8 სექტემბერი, ლიტვა, ვილნიუსისაქართველო-მაკედონია 63:65
12-13, 14-16, 18-25, 19-11
3000 მაყურებელი
მსაჯები: რობერტ ლოტერმოსერი (გერმანია), ადემირ ზურაპოვიჩი (ბოსნია), მარიუს ჩიულინი (რუმინეთი)
ბუ
მეორე პერიოდის დასრულებამდე 3 წუთით ადრე ძალიან ცუდი რამ მოხდა: ტრავმა მიიღო გიორგი ცინცაძემ, რომელმაც მატჩის გაგრძელება ვერ შეძლო. თამაშის დასრულების შემდეგ "ბუ" საავადმყოფოში წაიყვანეს და მივიღეთ არასახარბიელო დიაგნოზი: გიორგის ფეხზე ჯვარედინი იოგი აქვს გაწყვეტილი და ოპერაცია დასჭირდება.
ბო
ბო მაკალები მაკედონიის ნაკრების ნატურალიზებული გამთამაშებელია, რომელმაც მთელი მაკედონია გაახარა: მატჩის დასრულებამდე 16 წამით ადრე, ანგარიშზე 63:63, ბურთი ბოლომდე
პრესკონფერენციაზეც მთავარი თემა სწორედ ბო იყო. საქართველოს ნაკრების თავკაცმა იგორ კოკოშკოვმა თქვა:
- მაკალები შეხვედრის საკვანძო ფიგურა გახლდათ. მაშინ, როცა მის გუნდს შეტევაში უჭირდა, სწორედ ბო მაკალები აგდებდა. ჩვენ კი არ აღმოგვაჩნდა ასეთი კალათბურთელი. სამწუხაროდ, ბოლო წამებზე ვერ შევძელით ბოს შეჩერება და გადამწყვეტი ბურთიც მან ჩააგდო. ძალიან რთული მატჩი იყო, ჩემმა ბიჭებმა ბოლომედე იბრძოლეს. მათ მიმართ სასაყვედურო არ მაქვს.
ქართველმა კალათბურთელებმა მართლაც ბოლომდე იბრძოლეს, გიორგი ცინცაძისა და ზაზა ფაჩულიას არყოფნაში ბოლო წუთებზე 10-ქულიანი ჩამორჩენა აღმოფხვრეს, სირენამდე 16 წამით ადრე ნიკა ცქიტიშვილმა ორი საჯარიმოთი ანგარიშიც გაათანაბრა, მაგრამ მაკალებმა ყველაფერი წყალში ჩაგვიყარა. ვიდრე ბო კალათისკენ დაიძრებოდა, მასზე ჯარიმის აღებაც შეიძლებოდა და ბოლო იერიშის უფლება საქართველოს დარჩებოდა, მაგრამ ჩვენები ასე არ მოიქცნენ.
იყო კიდევ ერთი ნიუანსი: ყველამ იცოდა, რომ მაკალები ფარისკენ დაიძვრებოდა. ასეთ დროს კი ზონების გადაკეტვის სპეციალისტი ვლადიმერ ბოისაა, რომელიც გადამწყვეტ მომენტს სათადარიგოთა სკამზე შეხვდა...
ნამატჩევს მწვრთნელმა იგორ კოკოშკოვმა გამოუცდელობა ახსენა. ევრობასკეტზე მიღებული გამოცდილება ქართველ კალათბურთელებსაც ძალიან გამოადგებათ და მწვრთნელებსაც. ვფიქრობ, იგორ კოკოშკოვი ნანობს, რომ ნაკრებში გამოუცდელი მარკიზ ჰეინსი ჩამოიყვანა. არადა, ევროპაში მაკალებისა და როულანდის დონის კალათბურთელი არაერთია, რომელიც ევრობასკეტზე საქართველოს ნაკრებში თამაშზე უარს ნამდვილად არ იტყოდა და მგონია, არც ბულაგრეთთან წავაგებდით, არც მაკედონიასთან და სლოვენიასთანაც შეიძლებოდა მოგება.
სკიტა
ნიშნის მოგებით არ ვამბობ: ტურნირის მსვლელობისას გვერდით მყოფ ჟურნალისტს გადავულაპარაკე - მწვრთნელმა ნიკოლოზ ცქიტიშვილი მეტად უნდა გამოიყენოს. იგი რაც ნაკლებ ნდობას გრძნობს, მით ინერტულია. გავიხსენეთ, რომ პორტუგალიაში შარშან სასტარტო ხუთეულში მოხვედრა 15 მოხსნით აღნიშნა.
იგორ კოკოშკოვმა მაკედონიასთან ზაზა ფაჩულიას გარეშე ითამაშა და არაერთი სიახლე შემოგვთავაზა. პირველი მოულოდნელობა ცქიტიშვილის სასტარტო შემადგენლობაში ცენტრის პოზიციაზე გამწესება იყო. შესაბამისად მივიღეთ მობილური ხუთეული, რომელმაც მაკედონელებს დიდი თავსატეხი გაუჩინა. ნიკა ფარქევშაც კარგად იბრძოდა და პერიმეტრზე სამქულიანების სატყორცნადაც ადიოდა. გამოჩნდა, რომ ასეთი ტაქტიკით თამაში მაშინაც შეიძლებოდა, როცა ზაზა ფაჩულია ჯანმრთელად იყო. გუშინ ნიკა მაკალების შემდეგ მოედანზე საუკეთესო იყო - 20 ქულა და 10 მოხსნა მოაგროვა. ქართველთა მიერ რეალიზებული 4-დან 3 სამქულიანი სკიტას ანგარიშზე მოდის.
- ბოლომდე ვიბრძოლეთ, მიუხედავად იმისა, რომ წამყვანი კალათბურთელები (ცინცაძე და ფაჩულია) გვაკლდნენ, ურიგოდ არ გვითამაშია. კარგად გამოვიყურებოდით დაცვაში, მაგრამ ბო მაკალებმა დიდი თავსატეხი გაგვიჩინა და საბოლოოდ მოგვიგო კიდეც, - აღნიშნა ნიკოლოზ ცქიტიშვილმა.
ციფრები
იცით კიდევ რა არის დასანანი? - მაკედონელებმა ვერც ტყორცნებში გვაჯობეს და ვერც ფარქვეშ. მეტსაც გეტყვით, - მოხსნებში საქართველოს საგრძნობი უპირატესობა ჰქონდა: 46:32, რაც ლოგიკურად გამარჯვების საწინდარი უნდა გამხდარიყო... მაგრამ ეს უპირატესობა ჩვენმა გუნდმა შეცდომებით გადაფარა (21:10).
აქვე უნდა ვთქვათ: წაგების მიუხეადვად, ქართველებს მომდევნო ეტაპზე გასვლის შანსი არ დაუკარგავთ. ამისთვის აუცილებელია ბოლო ორი მატჩის მოგება, 10 სექტემბერს ფინეთთან და 12-ში საბერძნეთთან.
ვაჟა სიმონიშვილი ლიტვიდან
ყოველდღიური სპორტული გაზეთი "ლელო"
