ფინეთის ნაკრები საქართველოსთან დასახვედრად ემზადება. ამ ნაკრებს "ჯვაროსნებთან" არასოდეს უთამაშია და აქედან გამომდინარე, მიკა პაატალაინენის გუნდზე ბევრი არაფერი ვიცით. ამ ვაკუუმის ამოვსება გიორგი ნიკურაძესთან დალაპარაკებით ვცადეთ, რომელიც ფინურ კლუბებში შვიდი წელი თამაშობდა.
- ფინეთის დღევანდელ ნაკრებს თუ იცნობთ?
- ბევრ ფეხბურთელს ვიცნობ და ნაკრებზეც წარმოდგენა მაქვს. ყველაზე ახლოს ძმებ ერიომენკოებთან ვიყავი. ახლა ნაკრებში შუათანა და უფროსი ძმები, რომანი და ალექსეი თამაშობენ. კარგი ფეხბურთელები არიან, მაგრამ რომანი ბევრად მაღალი დონის არის, კიევის "დინამოში" უთამაშია, ახლა კი ყაზანის "რუბინშია", სადაც მისი ძმაც
- თავად ნაკრებზე რას გვეტყვი?
- დისციპლინის მოყვარული, ბრძოლისუნარიანი და საკმაოდ კარგად ორგანიზებული გუნდია, ფეხბურთელები კი ბოლომდე იხარჯებიან. საკუთარ მოედანზე ისეთივე სახიფათო ძალაა, როგორც თუნდაც ჩვენი ნაკრები.
მათი მწვრთნელი მიკა პაატელაინენი კარგი თავდამსხმელი იყო და წლების განმავლობაში შოტლანდიისა და ინგლისის კლუბებში თამაშობდა - "დანდიში", "აბერდინში", "ჰიბერნიანში", "ბოლტონში", "ვულვერჰემპტონში".
მწვრთნელობა ფინეთში დაიწყო. მერე "კილმარნოკსა" და "ჰიბერნიანში" იმუშავა, ფინეთის ნაკრები კი შარშან ჩააბარეს. მისი ძმები, ნიკო და მარკუსი 2004 წელს "კოტეპეში" ჩემი თანაგუნდელები იყვნენ და ვმეგობრობდით.
სხვათა შორის, ვერ ვიტყვი, რომ პაატელაინენი ნაკრებს ფინელებისთვის დამახასიათებელი ტიპური დაცვით და ჩაკეტილ ფეხბურთს ათამაშებს. ძირითადად, 4-5-1 განლაგებას იყენებს. სახლში საკმაოდ აგრესიული გუნდია და უნდა ვუფრთხოდეთ.
- ფინეთის ნაკრები პოზიციების მიხედვით დაგვიხასიათეთ...
- ფინელებს ყოველთვის ჰყავდათ მაღალი კლასის მეკარე და ამჟერადაც ასეა, მაგრამ ბოლო ერთი წელია, ნაკრების კარში წარმოშობით სლოვაკი ლუკაშ ჰრადეცკი დგას. ის ფინეთშია გაზრდილი, დანიურ "ესბიერგში" თამაშობს და ძლიერი მეკარეა.
ძლიერი, ორგანიზებული და საკმაოდ ხისტი დაცვის ხაზი ჰყავთ - ძალისმიერ ბრძოლებს სულაც არ ერიდებიან. გამორჩეულია ცენტრალური მცველი, კაპიტანი პეტრი პასანენი.
სწრაფი და მობილურია ფინელთა ნახევარდაცვა, სადაც უფრო ჩამშლელი ფეხბურთელები ჭარბობენ. ერთადერთი ტექნიკური პლეიმეიკერი რომან ერიომენკო არის.
ფინეთის ნაკრებს სამი ვარსკვლავი ჰყავს, რომან ერიომენკო და თავდამსხმელები ტეემუ პუკი და მიკაელ ფორსელი. ეს ორივე ძალიან სახიფათოა.
პუკი პატარა ბიჭი იყო, როდესაც ჩემს ყოფილ კლუბში, "კოტეპეში" ვარჯიშობდა. მერე "სევილიამ" წაიყვანა და მართალია, ცოტა ხნით ფინურ ჰიკ-ში დაბრუნდა, მაგრამ ევროპის ლიგაზე "შალკეს" 4 გოლი გაუტანა და გერმანელებმა კონტრაქტი გაუფორმეს. ძალიან ტექნიკური, სწრაფი და სახიფათო თავდამსხმელია.
მომწონს "ლიდსის" თავდამსხმელი ფორსელიც, რომელსაც "ჩელსიში", "კრიტალ პალასში", "მიონხენგლადბახში", "ბირმინგემსა" და "ჰანოვერში" უთამაშია.
აი, ამ სამ ფეხბურთელს ყველაზე მეტად უნდა ვუფრთხოდეთ. ისინი გუნდში ყველაზე არაპროგნოზირებადები და სახიფათოები არიან.
ახლა ალბანელი ნიაზ კუჩის დამატებასაც აპირებდნენ, რომელიც ძალიან მაღალია (194 სმ) და ტექნიკურიც, მაგრამ არ ვიცი, საქართველოსთან ითამაშებს თუ არა.
- ნაკრებში ალექსეი ერიომენკოს არ ათამაშებენ?
- უფრო შეცვლაზე, რადგან ბოლო პერიოდში ტრავმირებული იყო, სათამაშო პრაქტიკაც აკლია და ძმისგან განსხვავებით, ყაზანის "რუბინის" სათადარიგოებში ჯდომა უწევს.
- ფინელებს თამაში როგორ მიჰყავთ?
- უმეტესად, ფლანგების გამოყენებას ცდილობენ - ინგლისური სტილი ნაწილობრივ მაინც შერჩათ, მაგრამ შეტევების წამოწყება ცენტრიდანაც იციან.
და კიდევ, საქართველოს ნაკრებმა უნდა იცოდეს, რომ სწრაფად და აგრესიულად თამაშობენ.
- როგორია შენი პროგნოზი?
- ეჭვიც არ მეპარება, რომ ძალიან მძიმე და საინტერესო შეხვედრა გველის, მაგრამ ფინელებზე რაც ვილაპარაკე, სულაც არ ნიშნავს, რომ ჩვენს ნაკრებს შანსი არ გააჩნია.
ბელორუსთან და ესპანეთთან გამოჩნდა, რომ ქეცბაია საკმაოდ ბრძოლისუნარიან გუნდს აყალიბებს, მაგრამ პროგნოზის გაკეთება მაინც გამიჭირდება.
- ორივე ნაკრების შესაძლებლობებს იცნობ და შენი აზრით, მოგება შეგვიძლია?
- როგორ არ შეგვიძლია, თუ ისეთივე მობილიზებულებმა ვითამაშეთ, როგორც შესარჩევის პირველ ორ შეხვედრაში.
ფინელები სწრაფები არიან, მაგრამ მათი მცველები ტექნიკურად მოიკოჭლებენ. ჩვენს ნახევარმცველებს კი არც სისწრაფე დაეწუნებათ, არც ტექნიკა და მეტოქის ამ ნაკლის გამოყენებას უნდა შეეცადონ.
ფინელებს ფეხბურთი საკმაოდ უყვართ და ალბათ, 30-ათასიანი "ოლიმპიური" სტადიონის ტრიბუნებიც შეივსება.
ყოველდღიური სპორტული გაზეთი "ლელო"
ასევე იხილეთ:
თემურ ქეცბაია: თავის გამოჩენას მხოლოდ კარგი დაცვით არ ვაპირებთ!
