8 თებერვალს გერმანიის თასის მეოთხედფინალში ბერლინის ”ჰერტამ" მიონხენგლადბახის ”ბორუსიას" უმასპინძლა და დამატებით დროში მიღებული გოლებით 0:2 დამარცხდა. ამით პირველ ბუნდესლიგაში დასარჩენად მებრძოლმა ბერლინელებმა ევროთასებზე გასვლის ბოლო შანსი დაკარგეს.
”ბორუსიას" კაპიტანმა ფილიპ დაემსმა თავისი გუნდი 101-ე წუთზე გატანილი თერთმეტმეტრიანით დააწინაურა, ბოლო წამებზე კი შეტევით გართულ დედაქალაქელებს ოსკარ ვენდტმა გაუტანა.
დამატებით დროში ლევან კობიაშვილი მოედანზე უკვე აღარ იყო - ვეტერანი ქართველი დაშავდა და მე-80 წუთზე შესაცვლელი შეიქნა. ჯერჯერობით, მისი ტრავმის სირთულე დადგენილი არ არის.
დავით კვირკველიამ კი ”ანორთოსისის" შემადგენლობაში პირველი გოლი გაიტანა.
ფამაგუსტელებს გასვლითი მატჩი 3:2 ჰქონდათ მოგებული და მეოთხედფინალში დაუბრკოლებლად გააღწიეს. კვირკველიამ, რომელმაც შეუცვლელად ითამაშა, თავი შეხვედრის 41-ე წუთზე გამოიჩინა. ეს ამ თამაშში ბოლო გოლი იყო.
ყოველდღიური სპორტული გაზეთი "ლელო"
