ირაკლი კლიმიაშვილი ლატვიაში თამაშობს. 25 წლის ნახევარმცველმა თავის კარიერაში მეხუთე კლუბის მაისურა ივნისში მოირგო - "ვიტ ჯორჯიას", ტაშკენტის "ფახთაქორის", გორის "დილასა" და ბოლნისის "სიონის" მერე რიგის "სკონტოში" ჩაირიცხა. მართალია, 2011 წელს მახაჭყალის "ანჟიში" გამოჩნდა, მაგრამ ამ გუნდის ფორმით მხოლოდ საკონტროლო შეხვედრები ჩაატარა.
კლიმიაშვილი, რომელსაც ეროვნულ ნაკრებში 5 შეხვედრა აქვს ჩატარებული, რიგაში ივნისში გაემგზავრა და ამ ბალტიისპირული ქვეყნის ყველაზე ტიტულოვან კლუბთან ერთწლიანი კონტრაქტი გააფორმა:
"ლატვიაში იმიტომ წამოვედი, რომ ეს ნაღდი ვარიანტი იყო და უკეთესის ძებნა აღარ მიცდია.
გადამწყვეტი ფაქტორი ის იყო,
ისიც მახარებდა, გუნდს ქართველი მწვრთნელი თამაზ პერტია რომ წვრთნიდა".
კლიმიაშვილმა "სკონტოს" ფორმით უკვე 9 მატჩი ჩაატარა და თავი ერთი გოლით გამოიჩინა. ის ტრანსფერით კმაყოფილია:
"შესაძლოა, ლატვიის ჩემპიონატი ამჟამად მაღალი დონის არ არის, მაგრამ ძალიან კარგ კლუბში მოვხვდი. ჯერ ერთი, მშვენიერი სავარჯიშო პირობები გვაქვს და თუ გაზრდა და წინსვლა გსურს, ამას აუცილებლად მოახერხებ.
მეორე ფაქტორი ისაა, რომ აქაური ჩემპიონატის შეხვედრებს ბევრი სელექციონერი ესწრება და თავს თუ გამოიჩენ, პოლონეთის ან რუსეთ-უკრაინის ლიგაში გზა ხსნილი გაქვს.
20 ტურის შემდეგ "სკონტომ" ლატვიის ჩემპიონატში 50 ქულა დააგროვა, პირველ ადგილზე ვართ და კონკურენტ "ვენტსპილსს" მთელი 8 ქულით ვუსწრებთ. არანაკლებ მნიშვნელოვანია, რომ 58 გოლი გავიტანეთ და სულ 5 გავუშვით.
რამდენი თამაში მოგვიგია 8:1, 7:1, 5:0 და ასეთი ანგარიშებით. თამაშის შემდეგ, უმრავლეს შემთხვევაში, ბურთის ფლობის 80-პროცენტიანი მაჩვენებელი გვაქვს. "სკონტო" ლატვიაში იმდენად გამორჩეულ ფეხბურთს თამაშობს, მეეჭვება, "ვენტსპილსი" ჩემპიონობაში შეგვეცილოს".
კლიმიაშვილი თამაზ პერტიაზეც ლაპარაკობს: "საერთოდ, მწვრთნელზე ლაპარაკი უხერხულია და არასოდეს არც ერთი მათგანი არ დამიხასიათებია, მაგრამ ქართულ ფეხბურთზე გული შემტკივა და ვალდებული ვარ, ეს ვთქვა - თამაზ პერტიას საქართველოში კარგად არ იცნობენ და აქ ჩამოსვლამდე მეც მხოლოდ მისი გვარი მქონდა გაგებული, თორემ ურთიერთობა არასოდეს მქონია.
როგორც ყველა გულშემატკივარმა, მეც მარტო ისე ვიცოდი, რომ ლატვიაში მუშაობდა ქართველი სპეციალისტი, რომელიც ჯერ ამ ქვეყნის საუკეთესო ახალგაზრდა მწვრთნელად დაასახელეს, შემდეგ კი საერთოდ - საუკეთესოდ.
მასთან ხანმოკლე მუშაობის შემდეგ დავრწმუნდი, რომ ძალიან კარგი სპეციალისტია, რამდენიმე სერიოზული სასწავლო კურსი გაიარა, ხანგრძლივი პერიოდით კოვერჩიანოშიც იმყოფებოდა და თუ დამიჯერებთ, საქართველო ძალიან ბევრს აგებს, ასეთ წარმატებულ მწვრთნელს რომ ვერ იყენებს.
თავის დროზე "სკონტო" ყველასგან გამორჩეული ლატვიური კლუბი იყო ქვეყნის დამოუკიდებლობის ისტორიაში, მაგრამ სანამ პერტია გუნდს ჩაიბარებდა, სამი წლის განმავლობაში "სკონტოს" ჩავარდნა ჰქონდა. ახლა კი, როგორც გითხარით, ლატვიაში კვლავ წარმატებული გუნდია და ყველასგან განსხვავებულ, ლამაზ და შემტევ ფეხბურთს თამაშობს.
90 წუთის განმავლობაში პრესინგს მივმართავთ, რადგან გუნდი ფიზიკურად ძალიან კარგად არის მომზადებული".
კლიმიაშვილი სკონტოელ ქართველებზეც გვიყვება:
"ქართველების მიმართ კლუბში გამორჩეული დამოკიდებულებაა და ეს უკვე ტრადიციად იქცა. ახლაც "სკონტოში" ხუთნი ვართ - მწვრთნელი და ოთხი ფეხბურთელი.
ლაშა დვალმა ძალიან კარგად დაიწყო თამაში, მაგრამ ტრავმამ გააჩერა და მკურნალობს. ლადო დათუნაშვილი საკმაოდ გამოცდილი მცველია, ლევან ჭაჭიაშვილი შემტევი ნახევარმცველია და მასაც დიდ იმედებს უკავშირებენ".
(იბეჭდება მცირე ცვლილებით)
ყოველდღიური სპორტული გაზეთი "ლელო"
