გასულ უქმეებზე ჩემპიონატების მატჩები ევროპის მხოლოდ რამდენიმე ქვეყანაში გაიმართა და შესაბამისად, ქართველი ლეგიონერების მხოლოდ მცირე ნაწილმა ითამაშა.ჰოლანდიის ჩემპიონატში ნელ-ნელა პოზიციებს თმობს "ვიტესი", რომელსაც ერედივიზიეში გალიდერება შეეძლო, მაგრამ ბოლო სამ ტურში ოდენ ერთ ქულას მოუყარა თავი. შედეგად, არნემელები ლიდერ პსვ-ს უკვე ხუთი ქულით ჩამორჩებიან.
22 დეკემბერს "ვიტესმა" სტუმრად "ჰერენვენთან" 1:2 წააგო. აღსანიშნავია, რომ შეხვედრის 39-ე წუთზე არნემელთა ქართველმა კაპიტანმა გურამ კაშიამ თავური დარტყმით ანგარიში გაათანაბრა, მაგრამ მეორე ტაიმის დასაწყისში გატანილი გოლით სამი ქულა მასპინძლებმა ირგუნეს.
Video
გურამ კაშიას გოლი ჰერენვენთან
გურამ კაშიას გოლი ჰერენვენთან
ქართველებისთვის წარუმატებელი გამოდგა თურქული სუპერლიგის განვლილი ტურიც. შოთა არველაძის "ქაშიმფაშა" შინ "ისთანბულთან" 0:1 დამარცხდა, რაც მისი ზედიზედ მეორე მარცხი და ჩემპიონატში ზედიზედ მეხუთე ვერმოგებული მატჩია.
ზურაბ ხიზანიშვილის "ქაისერისფორმა" კი სტამბულში "ბეშიქთაშთან" 1:3 წააგო. ხიზანიშვილმა სრულად ითამაშა.
აზერბაიჯანის პრემიერლიგაში ყურადღების ცენტრში მოექცა ბაქოს "ინტერის" თავდამსხმელი ბაჩანა ცხადაძე, რომლის გოლითაც მისმა გუნდმა ზამთრის ჩემპიონის წოდება მოიპოვა.
"ინტერმა", რომელსაც ბაჩანას მამა, კახა ცხადაძე წვრთნის, საკუთარ მოედანზე დედაქალაქურ დერბიში "ბაქის" 1:0 სძლია, ცხადაძე-უმცროსმა კი გამარჯვების გოლი მატჩის 58-ე წუთზე, პენალტით გაიტანა.
"ინტერის" შემადგენლობაში, ცხადაძის გარდა, გიორგი ლომაიამ და ილია კანდელაკმა ითამაშეს. ქართველთა გუნდმა სეზონის პირველი ნახევარი 33 ქულით დაასრულა.
ასევე 33 ქულა აქვს გიორგი ჩიხრაძის მიერ გაწვრთნილ "სიმურგს", მაგრამ "ინტერს" უპირატესობა აქვს ბურთების შეფარდებაში და ამას გარდა, კონკურენტზე ერთი შეხვედრით ნაკლებიც ჩაატარა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
აზერბაიჯანის თასზე ქართველების გაწვრთნილი გუნდები მეოთხედფინალში გავიდნენ
ბაჩანა ცხადაძე: ჩვენი ამოცანა აზერბაიჯანის ჩემპიონობა და თასის მოპოვებაა
გიორგი ჭანტურია: რუსეთში, ვლადიკავკაზის "ალანიაში" მივდივარ!
