საქართველოს ნაკრების მთავარმა მწვრთნელმა თემურ ქეცბაიამ 2 სექტემბერს ლატვიის ნაკრებთან ევროპის ჩემპიონატის საკვალიფიკაციო მატჩის წინ ეროვნული ნაკრების საწვრთნელ ბაზა "ბასაზე" პრესკონფერენცია გამართა. ქეცბაიას თქმით, ჯგუფში მეორე ადგილზე გასვლის შანსი ჯერ კიდევ არის და ამისთვის გუნდმა რაც შესაძლებელია ყველაფერი უნდა გააკეთოს.ქეცბაიამ თქვა, რომ ყველა თამაში მნიშვნელოვანია. "ხორვატია პირველ ადგილზე გავა და ჩვენ მეორე ადგილის დაკავების თეორიული შანსი კიდევ გვაქვს დარჩენილი, რისთვისაც ყველაფერი უნდა გავაკეთოთ. მოწვეულთაგან ყველა მწყობრშია, ერთადერთი უჩა ლობჟანიძის თამაში გამოირიცხა, რომელსაც ტრავმა აღმოაჩნდა", - განაცხადა საქართველოს ნაკრების თავკაცმა.
ლატვიასთან მატჩი ბორის პაიჭაძის სახელობის ეროვნული სტადიონის მოედნის ცუდი საფარის გამო "მიხეილ მესხის" სტადიონზე 2 სექტემბერს გაიმართება. ბილეთების ფასი 10, 15, 20 და 30 ლარი იქნება.
