"ზესტაფონის" დუბლებში გადაყვანილი ბუბა დაუშვილი ამბობს, რომ ეროვნული ნაკრების თავკაცთა მხარდაჭერა მისთვის მოულოდნელი და ძალიან გასახარი იყო. - დუბლებში გადაყვანლი მოთამაშისთვის ნაკრებში გამოძახება მოულოდნელი იქნებოდა.
- რა თქმა უნდა, ასეა, ლამის სამი თვეა, უთამაშებელი ვარ, დუბლებში გადაყვანილი კი ნაკრებში გამოძახებას არ ველოდი. ამ ნდობისა და თანადგომისთვის თემურ ქეცბაიას უდიდეს მადლობას მოვახსენებ. კარგად მესმის, რომ ნაკრების მწვრთნელისთვის მძიმე გადასაწყვეტი იყო უთამაშებელი ფეხბურთელის გამოძახება. ამიტომ უფრო მინდა ნდობა გავუმართლო.
- დუბლებში ვარჯიშით ფორმის შენარჩუნებას ახერხებ?
- მონდომებას არ ვაკლებ, შეძლებისდაგვარად ვემზადები, მაგრამ
- სათადარიგოებში ყოფნით, მით უფრო, უთამაშებლობით, ფორმის შენარჩუნება თითქმის შეუძლებელია.
- არც ვიცი, როგორ ფორმაში ვარ, რადგან მდგომარეობა თამაშებით ფასდება, მე კი, როგორც გითხარით, დუბლებშიც არ მაყენებენ. რას ვიზამ, მაინც ვცდილობ, გულიანად ვივარჯიშო და ყველაფერი გავაკეთო საიმისოდ, ფორმა მინიმალურ დონეზე მაინც შევინარჩუნო.
- მოდი, ობიექტურად ვთქვათ: "ზესტაფონის" პრეზიდენტ ილია კოკაიას გაღიზიანებაც გასაგებია - კაცი თავს გევლებოდა და წასვლის თაობაზე უნდა გაგეფრთხილებინა.
- ყველაფერი შეიძლებოდა, მაგრამ მიმაჩნია, რომ სად გადავალ, ეს ჩემი პირადი საქმეა, რაც ძველი კლუბისადმი უპატივცემულობას სულაც არ ნიშნავს. ბოლოდროინდელი უსიამოვნო ვითარების მიუხედავად, ილია კოკაიას მიმართ დამოკიდებულება არ შემიცვლია. მე ყოველთვის ვიტყვი, რომ "ზესტაფონი" ჩემთვის ყოველთვის იქნება საქართველოში საუკეთესო გუნდი და მას მუდამ ვუგულშემატკივრებ.
"ზესტაფონში" ექვსი წელი ვითამაშე, რაც ცოტა ხანი ნამდვილად არ არის. ამ კლუბმა ბევრი რამ შემძინა, მაგრამ დადგა დრო, როდესაც გადაწყვეტილება უნდა მიმეღო და მეც კარიერის უცხოეთში გაგრძელება გადავწყვიტე.
- "კარპატისთან" წინასწარ გაფორმებული კონტრაქტის შემდეგ "ზესტაფონის" პრეზიდენტთან არ გილაპარაკია?
- არა, ეს არ მომხდარა.
- ლვოვში როდის მიდიხარ?
- საქართველოს ჩემპიონატის პირველი ეტაპი და "ზესტაფონთან" საკონტრაქტო ვადა როგორც კი დასრულდება, უკრაინაში გავემგზავრები და გუნდთან ერთად ვივარჯიშებ. ასე რომ, ამ მხრივ ყველაფერი უცვლელადაა.
- მოსამზადებელი ეტაპისას ფორმის აღდგენა, ალბათ, არ გაგიჭირდება.
- მეც ამის იმედი მაქვს. მაგრამ ამდენი ხნის უთამაშებლობა მაინც ძნელი დასაძლევია, ფორმას კი ეშველება, მაგრამ მორალურად არის ძნელი, დღეები თითქოს ჩვეულებრივზე მეტად იწელება. ასე მგონია, ეს სამი თვე სამი წელიწადივით გაიწელა. მეორეც არის: ფეხბურთელი თამაშს რომ უყურებ და შენიანს ვერ ეხმარები, ეს მძიმე გადასატანია.
ყოველდღიური სპორტული გაზეთი "ლელო"
