30 ივლისს მსოფლიოს 2014 წლის ჩემპიონატის შესარჩევი ტურნირის წილისყრა გაიმართება და საქართველოს ეროვნული ნაკრების მომავალი მეტოქეების ვინაობასაც შევიტყობთ.ბრაზილიაში გასამართი მუნდიალის საკვალიფიკაციო ეტაპის თაობაზე პერიოდულად ვწერდით და ჩვენი გუნდის სავარაუდო მოწინააღმდეგეთა შესახებ ინფორმაციებსაც გაწვდიდით. შეგახსენებთ, კალათებში ნაკრებები ფიფასა და "კოკა-კოლას" ივლისის რეიტინგის მიხედვით გადანაწილდებიან, რომელიც, მართალია, ჯერ არ გამოქვეყნებულა, მაგრამ საქმეში გასარკვევად ივნისის რეიტინგიც სავსებით საკმარისია - ამ ორ რეიტინგს შორის არსებულ პერიოდში ევროპული ნაკრებები საერთოდ არ თამაშობენ და რომელიმე მათგანმა პოზიცია რომც შეიცვალოს, ბებერი კონტინენტის წარმომადგენელთა თანმიმდევრობა მაინც უცვლელი
ასე რომ, დღესვე შეგვიძლია ვთქვათ, როგორი იქნება ევროპული კალათების შემადგენლობა 30 ივლისს.
პირველი კალათი: ესპანეთი, ჰოლანდია, გერმანია, ინგლისი, იტალია, პორტუგალია, ხორვატია, ნორვეგია, საბერძნეთი.
მეორე კალათი: საფრანგეთი, ჩერნოგორია, რუსეთი, შვედეთი, დანია, სლოვენია, თურქეთი, სერბეთი, სლოვაკეთი.
მესამე კალათი: შვეიცარია, ისრაელი, ირლანდია, ბელგია, ჩეხეთი, ბოსნია, ბელარუსი, უკრაინა, უნგრეთი.
მეოთხე კალათი: ბულგარეთი, რუმინეთი, საქართველო, ლიტვა, ალბანეთი, შოტლანდია, ჩრდილოეთ ირლანდია, ავსტრია, პოლონეთი.
მეხუთე კალათი: სომხეთი, ფინეთი, ესტონეთი, კვიპროსი, ლატვია, მოლდოვა, მაკედონია, აზერბაიჯანი, უელსი.
მეექვსე კალათი: ფარერები, ლიხტენშტაინი, ისლანდია, ყაზახეთი, ლუქსემურგი, მალტა, ანდორა, სან მარინო.
საქართველოს ნაკრებმა ბოლო დროს რეიტინგში მნიშვნელოვანი პროგრესი კი განიცადა, მაგრამ იმდენი ვერა, რომ მეოთხიდან მესამე კალათამდე აღზევებულიყო. საამისოდ ხორვატიაში გამარჯვება გვეყოფოდა, მაგრამ სპლიტში მასპინძელთა გააფთრებულ შეტევებს ბოლომდე ვეღარ გავუძელით. თუმცა ისიც სათქმელია, რომ ჩვენს ეროვნულ გუნდს თემურ ქეცბაიას დანიშვნამდე გაცილებით უარესი რეიტინგი ჰქონდა. შეხსენებისთვის: ევრო 2012-ის საკვალიფიკაციო ეტაპის წილისყრისას საქართველოს ნაკრები მეხუთე კალათის ბინადარი იყო.
სამუნდიალე კალათების შემადგენლობას დაკვირვებით თუ გადავავლებთ თვალს, დავინახავთ, რომ უმძიმეს და ხელსაყრელ ჯგუფში მოხვედრის დაახლოებით ერთნაირი შანსი გვაქვს და ვნახოთ, როგორი თვალით გადმოგვხედავს ფორტუნა 30 ივლისს.
როგორც ხედავთ, ჩვენი ორი ამჟამინდელი მეტოქე, ხორვატია და საბერძნეთი, პირველი კალათის წევრები არიან და იქ მოხვედრილ სხვა გუნდებს თუ გადავხედავთ, ზემოთ ნახსენები ორიდან რომელიმესთან კვლავ შეხვედრა ურიგო პერსპექტივა არ უნდა იყოს. ნორვეგიაც უთუოდ კარგი ვარიანტია, დანარჩენებზე კი რა გითხრათ...
მსოფლიოს 2010 წლის ჩემპიონატის წილისყრისას, როცა საქართველოს ნაკრებს ექტორ რაულ კუპერი წვრთნიდა, ჩერნოგორიის ნაკრები ბოლო, მეექვსე კალათიდან გვერგო. მაშინ სერბეთისგან გამოცალკევებული ჩერნოგორიელები საერთაშორისო ასპარეზზე პირველ ნაბიჯებს დგამდნენ და წილისყრისას მოკრძალებული პოზიცია ამიტომაც ეკავათ, სულ მოკლე დროში კი საოცარი ნახტომი გააკეთეს და დღეს ფიფას რეიტინგში მე-16 ადგილზე არიან, რამაც სამუნდიალე წილისყრისთვის მეორე კალათში მიუჩინა ადგილი. მოკლედ, წინსვლაზე ჩვენ რა გვეთქმის, სალაპარაკო ამათ აქვთ, თუ აქვთ... დაგვეთანხმებით, მეორე კალათი მეტ-ნაკლებად თანაბარი დონის გუნდებითაა დაკომპლექტებული და "საჩუქარი" არავინ იქნება.
მესამე კალათშიც საკმაოდ ძლიერი ნაკრებები არიან. ნაკლებად სასურველ მეტოქეთა რიცხვს უნდა მივაკუთვნოთ ჩვენთვის ტრადიციულად უხერხული უკრაინა, მაინცდამაინც არც შვეიცარია და ჩეხეთი დაუძლურებულან.
მეოთხე კალათელებიდან, ბუნებრივია, საქართველოს ნაკრებთან ვერავინ მოხვდება, მათ შორის ავადსახსენებელი ბულგარეთი, მეხუთედან კი არასასურველი კვიპროსი უნდა იყოს. მეექვსე კალათი უკომენტაროდ დავტოვოთ...
შეგახსენებთ, რამდენიმე დღის წინ ფიფამ გამოაცხადა, რომ საქართველოსა და რუსეთის ნაკრებები ერთ ჯგუფში არ მოხვდებიან, ისევე, როგორც აზერბაიჯანი და სომხეთი (თუმცა ეს ორი ისედაც ერთ კალათში აღმოჩნდა). ასე რომ, მეორე კალათიდან ჩვენი პოტენციური მეტოქე მხოლოდ რვა გუნდია.
რაც შეეხება ევროპის ზონის შესარჩევი ტურნირის ფორმატს, ჩვენი კონტინენტის 53 ნაკრებიდან ბრაზილიაში მხოლოდ 13 გაემგზავრება. შეიქმნება 9 ჯგუფი, საიდანაც 8-ში 6-6 გუნდი იქნება, ერთში კი - 5. ჯგუფების გამარჯვებულები მუნდიალის საგზურს ავტომატურად მიიღებენ, ყველაზე უარესი შედეგის მქონე მეორეადგილოსანი თამაშგარეში დარჩება დანარჩენი რვა კი ოთხ წყვილს შეადგენს და ბოლო ოთხ საგზურსაც ისინი გაითამაშებენ.
ყოველდღიური სპორტული გაზეთი "ლელო"
