დავით ვოლკოვი: ალბათ, სერბეთში აღარ დავბრუნდები

21 წლის დავით ვოლკოვი თავისი თაობის ერთ-ერთი გამორჩეული ფეხბურთელია. უთამაშია "გაგრაში", თბილისის "დინამოში", "ჩიხურასა" და ბოლნისის "სიონში". გასული სეზონი კი სერბეთის პირველი ლიგის ბინადარ "ზემუნში" ჩაამთავრა.

ვოლკოვი სერბეთიდან საქართველოში დაბრუნდა და "ლელოს" უთხრა, რომ დიდი ალბათობით, დატოვებს კლუბს, რომელიც სერბეთის სუპერლიგაში აღზევდა...

საინტერესოა, რა არის ამის მიზეზი?

- საქართველოს ჩემპიონატში წარმატებული თამაშის შემდეგ კარიერის გაგრძელება სერბულ "ზემუნში" გადაწყვიტეთ. მას შემდეგ აღარ გვისაუბრია და იქნება მოკლედ გვითხრა, როგორი იყო დავით ვოლკოვის სერბული თავგადასავალი?
- სერბეთში რომ ჩავედი, ტრავმირებული ვიყავი. "ზემუნი" პირველ ლიგაში მეორე ადგილზე მყოფ გუნდს 7 ქულით ჩამორჩებოდა. ჩემი ჩასვლა იყო და, დაიწყეს თამაშების მოგება. ერთი ეს იყო, მე ვერ ვთამაშობდი ტრავმის გამო, თორემ ისე კარგად მიდიოდა ყველაფერი... ბოლომდე ასე გაგრძელდა და გუნდმა სერბეთის უმაღლესი ლიგის საგზური მოიპოვა.

- მაინც რა დონის ფეხბურთია სერბეთის პირველ ლიგაში?
- ვერ ვიტყვი, რომ დონე ძალიან მაღალია. უბრალოდ, იქ უფრო ძალისმიერ ფეხბურთს ანიჭებენ უპირატესობას, ვიდრე ჩვენთან. ლეგიონერები ბევრნი არ არიან. მაგალითად, ჩვენთან ორი ბოსნიელი იყო.

- "ზემუნი" ტრადიციული კლუბია სერბული მასშტაბით...
- კი, ძალიან დიდი ტრადიცია აქვს, გულშემატკივრებიც ბევრი ჰყავს, მათ შორის - ოფიციალური ფანკლუბიც. ყველა მატჩის წინ მოდიოდნენ ჩვენთან, გვამხნევებდნენ და მოგებას გვთხოვდნენ.

- გამიგია, სერბეთში ქართველები არცთუ ძალიან უყვართო. თქვენ რას იტყვით?
- გუნდში ყველა ძალიან თბილად მეპყრობოდა. ამას გადაჭარბების გარეშე ვამბობ...

- ტრავმამ "ზემუნში" ბოლომდე გახსნის საშუალება არ მოგცათ?
- ისე მოხდა, რომ მხოლოდ ბოლო მატჩის 45 წუთი ვითამაშე. მანამდე, მინდორზე გასვლის საშუალებას ტრავმა არ მაძლევდა.

- გუნდი უმაღლეს ლიგაში აღზევდა და, ალბათ, დარჩებით "ზემუნში"...
- დიდი ალბათობით, აღარ დავრჩები.

- რატომ?
- ბოლოს გუნდში სიტუაცია აირია. ფინანსებს ვგულისხმობ. კლუბთან კონტრაქტი სეზონის ბოლომდე მქონდა და ის უკვე დასრულებულია.

- სერბ გულშემატკივრებზე ლეგენდები დადის. რას იტყვით მათზე?
- მართლაც სასწაულად გულშემატკივრობენ თავიანთ გუნდებს. მაგალითად, სერბეთის თასის ფინალი ვნახე და გაოცებული დავრჩი. განსაკუთრებული ამბები ხდება "პარტიზანი"-"ცრვენა ზვეზდას" მატჩებისას.

- უკვე იცით, სად გააგრძელებთ კარიერას?
- არა, ჯერ არ ვიცი. მუშაობენ ამ საკითხზე ჩემი მენეჯერები. ვნახოთ, რა და როგორ იქნება.

- სერბეთში საქართველოს ჩემპიონატს თუ ადევნებდით თვალს?
- კი, ვადევნებდი სისტემატურად. უნდა გითხრათ, რომ რასაც შორიდან ვხედავდი, პროგრესი გვაქვს. საქართველოს ჩემპიონატის ასე კარგად გაშუქებით ფეხბურთის ფედერაცია ძალიან კარგ საქმეს აკეთებს. ინტერესმა იმატა და არ შეიძლება, ეს არ გვახარებდეს ყველას. ახლა საქართველოს ჩემპიონატი გაცილებით უკეთესადაა შეფუთული, ვიდრე ადრე და ეს ძალიან მნიშვნელოვანი მომენტია. რა თქმა უნდა, ფეხბურთელსაც ემატება მოტივაცია. როცა შენს თამაშს ბევრი ხალხი უყურებს, მეტი სტიმული და ხალისი გიჩნდება, ბოლომდე იხარჯები და თავს არ ზოგავ, ვიდრე მაშინ, როცა ცარიელი ტრიბუნების წინ დარბიხარ.

- საქართველოს ჩემპიონატის ამბიციურმა გუნდმა რომ შემოგთავაზოთ თანამშრომლობა, დათანხმდებით?..
- სხვათა შორის, არის რამდენიმე ვარიანტი, მაგრამ ჯერ არაფერია გადაწყვეტილი და ნუ ვიჩქარებთ.

- მიუხედავად იმისა, რომ ტრავმამ ბევრის საშუალება არ მოგცათ, ალბათ, მაინც არ თვლით დაკარგულად სერბეთში გატარებულ დროს...
- არა, არანაირად... პირველად ვითამაშე საქართველოს ფარგლებს გარეთ, საკუთარი თავი გამოვცადე, მეტად დამოუკიდებელი გავხდი. ფეხბურთელს აუცილებლად სჭირდება ასეთი გამოცდილება.

- თქვენი ჯანმრთელობის ამბავი როგორ არის?
- მუხლზე მქონდა პრობლემა, ახლა ყველაფერი კარგადაა. სანამ დამიკავშირდებოდით, ვივარჯიშე კიდეც. თავს კარგად ვგრძნობ და ბოლომდე მზად ვარ ახალი გამოწვევებისთვის.

(იბეჭდება მცირე ცვლილებით)
ყოველდღიური სპორტული გაზეთი "ლელო"