ადრე თუ გვიან, ეს უნდა მომხდარიყო და სწორედ ამ ტურში მოხდა - ჩემპიონატის ფინიშამდე 4 ტურით ადრე საქართველოს ჩემპიონი თბილისის "დინამო" გახდა! - გუნდი, რომლის ტრიუმფსაც, ფაქტობრივად, სეზონის დაწყებიდანვე ვვარაუდობდით. სამწუხაროდ, ჩვენი ჩემპიონატების ისტორიაში ადრეც მომხდარა და მიმდინარე სეზონშიც გამეორდა ისეთი სიტუაცია, ოქროს მედლებისთვის ბრძოლაში "დინამოს" კონკურენტი რომ არ ჰყოლია...
აუცილებელი ფაქტორები
...თუმცა, ამით ნამდვილად არ გვინდა, დავაკნინოთ დინამოელთა მორიგი ტრიუმფი - სლოვაკი სპეციალისტის, იურაი იარაბეკის ხელმძღვანელობით, გუნდმა 3:1 მოუგო "კოლხეთს" და რადგანაც უახლოესმა მდევარმა "სამტრედიამ" დრამატულ "იმერულ დერბიში" ფრე ითამაშა, უფრო ზუსტად რომ ვთქვათ, ეს ინტრიგა არც ყოფილა, რადგან "დინამო" კონკურენტებს აღემატებოდა ფინანსური და საკადრო რესურსითაც. თუმცა, მორიგ და მოსალოდნელ ტრიუმფს რაღაც პეწი აკლდა. ერთი მიზეზი, ალბათ, ისევ და ისევ, კონკურენტების არყოლა იყო, მეორე მიზეზი კი... დინამოელთა სასარგებლოდ დანიშნული "ნორმაზე" მეტი პენალტი შეიძლება დავასახელოთ...
ქართული საკლუბო ფეხბურთის ფლაგმანის საჩემპიონო სეზონს მერე უფრო ვრცლად გამოვეხმაურებით, მანამდე კი მხოლოდ ორ ფაქტორზე გავამახვილებთ ყურადღებას - "საჩემპიონო თამაშში" პირველი ორი გოლი გუნდის საუკეთესო ბომბარდირებმა - გიორგი ქვილითაიამ და ჯაბა ჯიღაურმა გაიტანეს. ფაქტია, ორივე გამორჩეულ სეზონს ატარებს.
კიდევ ერთი და, ალბათ, უმნიშვნელოვანესი ფაქტორი, რაღა თქმა უნდა, 38 წლის ალექსანდრე იაშვილია. "დინამოს" კაპიტანმა ამ საჩემპიონო მატჩში 2 საგოლე პასი გააკეთა. ის 20-წლიანი პაუზის მერე მიიღებს ოქროს მედალს...
ისე, გია გეგუჩაძეც არ უნდა დაგვავიწყდეს: სწორედ ამ მწვრთნელის დიდი დამსახურებაა, თბილისის "დინამო" ზამთრის პაუზას კომფორტული სატურნირო მდგომარეობით რომ შეხვდა.
"საბურთალო" და მარტინი!
გრძელდება "საბურთალოს" მშვენიერი სერია - ესპანელი სპეციალისტის, პაბლო ფრანკო მარტინის ხელმძღვანელობით, "საბურთალომ" უკვე მეშვიდე წაუგებელი მატჩი ჩაატარა! თანაც, ნურც ის დაგვავიწყდება, რომ ამ ახალგაზრდულმა გუნდმა ზედიზედ მეორე მატჩი მოიგო დიდი ანგარიშით და ასევე ზედიზედ მეორე მატჩში გაიტანა 5 გოლი მეტოქის კარში! აღსანიშნავია, რომ "საბურთალომ" ბოლო 2 მატჩი ისეთ გუნდებს მოუგო (თან შთამბეჭდავი ანგარიშებით), რომელთაც ქულები სასიცოცხლოდ სჭირდებოდათ - "გურიას", "მერანს"...
სამართლიანი თამაშის ერთგულები
უკვე ვთქვით "საბურთალოს" ყოჩაღობაზე და საბედნიეროდ, ჩვენს ჩემპიონატში სხვა გუნდებიც არიან, ასევე რომ სამართლიანი თამაშის წესებით აგრძელებენ ასპარეზობას. ადრეც არაერთხელ აღვნიშნეთ, თუ რა ფინანსური თუ საკადრო პრობლემებით დაიწყო "ცხინვალმა" მეორე წრე და უკვე ჩვენც არ გვსიამოვნებს წამდაუწუმ იმის შეხსენება, რომ ზამთრის პაუზის მერე ერთადერთი მოუგებელი გუნდი სწორედ "ცხინვალია".
არადა, პირველი წრის შემდეგ გუნდი ლიდერთა შორის იმყოფებოდა, მაგრამ ჩემპიონატის საუკეთესო ბომბარდირის, ნიკა კაჭარავას სრულფასოვანი კი არა, საერთოდ, მიახლოებითი შეცვლაც ვერ მოხერხდა და ამიტომაც აქვს ამ გუნდს ასეთი ხანგრძლივი მოუგებელი სერია.
და მთავარიც: "ცხინვალს" მიმდინარე სეზონში არანაირი მოტივაცია აღარ დარჩა, მაგრამ კახა კაჭარავას გუნდი ყველა მეტოქესთან ბოლომდე იბრძვის და თავისზე ბევრად კი არა, მართლაც "არანორმალურად" მოტივირებულ მეტოქეებს ქულებს აკარგვინებს!
"საბურთალოსა" და "ცხინვალის" ერთგულება სამართლიანი თამაშის პრინციპებისადმი სხვა გუნდებისათვისაც მისაბაძი უნდა იყოს და სწორედ ფეარ-პლეის წესების დაცვას უნდა მივაკუთვნოთ კიდევ ერთი მაგალითიც - ქუთათურთა გუნდის მთავარი მწვრთნელის პოსტზე გარკვეული პაუზის შემდეგ დაბრუნებული ალექსანდრ შტელინის ხელმძღვანელობით მოასპარეზე "ტორპედომ" ისეთ მეტოქეს ("სიონი") მოუგო, ქულები ძალიან რომ სჭირდებოდა...
ზედიზედ ორი დუბლი!
...როგორც "საბურთალო" აგრძელებს წარმატებულ სვლას, ასევე წარმატებით თამაშობენ ამ გუნდის ახალგაზრდა ლიდერებიც - გუნდის კაპიტანმა, 19 წლის გიორგი ხარაიშვილმა "მერანის" გამოცდილი მეკარის, ზურაბ მამალაძის კარში ისეთი გოლი გაიტანა (საჯარიმოს მისადგომებიდან შესრულებული ეფექტური დარტყმით), თქვენი მოწონებული! აღსანიშნავია, რომ ეს იყო ხარაიშვილის მე-11 გოლი მიმდინარე ჩემპიონატში, რაც დებიუტანტისთვის მართლაც ჩინებული შედეგია.
იმავეს თქმა შეიძლება "საბურთალოს" კიდევ ერთ ნიჭიერ ახალგაზრდაზე: 19 წლის ცენტრფორვარდმა გურამ გოშთელიანმა, ისე, როგორც წინა ტურში, ამჯერადაც დუბლი შეასრულა (ჰეთ-თრიკიც შეეძლო). ზედიზედ ორი დუბლი არ არის იოლი საქმე, ისევე, როგორც არ არის იოლი უმაღლეს ლიგაში სადებიუტო სეზონში 9 გოლის გატანა...
ამ ტურის ყველაზე უხვგოლიან შეხვედრაში ("მერანი"-"საბურთალო") კიდევ ერთმა ფეხბურთელმა შეძლო დუბლის შესრულება: მასპინძელთა 27 წლის ახალწვეულმა ბესიკ ჩიმაკაძემ საქართველოს ჩემპიონატში გოლ(ებ)ი თითქმის ორწლიანი პაუზის მერე გაიტანა.
ეფექტური გოლების ტური
გასული ტური, წინასთან შედარებით, აშკარად მშვიდობიანი გამოდგა, თუ არ ჩავთვლით "გურიასთან" დაკავშირებულ კურიოზულ სიტუაციას (ვგულისხმობთ ლეგიონერების გაპარვას, რასაც დღევანდელ ნომერში სპეციალური წერილი ეძღვნება), განსაკუთრებულად საგანგაშო არაფერი მომხდარა. რაც მთავარია, არც მსაჯები უცემიათ სადმე და არც ფეხბურთელებსა თუ მწვრთნელებს(!) შორის გაჩაღებულა ხელჩართული ჩხუბი... ჰოდა, იმედი დავიტოვოთ, რომ სეზონის ბოლომდე დარჩენილი ოთხი ტურიც (პლუს, თასის საპასუხო ნახევარფინალური მატჩები) ასევე მშვიდობიანად ჩაივლის; იმის იმედიც გვინდა გვქონდეს, რომ ჩემპიონატის ბოლომდე კიდევ ვიხილავთ ისეთივე ეფექტურ გოლებს, როგორებიც უხვად იყო გასულ ტურში.
ეს კი არა, აღარც ვიცით, საიდან დავიწყოთ: "სამტრედიის" 25 წლის უნივერსალმა ფეხბურთელმა გივი იოსელიანმა ტურის ცენტრალურ მატჩში "ჩიხურას" მართლაც ჩინებულ მეკარეს, დინო ჰამზიჩს იშვიათი სილამაზის გოლი გაუტანა შორეული დარტყმით.
გიორგი ხარაიშვილის გოლზე ზემოთ ვისაუბრეთ და არც "დილას" გოლები უნდა გამოგვრჩეს: 21 წლის ლევან ნონიკაშვილმა ფლანგიდან ჩაწოდებული ბურთი მკერდზე მიიღო და მეორე შეხებით აუღებელი დაურტყა "საპოვნელას" გამოცდილ მეკარეს, გიორგი სომხიშვილს.
ეს უკანასკნელი პირველი გოლის დროსაც უძლური იყო, რაიმე ეღონა: ირაკლი მოდებაძემ შორეული და ზუსტი პასით მეტოქის საჯარიმოში შეჭრილი თეიმურაზ ღონღაძე მოძებნა და "დილას" მარჯვენა მცველმაც ეფექტური თავური დარტყმით მიმდინარე სეზონში მეორე გოლი გაიტანა.
ამ კომბინაციაში უცნაური ის იყო, რომ მოდებაძემ და ღონღაძემ "როლები" გაცვალეს, თუმცა წინა სეზონის საუკეთესო ფეხბურთელმა ("ლელოს" ვერსიით) და საუკეთესო ბომბარდირმა ირაკლი მოდებაძემ მატჩის მიწურულს "თავისი" გოლი მაინც გაიტანა.
კიდევ ერთი გოლის აღნიშვნა გვინდა, მით უფრო, რომ სწორედ ამ ზუსტი დარტყმის მერე გაირკვა მიმდინარე სეზონის ტრიუმფატორის ვინაობა: თბილისის "დინამოს" ბრაზილიელმა ცენტრალურმა მცველმა რენე ფერეირამ საკუთარ ნახევარზე ჯერ ერთ მეტოქეს აართვა ბურთი, შემდეგ ეფექტური ფინტით მეორე მეტოქეს გასცდა და ისეთი რეიდი განახორციელა, ბევრ შემტევს რომ შეშურდებოდა!
თუმცა, გაგრძელებაც მშვენიერი ჰქონდა ამ კონტრშეტევას: რენე ფერეირამ ბურთი მარცხენა ფლანგზე მყოფ ალექსანდრე იაშვილს გადააწოდა, ამ უკანასკნელის გამჭოლი გადაცემა კი გოლად დინამოელთა ბრაზილიელმა მცველმა აქცია.
დაბოლოს, ამ ტურის კიდევ ერთ ეპიზოდზეც და იმ შემთხვევაში რომ გოლი გასულიყო, აი, ის კი ნამდვილად იქნებოდა ამ სეზონის, უდავოდ, საუკეთესო გოლი, მაგრამ "საპოვნელას" გამოცდილ კაპიტანს, დავით ოდიკაძეს სულ ცოტა დააკლდა!
ყველაფერი კი ასე მოხდა - "დილამ" მეორე გოლი გაიტანა და "საპოვნელაც" ცენტრიდან იწყებდა თამაშს. ჰოდა, სწორედ მოედნის ცენტრიდან ურტყამდა "ოდო", მაგრამ ბურთი მასპინძელთა კარის ბადეს ზემოდან დაეცა...
ყოჩაღი შემცვლელები და სადებიუტო გოლები
ლევან ნონიკაშვილისა და გივი იოსელიანის ეფექტურ გოლებზე ზემოთ უკვე ვისაუბრეთ, ოღონდ ის კი არ გვითქვამს, რომ ორივემ შეცვლაზე შემოსულმა შეძლო თავის გამოჩენა. ასევე შეცვლაზე შევიდნენ და გოლები გაიტანეს 23 წლის მერაბ ურიდიამ ("შუქურა") და 22 წლის რატი ცაცკრიალაშვილმა ("საბურთალო"). იმის მიუხედავად, რომ სულ მალე სეზონი დასრულდება, თითქმის ყოველ ტურში გვიწევს იმის აღნიშვნა, რომ ამა თუ იმ გუნდის შემადგენლობაში კიდევ ერთი ლეგიონერი გამოჩნდა.
ასე იყო ამ ტურშიც: "კოლხეთის" 26 წლის ახალწვეულმა ვლადიმირ კორობკამ (უკრაინა) საქართველოს ჩემპიონატში სადებიუტო მატჩი ჩაატარა. აი, "საბურთალოს" 19 წლის ნახევარმცველმა ირაკლი რუხაძემ კი უმაღლეს ლიგაში სადებიუტო გოლი გაიტანა.
აქვე, კიდევ ორ ფეხბურთელზე, გასულ ტურში რომ გამოიჩინეს თავი: "ზუგდიდის" 28 წლის ნახევარმცველმა ვალიკო ტყემალაძემ უმაღლეს ლიგაში გოლი ორწლიანი პაუზის მერე გაიტანა, ხოლო "შუქურას" 24 წლის ნახევარმცველმა თორნიკე თარხნიშვილმა აჭარულ დერბიში სულაც ოთხწლიანი პაუზის მერე გაიტანა გოლი...
ყოველდღიური სპორტული გაზეთი "ლელო"
მაშინ აქ ისწავლე და უფასოდ.
16 უმაღლესი ლიგის გუნდიდან რჩება 10,ესე იგი 6 მოიჭრა,18 პირველი ლიგის გუნიდან იჭრება კიდევ 8, რადგან იქანაც 10 გუნდიანი იქნება, ჯამში თოთხმეტი
ამ თოთხმეტ კლუბზე მინიმუმ მიბმული არის 400 მდე 18 წლისა და უფროსი ფეხბურთელი.იმათმა რომ ფეხბრუთში მოვიდნენ რაღაცის გეზი ხომ ჰქონდათ აღებული?ყველა მათ პერსპექტივა ორმაგად და მეტად შეუმცირდათ
ინფრასტრუქტურას რომ იძახი, თუკი ფიფიას მსახურს კობიაშვილს და დათო მუჯირს სურდათ წესიერი პროგრამა, პირობები უნდა იყოს ყველასათვის თანაბარი სასტარტო და არა ბობოლებზე გათვლილი.მე უკვე დავწერე თუ რამდენ მინდორს დააგებს ჩემპიონზე გაცემული პრიზი და რამდენი ასეული ბავშვი წესიერად ეზიარება ფეხბრუთს, ეს უკვე არის პირველი ნაბიჯი. მაგრამ უპირველესი ნაბიჯი იყო რომ გამოეცხადებინათ ამ პრორგამის ფარგლებში ტენდერ-კონკურსი თანასპონსორობაზე არა მარტო ქვეყნის შიგნით არამედ მის გარეთაც და თუკი 1 წელიწადში კლუბების მენეჯმენტები ვერ მონახავდნენ თანასპონსორებს ან ახალ მფლობელებს, მერე დაექვეითებინათ დაბალ ლიაგაში.
მაგრამ უმთავრესი აქ იყო ყველა სახელმწიფო კლუბის ღია სააქციო საზოგადოებად გადაქცევა რომ ვისაც რამდენი სურს და შეეძლება იმდენი იყიდოს კლუბის აქცია. მაგრამ ესეც არ გააკეთეს,რადგან სახელწმფიო ფულზე მომჯდარ ტიპებს წილებში არ უდნათ ვინმე ჩაუსვან,ან პასუხის მომთხოვნი გაუჩნდენნ. სფფ საერთოდ არანაირ გაანგარიშებებს და წერილებს არ პასუხობს,რადგან მათი მიზანია 4-5 ბობოლა კლუბის გაკეთება, მათი მომსახურება და იმის იქეთ თუნდაც წარღვნა ყოფილა. დაინახავთ უახლოეს 2 წელიწადში რამდენი ასეული ახალგაზრდა უკვე სრულასაკოვანი ჩამოშორდება ფეხბურთს, ამ ფეხბურთის მკვლელი პროგრამის გამო