საქართველოს ნაკრები ასეულს დაუბრუნდა

როგორც მოსალოდნელი იყო, საბერძნეთში მიღწეულმა ფრემ საქართველოს ნაკრების სარეიტინგო მდგომარეობაზე უაღრესად დადებითი გავლენა მოახდინა და საკმაო პაუზის შემდეგ, ჩვენი ქვეყნის უპირველესი საფეხბურთო გუნდი ფიფასა და "კოკა-კოლას" ერთობლივი რეიტინგის პირველ ასეულს დაუბრუნდა. თემურ ქეცბაიას გუნდმა საბერძნეთსა და ისრაელთან მოპოვებული ქულებით ერთბაშად 21-საფეხურიანი ნახტომი გააკეთა და 110-დან 89-ე ადგილამდე აღზევდა.

აქვე ჩვენი შესარჩევი ჯგუფის სხვა ბინადართა მდგომარეობასაც გადავხედოთ. მათგან საუკეთესო პოზიცია ხორვატიას უპყრია, რომელიც სამი პოზიციით დაწინაურდა და მე-11 ადგილზე გადაინაცვლა. მას მოსდევს საბერძნეთი, რომელმაც მე-12 ადგილი შეინარჩუნა. ისრაელი ორი საფეხურით წინ წავიდა და 36-ეა, ლატვია მთელი 19 ადგილით ჩამოქვეითდა და 68-ეა, მალტა კი ერთი ადგილით აღზევდა და 150-ე პოზიციაზე იმყოფება.

ცნობისათვის, პოსტსაბჭოთა სივრციდან გვისწრებენ რუსეთი, უკრაინა, ლიტვა, ბელარუსი, ლატვია და მოლდოვა.

რეიტინგში პირველი და მეორე ადგილები შეინარჩუნეს მსოფლიოს ჩემპიონმა და ვიცე-ჩემპიონმა, მუნდიალის ბრინჯაოსმედალოსანმა გერმანიამ კი მესამე პოზიცია ბრაზილიას წაართვა. საუკეთესო ათეულის კიდევ ერთი სიახლე ისაა, რომ ინგლისმა და ურუგვაიმ ერთმანეთს მეექვსე და მეშვიდე საფეხურები გაუცვალეს.

ფიფას რეიტინგის საუკეთესო ათეული ასე გამოიყურება:

1. ესპანეთი
2. ჰოლანდია
3. გერმანია
4. ბრაზილია
5. არგენტინა
6. ინგლისი
7. ურუგვაი
8. პორტუგალია
9. ეგვიპტე
10. ჩილე