დინამო (თბ)-საბურთალო 1:0 - ევროპის გზა გორზე გადის [VIDEO]

1993 წლის შემდეგ, რაც ქართულ გუნდებს დამოუკიდებელი საქართველოს სახელით ევროტურნირებზე ასპარეზობის უფლება დართეს, მხოლოდ ერთხელ (2012) მოხდა, თბილისის "დინამომ" ევროტურნირების საგზური რომ ვერ მოიპოვა. ახლაც იყო ამის ალბათობა, მაგრამ ჩვენმა ყველაზე ტიტულიანმა გუნდმა ორრაუნდიან უმძიმეს დაპირისპირებაში მაინც შეძლო "საბურთალოს" ძლევა.

ახლა კი "ბრინჯაოს" პლეი ოფის გადამწყვეტი, ერთმატჩიანი დაპირისპირება (10 დეკემბერს, ნეიტრალურ მოედანზე, გორში რომ უნდა გაიმართოს) გველოდება: თბილისის "დინამოსა" და ბათუმის "დინამოს" პაექრობაში გამარჯვებული გარდამავალი ჩემპიონატის ბრინჯაოს მედლებთან ერთად, ევროპალიგის საგზურსაც მოიპოვებს.

აი, "საბურთალოსათვის" კი საფეხბურთო წელიწადი 4 დეკემბერს დასრულდა, მაგრამ გიორგი ჭიაბრიშვილის გუნდის მიმართ სასაყვედურო არავის უნდა ჰქონდეს! ყოველ შემთხვევაში, "საბურთალოს" მწვრთნელ-ფეხბურთელებს "დინამოსთან" ორივე დაპირისპირებაში ცდა არ დაუკლიათ წარმატების მისაღწევად, მაგრამ ვერც იმას იტყვის ვინმე, თითქოსდა, "დინამომ" არ დაიმსახურა გუშინ მოგება!..

უკვე აღარც გვიკვირს "დინამოს" შემადგენლობის მკვეთრი გაახალგაზრდავება და ასე იყო გუშინაც: 18-19 წლის ლუკა ლოჩოშვილი, ბექა მიქელთაძე და გიორგი ზარია, თვეზე მეტია, ძირითადის ფეხბურთელები გახდნენ; სათადარიგოთა სკამზე კი, გიორგი ლომაიასა და ლადო დვალიშვილის გარდა, ყველა დანარჩენები 17 წლის ბიჭები იყვნენ.

ჰოდა, გუშინდელი მატჩის (და, საერთოდ, ამ ორრაუნდიანი დაპირისპირების) ერთადერთი გოლიც "ახალი დინამოელების" წარმომადგენელმა გიორგი ზარიამ გაიტანა, რომელიც პირველი ტაიმის შუაგულში მშვენივრად გაერკვა სიტუაციაში და საჭირო დროს, საჭირო ადგილას მყოფმა ზუსტადაც დაარტყა.

ვიდრე გამოცვლიდნენ, ზარიამ უაღრესად შრომატევადი სამუშაო შეასრულა; არანაკლებ აქტიურობდა ბექა მიქელთაძეც, რომელმაც მატჩის მიწურულს ჩინებულ დრიბლინგს ძლიერი დარტყმაც მოაყოლა, მაგრამ ოთო გოშაძემ ბურთი მოიგერია. საერთო ჯამში, "დინამომ" უკეთესი შთაბეჭდილება პირველ ტაიმში დატოვა.

აი, შესვენების შემდეგ კი, "საბურთალო" უფრო გააქტიურდა და ეს "სცენარიც" არავისთვის იქნებოდა გასაკვირი: სტუმრებს ხომ ერთი გოლი სჭირდებოდათ სასურველი შედეგის მისაღწევად. თუმცა ისევ პირველ ტაიმს დავუბრუნდეთ, სადაც ყველაზე დასამახსოვრებელი მომენტები მათე ცინცაძის ეფექტურად შესრულებული საჯარიმო (ბურთი სტუმართა კარის ძელს მოხვდა) დარტყმა და "საბურთალოს" მარჯვენა მცველ ნოდარ იაშვილის გაუთავებელი რეიდები იყო.

ცალკე უნდა გამოვყოთ პირველი ტაიმის (და, ალბათ, მთელი მატჩის) ერთ-ერთი ყველაზე დინამიკური ეპიზოდი, როცა სტუმართა მარჯვენა გარემარბმა ვაგნერმა მარჯვენა ფლანგზე ფინტების კასკადით რამდენიმე მეურვე ჩამოიცილა, მასპინძელთა საჯარიმოშიც შეაღწია და მახვილი კუთხიდან ბურთი "დინამოს" კარის ბადეს... გარედან გაარტყა. არადა, "საბურთალოს" ფრანგი ლეგიონერისაგან ერთდროულად სამი თანაგუნდელი ელოდა აშკარად საგოლე პასს - სამივენი უაღრესად ხელსაყრელ სიტუაციაში იმყოფებოდნენ.

მეორე ტაიმი "საბურთალომ" აქტიურად კი დაიწყო, მაგრამ პირველი რეალური მომენტი მაინც მასპინძლებს ჰქონდათ: კუთხურიდან ჩამოწოდებულ ბურთს თავით გზავნიდა სტუმართა კარისკენ აკაკი ხუბუტია, მაგრამ მიზანს მცირედით ააცილა. მალე "დინამოს" კიდევ ერთი სახიფათო მომენტი შეექმნა: მარცხენა ფლანგზე ლუკა ლოჩოშვილმა იაქტიურა, მაგრამ გიორგი ზარიას სტუმართა მცველებმა წამით დაასწრეს.

ამასობაში მოედანზე, ცოტა არ იყოს, ზომაზე მეტი ხისტი თამაშიც გაჩაღდა და მასპინძელთა უკრაინელი თავკაცი ვიაჩესლავ გროზნიც ემოციურად მოუწოდებდა არბიტრს ამ სიხისტის აღსაკვეთად. მისი ახალგაზრდა ოპონენტი ჭიაბრიშვილი კი შეცვლებით შეეცადა სიტუაციის შეცვლას და ცვლილებებთან ერთად, გარკვეული ტაქტიკური გადაადგილებებიც მოახდინა თავის გუნდში.

ამან გარკვეული შედეგი მოიტანა და "საბურთალოც", სულ მცირე, ორჯერ ძალიან ახლოს იყო გოლის გატანასთან; ერთ ეპიზოდში თედორე გრიგალაშვილი ძალიან ახლო მანძილიდან თავით გზავნიდა ბურთს, მეორედ კი (უკვე - მატჩის მიწურულს) გიორგი ხარაიშვილმა ასევე ძალიან ახლო მანძილიდან ბურთი მასპინძელთა კარს ზემოდან გადააცილა.

აქვე, ისიც უნდა ვთქვათ, რომ უაღრესად დამაჯერებლად თამაშობდა "დინამოს" მეკარე და კაპიტანი ნუკრი რევიშვილი. ასევე გამორჩეული გახლდათ მასპინძელთა შემადგენლობაში მათე ცინცაძე, რომელმაც ერთ ეპიზოდში წამით დაასწრო სტუმართა ფორვარდს, თორემ ხიფათი გარდაუვალი იქნებოდა.

ამასობაში დრო იწურებოდა, შესამჩნევად გააქტიურდნენ გრიგოლ ჩაბრაძე და შეცვლაზე შემოსული გარსია პენა, მაგრამ "დინამო" თავს უნარიანად იცავდა და მწვავე კონტრშეტევების წამოწყებასაც ცდილობდა, რისი დასტურიც იყო ზემოთ ნახსენები ის ეპიზოდი, მარჯვენა ფლანგზე ბექა მიქელთაძის აქტიურობას რომ მოჰყვა - ოთარ კიტეიშვილი მახვილი კუთხიდან ურტყამდა, მაგრამ ბურთი სტუმართა კარის ბადეს გარედან მოხვდა.

...არბიტრის მიერ დამატებული მეოთხე წუთი იწურებოდა, "საბურთალომ" სტანდარტულის უფლება რომ მოიპოვა: საჯარიმოში სტუმართა ყველა ფეხბურთელი იყო ჩასული და იქ "ჩაბზრიალებულ" მაღალ ბურთს მილიმეტრებში ვერ მისწვდა გაგი მარგველაშვილი, თორემ არავინ იცის, მოვლენები როგორ განვითარდებოდა.

უმაღლესი ლიგა. ბრინჯაოს პლეი ოფი. საპასუხო მატჩი
04.12. თბილისი. "დინამო არენა"
დინამო (თბ)-საბურთალო 1:0
პირველი მატჩი 0:0
გოლი: 1:0 ზარია (24. რენე ფერეირას პასით)
დინამო (4-1-4-1): რევიშვილი - ზ. ჭელიძე, ხუბუტია, რენე ფერეირა, ლოჩოშვილი - ცინცაძე - ჯიღაური, ზარია (78. ჩაკვეტაძე), პაპუნაშვილი (87. ნინუა), კიტეიშვილი - მიქელთაძე.
სათადარიგოები: დვალიშვილი, კიკალიშვილი, კუცია, ხარაბაძე, ლომაია
მწვრთნელი: ვიაჩესლავ გროზნი
საბურთალო (4-3-3): გოშაძე - იაშვილი, თედ. გრიგალაშვილი, მარგველაშვილი, ჩაბრაძე - მამუჩაშვილი (80. კოხრეიძე), ტერა (62. ნადარაია), ხარაიშვილი - ვაგნერი, ფანცულაია (74. პენა), ხარა.
სათადარიგოები: ხოსე კარასკო, გვარაძე, სოფრომაძე, ქურდაძე
მწვრთნელი: გიორგი ჭიაბრიშვილი
გაფრთხილება: გრიგალაშვილი (61), ლოჩოშვილი (68), ჯიღაური (86)
არბიტრი: ჯ. ხორავა.

(იბეჭდება მცირე ცვლილებით)
ყოველდღიური სპორტული გაზეთი "ლელო"