დინამომ სინათლეს არამხანაგურად მოუგო

1968 და 1969 წლებში თბილისის "სინათლე" ფიზკულტურული კოლექტივების ჩემპიონატის, "მილიონთა თასის" გამარჯვებული გახდა: პირველად თასი მაიკოპში, მინსკის "დინამოს" დუბლების ძლევით (2:0) მოიპოვა. 1969 წელს გამარჯვებულის გამოსავლენად, პიატიგორსკში მოსკოვის "სტრელასთან" ზედიზედ სამი შეხვედრა გაიმართა, რადგან პირველი ორი ფრედ (0:0 და 1:1) დასრულდა. მესამე "სინათლემ" პენალტების სერიით (17:16) მოიგო. ფეხბურთელებს ამაგი დაუფასდათ და სპორტის ოსტატის წოდება მიენიჭათ.

ვეტერანებს გული გავუხაროთ და მაშინდელი წარმატების მონაწილეების გვარები ჩამოვთვალოთ: სერგო სიხარულიძე და ვალიკო ირემაძე (მწვრთნელები), ვაჟა ნემსაძე (გუნდის კაპიტანი), ელგუჯა გუგუშვილი, მევლუდ ლორია, ჯონი ჯანელიძე, ჯონი აბაიშვილი, მალხაზ მაისაშვილი, ედიკ ჯადოევი, გუჯა სილაგავა, ნუგზარ ვარდოსანიძე, ანატოლი სიტკოვი, თამაზ შუბითიძე, როლანდ კიზირია, შალვა დევდარიანი, ომარ დვალი, ოთარ კერესელიძე, რაფიკ აივაზოვი, თამაზ სუხაშვილი, ონორე თაბაგარი, გია სიმონიშვილი, ჯემალ მეტრეველი, თამაზ იმნაძე, კოტე ოდიკაძე, ჯუმბერ ჯაგაშვილი, მიშა პირადაშვილი.

აბა, ამ მუხთალ წუთისოფელში ქართველებს რა დაგვრჩენია, თუ არა წარსულის გახსენება - თასის მოპოვების 40 წელი "სინათლის" ვეტერანებმა მხოლოდ წელს აღნიშნეს და "ლოკომოტივზე" თბილისის "დინამოს" ვეტერანებს ამხანაგურად შეხვედნენ. თუმცა, ჭაღარაშერეულ იუბილარებს მუხლი ძველებურად აღარ ერჩოდათ და ვეტერანმა დინამოელებმაც ძალიან არაამხანაგურად  (9:3) მოუგეს.

"დინამოში" თამაშობდნენ რამაზ ურუშაძე, ბესარიონ მჭედლიშვილი, გოჩა ჩიქოვანი, ვახტანგ ქორიძე, ლევან ბარათაშვილი, მალხაზ ლაცაბიძე, გოჩა ჯოხაძე, თენგიზ სულაქველიძე, მანუჩარ მაჩაიძე, ოთარ კორღალიძე, ლევან ნოდია.

"სინათლე" კი ახალგაზრდებიდან მხოლოდ ელგუჯა გუგუშვილის ვაჟმა, სერგო გუგუშვილმა და ჩვენმა კოლეგა ლაშა თაბაგარმა გააძლიერეს – ეს უკანასკნელის "სინათლეში" მამის, აწ გარდაცვლილი ონორე თაბაგარის ნაცვლად თამაშობდა. თბილისში საგანგებოდ მატჩისთვის რუსეთიდან ბიზნესმენი ედუარდ ჯადოევი, სომხეთიდან კი რაფიკ აივაზოვი ჩამოვიდნენ და იხალისეს ვეტერანებმა, ახალგაზრდობა, ის სიხარული და კიდევ ბევრი ისეთი რამ გაიხსენეს, რაც გაზეთში არ დაიწერება...