საქართველოს ნაკრებისა და უკრაინული "დნიპროს" ფეხბურთელი ჯაბა კანკავა უკრაინულ გამოცემასთან ინტერვიუში ეროვნულ გუნდსა და "ნაპოლისთან" ევროპის ლიგის მოახლოებულ მატჩზე საუბრობს.- ცნობილია, რომ "ნაპოლი" დნეპროპეტროვსკში ძირითადი შემადგენლობის სამი ფეხბურთელის - უგო კამპანიაროს, კრისტიანო მაჯოსა და მარეკ ჰამშიკის გარეშე ჩამოდის. ეს ფაქტი გახარებთ?
- ჩემთვის ამას არანაირი მნიშვნელობა არ აქვს. მეტოქის შემადგენლობაზე არ უნდა ვიფიქროთ. მნიშვნელოვანია, კონცენტრირება თამაშზე გავაკეთოთ. ამ შეხვედრას სერიოზულად უნდა მივუდგეთ. ქულების დაკარგვა არ შეიძლება.
- პირადად თქვენ გითამაშიათ იტალიურ გუნდებთან?
- მხოლოდ ნაკრების დონეზე. "სკუადრა აძურას" წინააღმდეგ
- გაიხსენეთ ის მატჩი...
- მაშინ წავაგეთ, თან იმ შეხვედრაში წითელი ბარათი მივიღე. ამიტომ მაინცდამაინც კარგად არ მახსენდება ის მატჩი.
- რა შეგიძლიათ თქვათ "ნაპოლიზე", გარდა იმისა, რომ ნეაპოლურ გუნდში დიეგო მარადონა თამაშობდა?
- გუნდი სერია A-ში მეორე ადგილზეა და ეს ყველაფერზე მეტყველებს, მაგრამ ეს ფაქტი გამარჯვების მიღწევაში ხელს არანაირად არ შეგვიშლის.
- "ნაპოლისთვის" სამი ქულის ასართმევად "დნიპრო" შემტევ სტილს აირჩევს?
- ამას პირადად ხუანდე რამოსისგან შევიტყობთ.
- იტალიური ჩემპიონატი მოგწონთ?
- რა თქმა უნდა! ეს ხომ ერთი-ერთი უძლიერესი ჩემპიონატია მსოფლიოში.
- ალბათ, თვალს ადევნებდით სერია A-ს, როცა "მილანში" კახა კალაძე თამაშობდა...
- კახა კალაძის თამაშს ყოველთვის ვუყურებდი, მაგრამ ახლაც დიდი სიამოვნებით ვადევნებ თვალს იტალიელების ასპარეზობას.
- როგორი ურთიერთობა გაქვთ კახა კალაძესთან?
- ჩვეულებრივი. როგორც ვიცი, ახლა კახა ახალ მთავრობაში მუშაობს.
- როგორ გგონიათ, ყოფილ ფეხბურთელს შეუძლია მსგავს საქმიანობას გაუმკლავდეს?
- დრო გვიჩვენებს.
- რას მიაწერდით თქვენი ნაკრების არცთუ ისე კარგ გამოსვლას მსოფლიოს 2014 წლის ჩემპიონატის შესარჩევ ეტაპზე?
- ესპანელებთან და ბელორუსებთან მინსკში არ წაგვივიდა თამაში, ძალიან ბევრი შეცდომა დავუშვით.
ბელორუსებთან საპასუხო მატჩი ავიღოთ: 15 წუთში ორი გოლი გავუშვით. 0:2-ზე უკვე ძნელია სიტუაციის გამოსწორება. იქამდე კი ყველაფერი ნორმალურად იყო.
იმედია, სწორ დასკვნებს გამოვიტანთ ამ შეხვედრიდან.
- რა პერსპექტივა აქვს საქართველოს ნაკრებს?
- მომავალ მატჩებში დადებითი შედეგების მიღწევას ვგეგმავთ. როგორ განვითარდება მოვლენები, ამას მომავალი გვიჩვენებს.
- "დნიპროს" რომელი ფეხბურთელი შეძლებდა საქართველოს ნაკრების გაძლიერებას, ასეთი რამ შესაძლებელი რომ იყოს?
- (იცინის) საინტერესო კითხვაა... მხოლოდ ერთი ფეხბურთელის დამატება შეიძლება?
- რაოდენობა შეზღუდული არაა.
- მაშინ ორი იყოს - როტანი და მათეუსი. ამ ბიჭებს ნებისმიერი გუნდის გაძლიერება შეუძლიათ. ამაში დარწმუნებული ვარ.
- ვიცი, რომ ოქრიაშვილი და თარგამაძე კლუბში (ილიჩევეცი) თანაგუნდელებს ქართულ ენას ასწავლიან. თქვენ "დნიპროში" არავის ასწავლეთ ქართული ენა?
- გუნდში ქართულად საუბარი ჯერ არ მიცდია (იღიმის), მაგრამ სიტყვა გამარჯობა და კიდევ რამდენიმე ფრაზა გუნდში ყველამ იცის.
- რა გაკლიათ უკრაინაში?
- ახლობლები, მეგობრები... სამშობლო ძალიან მენატრება. ვფიქრობ, ყველა ლეგიონერს ესმის ჩემი.
- დნეპროპეტროვსკში ქართული რესტორანი არის?
- დიახ და კერძებს ქართველები ამზადებენ.
- ცნობილმა საფეხბურთო პორტალმა "ტრანსფერმარკეტმა" თქვენი სატრანსფერო ღირებულება მილიონ ევროდ შეაფასა. რას იტყვით ამაზე?
- არაფერს, რადგან ჩემთვის ეს სულერთია. საერთოდ არ მესმის, ვინ აფასებს მანდ ფეხბურთელებს ან რა მონაცემებით ხელმძღვანელობენ. ეს არ მაინტერესებს.
* * *
შეგახსენებთ, რომ "დნიპროსა" და "ნაპოლის" ევროპის ლიგის ჯგუფური ეტაპის მესამე ტურის მატჩი 25 ოქტომბერს, თბილისის დროით 23:05 საათზე დაიწყება.
ამჟამად "დნიპრო" ჯგუფში ლიდერობს. ქართველი ფეხბურთელის გუნდს ორივე მატჩი მოგებული აქვს.
მომზადებულია Спорт-Экспресс в Украине-ს მიხედვით
ასევე იხილეთ:
ევროპალიგა. ჯგუფური ეტაპი. III ტურის წინ
