ჯერ კიდევ მატჩის დაწყებამდე მასპინძლებს დამატებითი სტიმული გაუჩნდათ: გამარჯვების შემთხვევაში, სულ მცირე, ერთი კვირით სატურნირო ცხრილის სათავეში მოექცეოდნენ. შესაძლოა, ამ ფსიქოლოგიურ წნეხსაც დავაბრალოთ ის ფაქტი, რომ "ოლიმპს" ერთობ გაუჭირდა მეორე ეტაპის გამარჯვებით დაწყება; თუმცა ნურც სტუმრებს დავუკარგავთ გარჯას: "ვიტ ჯორჯიამ" გუშინ სავსებით ღირსეულად იასპარეზა და უფრო გამოუცდელობის გამოც იყო, რუსთავიდან, სულ მცირე, ქულაც რომ ვერ წაიღეს.მეტოქეებმა ამ სეზონში უკვე მეოთხედ ითამაშეს და წინა სამი დაპირისპირება (ორი-ჩემპიონატზე, ერთიც-სუპერთასზე) რუსთაველთა გუნდის გამარჯვებით დამთავრდა. ისიც საინტერესო ფაქტია, რომ "ვეტერინართა" მთავარ მწვრთნელ მერაბ
დისკვალიფიცირებული გიორგი რეხვიაშვილის არყოფნაში დაცვის ცენტრში რევაზ ქემოკლიძის გამოჩენა თუ ჩვეულებრივ ფაქტად აღვიქვით, ამას ნამდვილად ვერ ვიტყვით ამპლუაშეცვლილ ლაშა ჯაფარიძესა და დენის დობროვოლსკიზე: პირველი მისთვის უჩვეულო, დაცვის მარჯვენა ფლანგზე ვიხილეთ, "ნომინალური" საყრდენი დობროვოლსკი კი - მარცხენა მცველის პოზიციაზე ასპარეზობდა. "ოლიმპის" ახალწვეულთაგან ძირითადში ორი ფეხბურთელი გამოჩნდა: ირაკლი მაისურაძე და ვაკო ტყემალაძე. "ვიტ ჯორჯიას" შემადგენლობა კი ამ ეტაპისთვის ოპტიმალური იყო, ამასთან, ინტერესს იწვევდა ის, თუ როგორ იასპარეზებდნენ "ვეტერინარები" აწ უკვე ყოფილი ორი ლიდერის (ჯაბა ლიპარტია, ირაკლი კლიმიაშვილი) გარეშე. ყოველ შემთხვევაში, ახალგაზრდულ "ვიტ ჯორჯიას" პირველ ტაიმში ურიგოდ ნამდვილად არ უთამაშია: გუნდი დაცვაში არ ჩამჯდარა, მეტოქეს ტემპშიც აჰყვა და, რაც მთავარია, საკუთარ კარში მიღებული კურიოზული გოლის შემდეგ ანგარიში მალევე გაათანაბრა.
ისე, ამინდიც უნდა ვახსენოთ: ძლიერი ქარი მთელი მატჩის განმავლობაში ხელს უშლიდა ორივე გუნდის ფეხბურთელებს, ეგ კი არა, პირველ გოლშიც ქარის "დადანაშაულებაც" შეიძლება: დავით ბოლქვაძემ მარცხენა ფლანგიდან, "უწყინარი" საჯარიმო შეასრულა, მაგრამ არდალიონ მიქაბერიძე გამოსვლაზე შეცდა და მეტოქის ფორვარდთან და თანაგუნდელთან ორთაბრძოლისას ბურთი საკუთარ კარში აეჭრა!
"ვეტერინარებს" დიდი დრო არ დასჭირვებიათ ანგარიშის გასათანაბრებლად: შეტევა გიორგი ჯანელიძემ (მატჩის ერთ-ერთმა გამორჩეულმა ფეხბურთელმა) წამოიწყო, ეფექტური პასით გიორგი კორიფაძე მასპინძელთა მეკარესთან პირისპირ დატოვა, თუმცა გრიგოლ ბედიაშვილმა იყოჩაღა და მეტოქეს გოლის გატანა არ დაანება, მაგრამ "ოლიმპის" მცველებმა იმ მომენტში სრული უყურადღებობა გამოიჩინეს და მასპინძელთა კარის სიახლოვეს ეულად მდგომ ბესიკ ჩიმაკაძეს ზუსტად დარტყმა არ გასჭირვებია - 1:1.
პირველი ტაიმის ბოლომდე დასამახსოვრებელი არაფერი მომხდარა, გარდა ერთი ეპიზოდისა: რევაზ გეწაძის ფლანგური გადაცემის შემდეგ ირაკლი მოდებაძე ეფექტური თავურით ცდილობდა გატანას, მაგრამ "ოლიმპის" ცენტრფორვარდის დარტყმა ოდნავ არაზუსტი გამოდგა.
მეორე ტაიმი, მოულოდნელად, სტუმართა აქტიურობით დაიწყო. საწყისი 15 წუთი "ვიტ ჯორჯიას" მათი უპირატესობით წარიმართა (ქარის მიმართულებაც "ეხმარებოდა") და დროის ამ მონაკვეთში, სულ მცირე, სამჯერ შეეძლოთ უჩვეულოდ პასიური მასპინძლების დასჯა. თუმცა გურამ ადამაძის, გიორგი კორიფაძისა და ბესიკ ჩიმაკაძის მცდელობებს შედეგი არ მოჰყოლია. აი, "ოლიმპმა" კი პირველი მეტ-ნაკლებად სახიფათო მომენტი 71-ე წუთზე შექმნა: თამაშში აქტიურად ჩართული გიორგი ქავთარაძის პასით ირაკლი მოდებაძემ ვერ იხეირა. ექვს წუთში კი მასპინძელთა ლამაზი კომბინაცია ვიხილეთ: საგოლე შეტევა ქავთარაძემ წამოიწყო, დავით ბოლქვაძემ გააგრძელა და ირაკლი მოდებაძემ ახლო მანძილიდან თავისიანები დააწინაურა.
ამის შემდეგ განსაკუთრებული არაფერი მომხდარა, თუ არ ჩავთვლით ჯანელიძე-ჩიმაკაძის კომბინაციას, როცა სტუმართა ცენტრფორვარდს ამ მატჩში "დუბლის" შესრულება შეეძლო. სხვათა შორის, ამ ეპიზოდს ორივე გუნდის ფეხბურთელთა შორის მცირე გაწევ-გამოწევა მოჰყვა: მასპინძელთა აზრით, "ვეტერინარებმა" "ფეარ პლეის" წესი დაარღვიეს.
ასეა თუ ისე, საკმაოდ მძიმე ორთაბრძოლაში "ოლიამპმა" უმნიშვნელოვანესი 3 ქულა მოიპოვა; ეს კი იმას ნიშნავს, რომ კვირის ბოლომდე ცხრილს ახალი ლიდერი ეყოლება - მოქმედი ჩემპიონი რუსთავის "ოლიმპი". ოღონდ, თორნიკე მაისურაძის შეგირდებს მომდევნო მატჩებში აშკარად "სხვანაირად" თამაში მართებთ - "ოლიმპს" ხომ ზედიზედ სამი ურთულესი შეხვედრა ("ტორპედოსთან", "დინამოსთან", "ზესტაფონთან") ელის.
ოლიმპი-ვიტ ჯორჯია 2:1
13.02. რუსთავი. ფოლადი. 700 მაყურებელი
1:0 ა. მიქაბერიძე (22, საკუთარ კარში), 1:1 ჩიმაკაძე (25), 2:1 მოდებაძე (77, ბოლქვაძის პასით)
ოლიმპი ვიტ ჯორჯია
4-2-3-1 4-3-2-1
ბედიაშვილი ა. მიქაბერიძე
ჯაფარიძე ბეჭვაია
კვახაძე ადამაძე
ქემოკლიძე კასრაძე
დობროვოლსკი ღანიაშვილი
რაზმაძე ვასაძე
ტყემალაძე მაისაშვილი
ი. მაისურაძე გურ. გურეშიძე
დ. ბოლქვაძე კორიფაძე
გეწაძე ჯანელიძე
მოდებაძე ჩიმაკაძე
მწვრთნელი მწვრთნელი
თ. მაისურაძე მ. კოჭლაშვილი
ოლიმპი
46. ქავთარაძე-ტყემალაძე
87. გ. ჭელიძე-გეწაძე
89. გორდეზიანი-ბოლქვაძე
სათადარიგოები: ბათიაშვილი, ბახტაძე, მურველაშვილი, ჯ. უგულავა
ვიტ ჯორჯია
73. როსტიაშვილი-ჩიმაკაძე
77. ზაქრაძე-გურეშიძე
სათადარიგოები: ძაძამია, ჭანკვეტაძე, დვალაშვილი, გოგიაშვილი, გიორგი გურეშიძე
გაფრთხილება: ჩიმაკაძე (12), ადამაძე (27), მოდებაძე (49), კვახაძე (64), ბოლქვაძე (71), ვასაძე (85).
არბიტრი: თ. გვანცელაძე (სამტრედია)
