არცთუ სასიამოვნო ამბით უნდა დავიწყოთ: ქუთასში მძვინვარე რამდენიმედღიან ქარიშხალს უკვალოდ არ ჩაუვლია და სტადიონზე მისულებს აგრერიგად რეკლამირებული ქუთაისური არენის სახურავი სანახევროდ გადახდილი დაგვიხვდა... მცირე ნიავის მიუხედავად, აქა-იქ საყრდენი ბოძებიც ირყეოდა... გუნდის ადმინისტარციის რჩევით პრესლოჟას, სადაც, რაიმე მძიმე საგნის ჩამოვარდნის ალბათობა იყო, თავი ავარიდეთ და საკომენტატორო ჯიხურს შევეხიზნეთ. ზუგდიდის "ბაიასთან" მარცხის შემდეგ ქუთაისურ კლუბს უკან დასახევი გზა მოჭრილი ჰქონდა. თუ რიონისპირელებს ჩემპიონატში რაიმე ამბიცია კიდევ აქვთ, საკუთარ მოედანზე "კოლხეთი" აუცილებლად უნდა დაემარცხებინათ და საბოლოოდ მოახერხეს კიდეც სამი ქულის მოპოვება, მაგრამ ქუთაისელთა
მატჩის დებიუტმა, მოულოდნელად, სტუმრების აქტიურობით ჩაიარა და ფოთელებს დამაგვირგვინებელ ფაზაში მეტი ყურადღება რომ გამოეჩინათ, დაწინაურდებოდნენ კიდეც.
პირველსავე წუთზე ინწკირველის ჩაწოდების შემდეგ გოგონაია თავით ურტყამდა და მდგომარეობა მეკარემ განმუხტა. საერთოდაც, ფოთელთაგან გოგონაია ძალზედ აქტიური იყო და მეტოქის მცველებს ბევრ პრობლემებს უქმნიდა. მალევე მან ძლიერად დაარტყა და მცირედით ააცილა. ქუთათურებს თამაშის დალაგება და გააზრებული კომბინაციების გათამაშება უჭირდათ, სტუმრები კი ამასობაში კვლავ სახიფათოდ უტევდნენ. მე-17 წუთზე ინწკირველის ჯარიმის შემდეგ კვერენჩხილაძე ხელსაყრელი პოზიციიდან შემობრუნებით ურტყამდა, მაგრამ ბურთზე ფეხი ააცილა, მეორე ცდაზე კი დაარტყა, მაგრამ მეკარემ კუთხურზე მოიგერია.
როგორც ხედავთ, ფოთელები გაცილებით მწვავედ უტევდნენ, არადა გოლი ტორპედოელებმა გაიტანეს - 23-ე წუთზე გამოცდილმა მეგრელაძემ ჯარიმა მოინადირა და ოსტატურადაც შეასრულა - 1:0 ამგვარად აღნიშნა მან მრავალწლიანი პაუზის შემდეგ ქუთაისურ არენაზე დაბრუნება.
მატჩის მეორე ნახევარი კიდევ უფრო მოსაწყენი გამოდგა: ბურთი ძირითადად მოედნის ცენტრში გორავდა და სახიფათო მომენტები იშვიათად იქმნებოდა.
47-წუთზე ლევან მდივნიშვილმა ქუთაისელთა კართან ახლოს მკერდით მიიღო ბურთი, მაგრამ დარტყმა სუსტი გამოუვიდა. ამის შემდეგ მეგრელაძემ ზედიზედ ორი საჯარიმო დარტყმა შეასრულა, თუმცა ძაგანიას აღარ გასჭირვებია მათი მოგერიება. მატჩი ისე მიიწურა, რომ რეალური სახიფატო მომენტი აღარ შექმნილა. თუმცა, ორი დასამახსოვრებელი ეპიზოდი მაინც იყო - 70-ე წუთზე გურულის ჩაწოდების შემდეგ ქუთაისელები თვლიდნენ, რომ მცველმა ხელით გამოიტანა ბურთი და პენალტს ითხოვდნენ, მაგრამ კრიჭაშვილმა წესების დარღვევა არ დააფიქსირა. 77-ე წუთზე კი ძაგანიას შეცდომის შემდეგ ბაკურაძეს შეეძლო ეხეირა, მაგრამ კუთხე მახვილი იყო და მის დარტყმულს ისევ ძაგანია გადაეღობა. მართალია, "ტორპედომ" მეტად საჭირო გამარჯვება მოიპოვა, მაგრამ მისი შესაძლებლობისა და ამბიციების გუნდი უკეთეს ფეხბურთს უნდა თამაშობდეს.
ქუთაისი. ცენტრალური. 2000 მაყურებელი
ტორპედო-კოლხეთი 1:0
გოლები: 1:0 მეგრელაძე (23)
ტორპედო კოლხეთი
4-4-2 4-5-1
მიგინეიშვილი ძაგანია
სეთურიძე ცხვიტარია
მაჭავარიანი მახვილაძე
თოდუა ინწკირველი
გურული მეგრელიშვილი
დოლიძე კვერენჩხილაძე
დიღმელაშვილი გოგონაია
ქებაძე გავაშელიშვილი
დათუნაიშვილი გვალია
მეგრელაძე სიჭინავა
გოცირიძე მდივნიშვილი
მწვრთნელი მწვრთნელი:
გ. გიგატაძე ბ. შეროზია
ტირპედო
55. ქებაძე - გიგაური
59. დოლიძე - ბაკურაძე
70. გოცირიძე - საბანაძე
სათადარიგოები: ქვილითაია, ფარულავა, კირკიტაძე, ფოფხაძე
კოლხეთი
75. სიჭინავა - გულუა
75. მდივნიშვილი - მოისწრაფიშვილი
87. გოგონაია - გელაჭეიშვილი
სათადარიგოები: ლობჟანიძე, ქორჩილავა, ბარამიძე, წიქარიშვილი
გაფრთხილება: დათუნაიშვილი (68), გოგონაია (79)
არბიტრი: ა. კრიჭაშვილი (თბილისი)
