[ექსკლუზივი] "კლუჟის" ფეხბურთელი ვარ და არ მაინტერესებს, ვინ რას ამბობდა"

19 თებერვალს გიორგი ჭანტურიას სატრანსფერო საგა დასრულდა. 20 წლის შემტევი ჰოლანდიური "ვიტესიდან" რუმინულ "კლუჟში" გადავიდა.

კონტრაქტის თანახმად, ჭანტურიამ რუმინულ კლუბში ოთხი წელი უნდა დაჰყოს, თუმცა, შესაძლოა, ისეც მოხდეს, რომ ქართველი ფეხბურთელი მომავალ ზაფხულსვე აღმოჩნდეს იტალიაში და კარიერა სერია A-ს რომელიმე კლუბში გააგრძელოს.

ეს ამბავი თავად ჭანტურიამ გვითხრა, რომელმაც, უკვე როგორც "კლუჟის" ფეხბურთელმა, კონტრაქტის გაფორმებისთანავე პირველი ინტერვიუ "ლელოს" მისცა:

- მიხარია, რომ ჩემი სატრანსფერო ციებ-ცხელება წარმატებით დასრულდა და უკვე შემიძლია გითხრათ, რომ "კლუჟის" ფეხბურთელი ვარ, - გვითხრა ჭანტურიამ, - კონტრაქტი ცოტა ხნის წინ გავაფორმე.

- "კლუჟში" სეზონის ბოლომდე დარჩებით და მერე იტალიაში წახვალთ?
- ახლა ასე ვერ ვიტყვი. "კლუჟთან" 4-წლიანი კონტრაქტი გავაფორმე, თუმცა შევთანხმდით, რომ ხელშეკრულების პირობები ყოველ სატრანსფერო სეზონში გადაიხედება.

- "გადახედვა" ნიშნავს, რომ თქვენ მიმართ სხვა კლუბის ინტერესის შემთხვევაში, "კლუჟი" ტრანსფერში ხელს არ შეგიშლით?
- დიახ, სწორედ ამას ნიშნავს. პირობების გადახედვა კი პირველად უკვე მომავალ ზაფხულს მოხდება.

- მოსალოდნელი იყო, რომ წინასწარ კონტრაქტს იტალიურ კლუბთან გააფორმებდით და მათივე სურვილით, სატრანსფერო სეზონის გახსნამდე "კლუჟში" ითამაშებდით. ითქვა ისიც, რომ რუმინეთში ოთხ თვეს დარჩებოდით. ახლა კი აღმოჩნდა, რომ 4-წლიანი კონტრაქტი გააფორმეთ. რა მოხდა? რატომ შეიცვალა სიტუაცია?
- გეცოდინებათ, იტალიური ვარიანტი იმის გამო ჩაიშალა, რომ იქ სატრანსფერო პერიოდი დასრულებულია. თანაც, იტალიაში არაევროკავშირელზე ლიმიტია და ეს ლიმიტი ჩემს მსურველ კლუბებს უკვე ამოწურული აქვთ. სწორედ ეს იყო სიტუაციის შეცვლის მიზეზი.

- რომელ იტალიურ კლუბებზეა ლაპარაკი?
- აგენტისგან ვიცი, რომ სერია A-ს რამდენიმე კლუბისგან არის ინტერესი.

- რამდენი მიიღო "ვიტესმა" ტრანსფერის სანაცვლოდ?
- მილიონი ევრო.

- ...და ეს ფული ჰოლანდიელებს "კლუჟმა" გადაუხადა?
- კონტრაქტი "კლუჟთან" გავაფორმე და, აბა, სხვა რომელი კლუბი გადაიხდიდა?!

- კი მაგრამ, ხომ იყო ლაპარაკი, თითქოს სატრანსფერო ფულს თქვენით დაინტერესებული ერთ-ერთი იტალიური კლუბი გადაიხდიდა, რომელიც წინასწარი კონტრაქტის ხელმოწერის შემდეგ 4-თვიანი იჯარით "კლუჟში" გაგიშვებდათ?
- ახლა ფაქტი ის არის, რომ "კლუჟის" ფეხბურთელი ვარ და არ ვიცი და არც მაინტერესებს, ვინ რას ლაპარაკობდა. ახლა ჩემი ფიქრები მხოლოდ ახალი კლუბისკენ არის მიმართული და მისი წარმატებისთვის ძალ-ღონეს არ დავიშურებ.

- უკვე რუმინეთში ხართ?
- არა, კონტრაქტი ჰოლანდიაში გავაფორმეთ. რუმინეთში კვირას ჩავალ და უკვე ორშაბათს ახალ გუნდთან ერთად პირველად ვივარჯიშებ.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
Sky Sports: ივნისში გიორგი ჭანტურია "ვერონაში" ხუან იტურბეს შეცვლის