24 წლის ირაკლი მაისურაძე რუსთავის "მეტალურგის" ერთ-ერთ წამყვანი ფეხბურთელია. საქართველოს ეროვნული ნაკრების დამრიგებელი თემურ ქეცბაიაც კარგი თვალით უყურებს მაისურაძეს და ხშირად იძახებს ეროვნულ გუნდში."მეტალურგს" ბოლო დროს ვერ მისდის საქმე რიგიანად, გუნდი საქართველოს ჩემპიონატში მე-7 ადგილზეა. არადა, წინა სეზონში წარმატებით გამოდიოდა და სანამ აღმასკომი ჩემპიონად "ზესტაფონს" გამოაცხადებდა, ტიტულის მფლობელად კობა ჟორჟიკაშვილის გაწვრთნილი "მეტალურგი" ითვლებოდა.
რუსთავურ გუნდს ამ სეზონში მწვრთნელი შეეცვალა, გუნდს ახალგაზრდა სპეციალისტი გიორგი ყიფიანი თავკაცობს, თუმცა მნიშვნელოვანი შედეგი ჯერ არ ჩანს. მაისურაძესთან ინტერვიუც აქედან დავიწყეთ…
- მაინც რითია გამოწვეული
- ალბათ, ჩავარდნა გვაქვს, თორემ გუნდში არაჩვეულებრივი სიტუაციაა. "მეტალურგის" ახალ მწვრთნელს საკუთარი ხედვა აქვს და თავისი მიმართულებით ცდილობს, რომ გვათამაშოს. რაღაც არ გამოგვდის, უიღბლობაც დაგვჩემდა.
მიუხედავად ამისა, გუნდების ექვსეულებად დაყოფამდე ჯერ კიდევ არის თამაშები და გვაქვს იმის შანსი, რომ ექვს საუკეთესო გუნდში მოვხვდეთ. "მეტალურგს" მეტი შეუძლია, ვიზუალური თვალსაზრისით გუნდის თამაშში უკეთესობა არის.
- ჩავარდნა ახსენე და ამასაც უნდა ჰქონდეს მიზეზი...
- მიზეზი ალბათ ის არის, რომ "მეტალურგმა" ამ სეზონისთვის მზადება სხვა გუნდებზე ადრე დაიწყო, დაახლოებით ერთი კვირა მოგვიწია დასვენება წინა სეზონის შემდეგ, ევროპალიგაზე სათამაშოდ ვემზადებოდით.
სხვა რა გითხრათ? შემადგენლობა 80 პროცენტით შენარჩუნდა, მაგრამ რაღაცა ვერ აეწყო ჩვენი საქმე. ასეთი რამ ფეხბურთში ხშირად მომხდარა; აგერ, "ზესტაფონიც" ვერ თამაშობს ჯერ ისე, როგორც წინა სეზონში. ევროპულ გრანდებსაც ემართებათ ჩავარდნები.
- რა სიახლეები დანერგა "მეტალურგის" ახალმა მთავარმა მწვრთნელმა გიორგი ყიფიანმა?
- ამ მწვრთნელის ხელში უფრო ხარისხიანი ფეხბურთისკენ მივისწრაფვით, მკაფიოდ უნდა იყოს გარკვეული, ვინ რას აკეთებს საკუთარ პოზიციაზე, რა ქმედებებს აკეთებენ მცველები, მერე ნახევარმცველები და შემდეგ თავდამსხმელები. ეს ყველაფერი ავტომატიზმამდე რომ მივიყვანოთ, ამას დრო სჭირდება.
აუცილებლად უნდა აღინიშნოს, რომ კობა ჟორჟიკაშვილმა "მეტალურგში" დიდ წარმატებას მიაღწია. მაშინ შედეგზე კეთდებოდა გათვლა და მიზანი შევასრულეთ.
- გულშემატკივართა დასწრება საერთო პრობლემაა, მაგრამ შენც გკითხავ - რუსთავში "მეტალურგის" თამაშებზე ბევრი მაყურებელი რატომ არ დადის?
- არ ვიცი. ზესტაფონში, ქუთაისში, ზუგდიდსა და მარტვილში მართლაც მეტი მაყურებელი დადის. წინა სეზონში "მეტალურგი", ფაქტობრივად, ჩემპიონი გახდა, მაგრამ მაშინაც არ დადიოდა ბევრი მაყურებელი ჩვენს საშინაო მატჩებზე. დაბალი დასწრება შედეგის ბრალი არ უნდა იყოს.
- საქართველოს ჩემპიონატში უახლოესი მატჩი ქუთაისის "ტორპედოსთან" გელით, რომელთანაც პირველ წრეში 0:4 წააგეთ...
- ის მარცხი დავიწყებულია. ქუთაისში რთული თამაში გველის, "ტორპედო" ძალიან ლამაზ ფეხბურთს თამაშობს, გუნდს ჩინებული მწვრთნელი ჰყავს. კარგია, რომ ხელოვნურ განათებაზე, მშვენიერ მოედანზე ვითამაშებთ. ქუთაისში გულშემატკივარიც დადის სტადიონზე და ასეთ გარემოში თამაში სასიამოვნოა. დანარჩენი კი მინდორზე გამოჩნდება. ჩვენ უკან დასახევი გზა აღარ გვაქვს.
- ყიფიანი რას გავალებს, რა არის მისი მთავარი მოთხოვნა?
- გააჩნია, რა ტაქტიკით მოგვიწევს თამაში. მარტვილის "მერანთან" ოთხი თავდამსხმელით ვითამაშეთ და ერთ-ერთი მე ვიყავი. ორ ნიმინალურ ფორვარდს შეტევის დროს ორი კაცი ვეხმარებოდით ფლანგებიდან შუისკენ შეწეულები. საერთოდ, შუაში თამაში მირჩევნია ფლანგზე ყოფნას.
- ყიფიანის სამწვრთნელო კონცეფციაზე უფრო კონკრეტულად რას გვეტყოდი? მაინც რა სტილის მიმდევარია?
- ის ფეხბურთი, რასაც "ზესტაფონი" და "ტორპედო" თამაშობენ, რუსთავშიც იქნება, ოღონდ ამას დრო სჭირდება. როცა ლამაზად თამაშობ და ასე იმარჯვებ, ორმაგ სიამოვნებას განიცდი, ვიდრე ჯახით და ბრძოლით მოპოვებული გამარჯვების დროს.
ყიფიანის მიმართულებაც ლამაზი და კომბინაციური თამაშია, ფეხბურთი ხომ პირველ რიგში მაყურებლისთვისაა...
- ბოლოს ნაკრებზეც ვთქვათ. თემურ ქეცბაია ხშირად გიწვევს ნაკრებში, თუმცა თამაში, ფაქტობრივად, ჯერ არ გიწევს...
- ნაკრების მწვრთნელის მადლობელი ვარ, რომ მიწვევს, მაგრამ ჯერ მხოლოდ ერთხელ მომიწია თამაში, მოლდოვასთან ამხანაგურ შეხვედრაში. არადა, მინდა, რომ ჩემი წვლილიც შევიტანო და ამის დამტკიცება მსურს.
მხოლოდ ნაკრებში გამოძახება არ მაკმაყოფილებს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ლაპარაკი თუ არ იცის წესიერი, ხომ არ ნიშნავს რომ ყველაფერს ხაზი გადაუსვათ?! ამოვიდა ყელში რა თქვენი ჩასაფრებულის პოზიციიდან საუბარი და კითხვების დასმა!!!