაკლი მაისურაძემ (გააფრთხილეს) შეუცვლელად ითამაშა.

უჩა ლობჟანიძე 10 დღით ჩამოშორებულია გუნდს. ამიტომ "ომონიას" მორიგ შეხვედრაში არ უთამაშია.

აზერბაიჯანი. ზაურ სვანაძის "ინტერი" "სუმგაითთან" 2:3 დამარცხდა. "ინტერის" ქართველებიდან მხოლოდ ორმა ითამაშა - ზურაბ ხიზანიშვილმა (შეუცვლელად, გააფრთხილეს) და ლაშა სალუქვაძემ (79-ე წუთზე შეცვალეს). სათადარიგოთა სკამზე ისხდნენ გიორგი ლომაია და ლაშა კასრაძე, ნიკა კვეკვესკირი ტრავმირებულია.

აზალ-მა 1:0 მოუგო "ხაზარს". გამარჯვებულთა რიგებში ნუგზარ კვირტიამ შეუცველად ითამაშა, ხოლო სანდრო გურული 82-ე წუთზე შევიდა.

(იბეჭდება მცირე ცვლილებით)
ყოველდღიური სპორტული გაზეთი "ლელო"