თბილისის "ლოკომოტივის" განცხადება კიევი-თბილისის რეისზე მომხდარ ფაქტთან დაკავშირებით

თბილისის "ლოკომოტივმა" კიევი-თბილისის რეისზე მომხდარ ფაქტთან დაკავშირებით განცხადება გაავრცელა.

ჟურნალისტ გელა მთივლიშვილის გადმოცემით, კიევი-თბილისის ავიარეისზე, რამდენიმე ჟურნალისტთან ერთად მგზავრობისას, "ლოკომოტივის" ფეხბურთელებიც იყვნენ, რომლებსაც მენეჯმენტის წარმომადგენლები ახლდნენ. ჟურნალისტის თქმით, ეს წარმომადგენლები თვითმფრინავში არაფხიზელ მდგომარეობაში ავიდნენ და 3 საათის განმავლობაში იქ მყოფ მგზავრებს ხმამაღლა აგინებდნენ.

ამ ორიდან ერთ-ერთმა რამდენიმე ფეხბურთელს წამოარტყა თავში, რითაც მგზავრების გადაჭარბებული ყურადღება კიდევ უფრო მეტად მიიქცია, რამდენიმე ფეხბურთელი კი აგრესიულად დაამცირა კიდეც. მისი თქმით, თვითმფრინავის დაჯდომისას, როგორც კი პოლიციელები გამოჩნდნენ, არაფხიზელ მდგომარეობაში მყოფმა პირებმა მათი გინება დაიწყეს.

ამ ყველაფერს კლუბმა დღეს შემდეგი განცხადებით უპასუხა: "მას შემდეგ, რაც სოციალური ქსელში გავრცელდა ინფორმაცია, კიევი-თბილისის რეისზე მომხდარი უსიამოვნო ფაქტის შესახებ, კლუბში მიმდინარეობს მოკვლევა. ჩვენ მზად ვართ, მივიღოთ შესაბამისი ზომები მათ მიმართ, ვინც კლუბის სახელით შეაწუხა და შეურაცხყოფა მიაყენა სხვა მგზავრებს.

თბილისის "ლოკომოტივი" ყოველ მათგანს ბოდიშს უხდის მომხდარის გამო და იმედს იტოვებს, რომ მსგავსი ფაქტი აღარ განმეორდება. მადლობა ყველას, გამოჩენილი ყურადღებისთვის", - ნათქვამია განცხადებაში.