ავთანდილ ებრალიძე: მჯერა, საქართველოს ნაკრებში თამაშის შანსი მომეცემა

3 ოქტომბერს "ჟილ ვისენტეს" ქართველ ახალწვეულ ავთანდილ ებრალიძეს 22 წელი შეუსრულდა.

იუბილეზე გამოცემა "მაის ფუტებოლმა" (რაც ქართულად "ფეხბურთზე მეტს" ნიშნავს) ჩვენებურს, რომელმაც ბოლო ტურში ძალიან კარგი საგოლე პასით გამოიჩინა თავი, სპეაციალური სტატია უძღვნა.

სტატიის ავტორი ბრუნო ჟოზე ფერეირა მოგვითხრობს, "ქართველ ბიჭზე, რომელიც მშობლებთან ერთად წავიდა ემიგრაციაში პორტუგალიაში და ახლა უმაღლეს დივიზიონში თამაშობს".

"ორი კვირის წინათ მას დებიუტი "პორტუს" სტადიონ "დრაგაუზე" ჰქონდა.

ავთო, ანუ ავთანდილ ებრალიძე საქართველოდანაა. ის ზუსტად ამ დღეს, 22 წლის წინ დაიბადა, 16 წლისა კი მშობლებთან ერთად პორტუგალიაში აღმოჩნდა.

"მამა ჩამოვიდა აქ და ლაგოსში დაიწყო მუშაობა. შემდეგ მეც ჩამოვედი დედასთან ერთად. თამაში ლაგოსის ახალგაზრდულ გუნდში დავიწყე", - ამბობს ავთო.

"პორტუგალიაში თავს სულ უფრო კარგად ვგრძნობ", - ავთომ ნელ-ნელა აიწყო კარიერა.

"ესპერანშა ლაგოსის" შემდეგ ის "ჟუვენტუდ ევორაში" გადავიდა. ამის შემდგომი ნაბიჯი კარიერაში იყო მეორე დივიზიონის "ოლივეირენშე". წლეულს კი უკვე "ჟილ ვისენტეშია".

"ყოველთვის მინდოდა უმაღლეს ლიგაში თამაში, ამაზე ვოცნებობდი და ოცნება დრაგაოზე" ამიხდა. განუმეორებელი დღე იყო და შეგრძნება. ატმოსფერო მართლაც ფანტასტიკური იყო", - ყვება "პორტუსთან" თამაშის პერიპეტიებზე ქართველი.

ნაკრებზე ოცნება
ავთო სასიამოვნოდ მოსაუბრე, თუმცა სიტყვაძუნწია. მან კარგად იცის, რა უნდა ფეხბურთისგან:

"რაც შეიძლება მეტი მინდა ვითამაშო. მინდა გუნდს დავეხმარო გოლებით, საგოლე პასებით, რომ "ჟილ ვისენტე" ელიტაში თამაშობდეს.

არ მაქვს იმის ილუზია, რომ მუდმივად სასტარტოში ვიქნები, თუმცა შევეცდები, ყოველი შანსი გამოვიყენო და ჩემი შესაძლებლობები ვაჩვენო ყველას".

"დრაგაოზე" დებიუტის შემდეგ ავთო სამი თამაშია, სასტარტოშია. მას უკვე საქართველოს ეროვნულ ნაკრებში თამაშზე ოცნება დაუწყია:

"მოუთმენლად დაველოდები იმ დღეს, როცა შეიძლება მეც მომეცეს ნაკრებში თამაშის შანსი. მე მჯერა ამის".

კვირას "ჟილ ვისენტე" "ფერეირას" მასპინძლობს. ამ შეხვედრას ლაგოსიდან ავთოს მშობლები დაესწრებიან, მათი მგზავრობა კი "ჟილ ვისენტეს" პრეზიდენტმა ანტონიო ფიუზამ დააფინანსა".



ასევე იხილეთ:
ნაკრები და ფეხბურთელთა რესურსი - არის თუ არა ჰოლანდია-პორტუგალიაში დონე?
ავთო ებრალიძემ პორტუგალიაში ლამის მთელი გუნდი მოატყუა და საგოლე პასი გააკეთა [VIDEO]