ტორპედო-ცხინვალი 3:1 - სამქულიანი დებიუტი [VIDEO]

"ტორპედო" "ცხინვალთან" შეხვედრას ძალიან მძიმე სატურნირო მდგომარეობით ხვდებოდა. ქუთაისელები "თეთრ ჯგუფში" ბოლო ადგილზე იმყოფებოდნენ და უკან დასახევი გზა მოჭრილი ჰქონდათ. მორიგი ფიასკოს შემთხვევაში, "ტორპედო" აუტსაიდერობას კიდევ უფრო "გაიმყარებდა".

თუმცა, ქუთაისელთა სასიხარულოდ, გუნდის ახალმა მთავარმა მწვრთნელმა კახა ჩხეტიანმა შეძლო "ტორპედოს" ათამაშება, მის ხელთ არსებული რესურსის ბოლომდე გამოყენება და "ცხინვალთან" ჰაერივით საჭირო გამარჯვების მოპოვება. თანაც, ქუთაისელებმა საკმაოდ სწრაფი, კომბინაციური და სანახაობრივი ფეხბურთი აჩვენეს, განსაკუთრებით მატჩის მეორე ნახევარში, როცა მათ გააზრებულ შეტევებს სტუმრებმა ვეღარაფერი დაუპირისპირეს...

არადა, მატჩის დასაწყისი "ტორპედოს" კარგს არაფერს უქადდა. როგორც თამაშის შემდეგ გუნდის ახალმა მწვრთნელმა კახა ჩხეტიანმა აღნიშნა, შეხვედრის მნიშვნელობიდან გამომდინარე, მასპინძლები ფსიქოლოგიური წნეხის ქვეშ იმყოფებოდნენ და ამან დებიუტში მათზე უარყოფითად იმოქმედა.

შესაძლოა ამიტომაც, ტორპედოელები ბევრს სცოდავდნენ, სტუმრები კი პირიქით, ყოველგვარი რიდის გარეშე, აქტიურად უტევდნენ მეტოქის კარს. სხვათა შორის, მათი მთავარი მწვრთნელი კახა კაჭარავა დისკვალიფიკაციის გამო თამაშს სტუმართა ლოჟიდან ადევნებდა თვალს...

მე-5 წუთზე ლაშა ქოჩლაძის უძლიერესი დარტყმის შემდეგ როინ კვასხვაძემ საკუთარი გუნდი ხარიხის დახმარებით გადაარჩინა. თუმცა, ამ ეპიზოდიდან ერთი წუთიც არ იყო გასული, რომ ცხინვალელებმა სწრაფი გოლის გატანა მაინც მოახერხეს. კუთხურის შემდეგ ტორპედოელთა კართან არეულობა შეიქმნა, დაცვის შეცდომით გიორგი კახელიშვილმა ისარგებლა და ბაქარ ქარდავას გადაცემის შემდეგ საჯარიმოს შიგნიდან კვასხვაძეს აუღებელი დაურტყა.

ქუთაისელთა სასახელოდ უნდა ითქვას, რომ გაშვებულმა გოლმა ისინი არ დააბნია. პირიქით, ამის შემდეგ "ტორპედო" გააქტიურდა და მეტოქეს დიდი ძალებით შეუტია. თავიდან მასპინძლებმა შორეული დარტყმებით სცადეს ბედი, თუმცა გუგა ფალავანდიშვილისა და გიორგი გურულის მცდელობები არაზუსტი გამოდგა.

მომდევნო ეპიზოდისას ქუთაისელთა სწრაფ და ეფექტურ კომბინაციას ოთარ კვერნაძე აგვირგვინებდა, მაგრამ სუსტად მოარტყა ბურთს ფეხი და გიორგი ნადირაძეს არ გასჭირვებია ბურთის მოგერიება.

სტუმრებს სულ უფრო უჭირდათ აქტიურად მოთამაშე ქუთაისელებთან გამკლავება და უხეშობას ხშირად მიმართავდნენ. მატჩის სირიელმა არბიტრმა აბდულა ბასლეჰლომ დროის მცირე მონაკვეთში სტუმრებს ავტომატის ჯერივით "დააყარა" ყვითელი ბარათები (4 ყვითელი ბარათი 7 წუთში), რამაც მათი დაშოშმინება გამოიწვია.

ტორპედოელები კი შეტევებს განაგრძობდნენ და მიზანთანაც ახლოს იყვნენ. გრიგოლ დოლიძემ მარჯვენა ფლანგზე გაილაღა და ბურთი კარის გასწვრივ დაარტყა, ერთ-ერთმა ცხინვალელმა კი ის საკუთარი კარისკენ ჩაჭრა, თითქოს კარის ხაზიც გადაიკვეთა ჰაერში და და მხოლოდ ამის შემდეგ შეძლეს სტუმრებმა ბურთის მოგერიება, ტორპედოელები გოლს ითხოვდნენ, თუმცა არბიტრმა თამაშის გაგრძელება ბრძანა.

მასპინძელთა მონდომებამ შედეგი მაინც გამოიღო. მათი აქტიური პრესინგის შედეგად სტუმრებმა საკუთარი საჯარიმოს მისადგომებთან დაკარგეს ბურთი, რომელიც ბექა ტუღუშმა მოიგდო და დაახლოებით 22 მეტრიდან ნადირაძეს აუღებელი დაურტყა.

მეორე ნახევარში "ტორპედო" კიდევ უფრო გააქტიურდა. ქუთაისელებს ახალი სუნთქვა გაეხსნათ და მოედანზე ყველაფერი გამოსდიოდათ. მასპინძლები საგოლე მომენტებსაც ხშირად ქმნიდნენ. დოლიძისა და ფალავანდიშვილის სახიფათო დარტყმებს სიზუსტე დააკლდათ.

სამაგიეროდ, მეკარე კვასხვაძის მიერ საკუთარი საჯარიმოდან გიორგი გურულის მისამართით გაკეთებული გადაცემა გამოდგა სნაიპერული სიზუსტის. ამ ეპიზოდში გურულიც კარგად გაისარჯა, საგოლე ალღო გამოავლინა და წინ გამოსულ მეკარეს თავური დარტყმით ბურთი ზემოდან გადაავლო - 2:1.

ჩხეტიანს შეცვლამაც გაუმართლა, კვერნაძის ნაცვლად მოედანზე შესულმა თორნიკე კაპანაძემ ქუთაისელთა შეტევებს სიმწვავე კიდევ უფრო შემატა და რაც მთავარია, გოლიც გაიტანა. ქიმაძის ფლანგური გადაცემის შემდეგ "ელვამ" ნადირაძეს ახლო მანძილიდან შანსი არ დაუტოვა.

დარჩენილ დროში ქუთაისელებს ანგარიშის გაზრდის არაერთი შანსი ჰქონდათ. მიზანთან ახლოს იყვნენ შოთა ბაბუნაშვილი, დოლიძე და კაპანაძე, მაგრამ დამაგვირგვინებელ ფაზაში არ უმართლებდათ.

თავის მხრივ, სტუმრებსაც ჰქონდათ გოლის გატანის შესანიშნავი შესაძლებლობა - ცხინვალელთა სწრაფ შეტევას ჯაბა დვალი ეფექტური დარტყმით აგვირგვინებდა, თუმცა კვასხვაძემ არანაკლებ ეფექტურად ითამაშა და ძალიან რთული ბურთი მოიგერია.

მოკლედ, "ტორპედომ" ჩემპიონატში პირველი გამარჯვება მოიპოვა და მოედანი გულშემატკივართა აპლოდისმენტების თანხლებით დატოვა.

საქართველოს ჩემპიონატი. უმაღლესი ლიგა. VI ტური. თეთრი ჯგუფი
17.09. ქუთაისი. რამაზ შენგელია
ტორპედო-ცხინვალი 3:1
გოლები: 0:1 კახელიშვილი (6. ქარდავას პასით), 1:1 ტუღუში (41), 2:1 გურული (66. რ. კვასხვაძის პასით), 3:1 კაპანაძე (70. ქიმაძის პასით)
ტორპედო: კვასხვაძე, ტაბატაძე, გურული, ჭიჭინაძე, ქიმაძე, მამასახლისი, ფალავანდიშვილი, დოლიძე, ბაბუნაშვილი (73. საღრიშვილი), ტუღუში (76. ენდელაძე), კვერნაძე (57. კაპანაძე).
სათადარიგონი: მ. ქვილითაია, კოლინი, ნერგაძე, ბენაშვილი
მწვრთნელი: კახა ჩხეტიანი
ცხინვალი: ნადირაძე, ცერცვაძე, კაჭკაჭიშვილი, მაისაშვილი, ბაჩიაშვილი, ქარდავა, სულთანიშვილი (19. შინდაგორიძე), კახელიშვილი (81. მაქაცარია), ქოჩლაძე (72. გაბრიჩიძე), მახარობლიძე, დვალი.
სათადარიგონი: კერესელიძე, ფირცხალავა, გელაშვილი, ტორჩინავა
მწვრთნელი: გოჩა ჩიქოვანი
გაფრთხილება: მახარობლიძე (25), ქოჩლაძე (29), ცერცვაძე (31), კახელიშვილი (32), მამასახლისი (90)
არბიტრი: ა. ბასლეჰლო.

მომდევნო ტური
თეთრი ჯგუფი
25 სექტემბერი
ცხინვალი-ჩიხურა
შუქურა-ლოკომოტივი
დინამო (თბ)-ტორპედო
გურია ისვენებს

წითელი ჯგუფი
24 სექტემბერი
საბურთალო-დინამო (ბთ)

25 სექტემბერი
სამტრედია-ზუგდიდი
კოლხეთი-დილა
სიონი ისვენებს

ბომბარდირები
ს. ლობჟანიძე (ჩიხურა) 6
თ. შონია (დინამო ბთ) 5
ჯ. დვალი (ცხინვალი) 4
ბ. ზივზივაძე (სამტრედია) 4.

(იბეჭდება მცირე ცვლილებით)
ყოველდღიური სპორტული გაზეთი "ლელო"