განვლილ უქმეებზე აზერბაიჯანული პრემიერლიგა დაიწყო და პირველი ტური რამდენიმე ქართველისთვის წარმატებული გამოდგა. ბაქოს "ინტერმა", რომელსაც კახა ცხადაძე და გიორგი ჩიხრაძე წვრთნიან, შინ თოვუზის "თურანს" 1:0 სძლია. გიორგი ლომაიამ, ვალერი აბრამიძემ და ილია კანდელაკმა შეუცვლელად ითამაშეს, ძირითადში იყო მთავარი მწვრთნელის ვაჟი ბაჩანა ცხადაძეც, რომელიც 68-ე წუთზე შეცვალეს. ქართველები "თურანშიც" არიან - ალექსანდრე გოგობერიშვილმა და გიორგი ბერიაშვილმა მოედანზე 90-90 წუთი გაატარეს, გიორგი ჭედია კი თამაშში მე-60 წუთიდან ჩაერთო.
ბაქოს აზალ-მა, რომლის ღირსებასაც ნუგზარ კვირტია იცავს, სტუმრად ზაქათალის "სიმურგი" 3:0 გაანადგურა. კვირტიამ შეუცვლელად
გადავინაცვლოთ სომხეთში, სადაც ჩემპიონატი, შეგახსენებთ, გაზაფხული-შემოდგომის სისტემით ტარდება. "ულისისა" და "პიუნიკის" ერევნული დერბი 1:1 დასრულდა. "ულისის" შემადგენლობაში თენგიზ უგრეხელიძემ, გიორგი კრასოვსკიმ, შოთა ჯიქიამ და ლევან აკობიამ ითამაშეს. ლევან ბუბუტეიშვილის "განძასარი" კი კვლავ ლიდერობს. ქართველმა მეკარემ სრულად ითამაშა, მისმა გუნდმა კი შინ "შირაქი" 4:0 გაანადგურა.
ლატვიური "ოლიმპსის" მთავარი მწვრთნელის პოსტზე მეტისმეტად წარუმატებელი დებიუტი ჰქონდა თამაზ პერტიას, რომლის გუნდიც რიგის "სკონტოსთან" 0:7 განადგურდა. "ოლიმპსი" ჯერჯერობით უიმედო აუტსაიდერია და იმედია, ქართველი სპეციალისტი თავის ხელს დაატყობს.
მოლდოვაში უქართველებოდ დარჩენილი "დაჩია" შინაურ კედლებში "ტირასპოლთან" 1:1-ს დასჯერდა, ტირასპოლის "შერიფმა" კი შინ "ზიმბრუს" 3:1 მოუგო. "შერიფის" უბერებელმა კაპიტანმა ვაჟა თარხნიშვილმა შეუცვლელად ითამაშა.
"ანჟიდან" "ფახთაქორში" გადასული ირაკლი კლიმიაშვილი ძირითად შემადგენლობაში მკვიდრდება. ტაშკენტური კლუბი, რომელიც ჩემპიონატში მეორე ადგილზეა, სამარყანდის "დინამოს" 0:0-ზე დაუზავდა. კლიმიაშვილმა და კახა მახარაძემ შეუცვლელად ითამაშეს.
ყოველდღიური სპორტული გაზეთი "ლელო"
