ქართველმა ლეგიონერმა ლაშა კასრაძემ "აზერისპორტთან" ინტერვიუში ისაუბრა ბაქოს აზალ-იდან "ინტერში" გადასვლის მიზეზებზე.- თქვენი გადასვლა "ინტერში", გარკვეულწილად, მოულოდნელი იყო...
- ასე არ ვიტყოდი. დამიძახეს, მოვედი და 1-წლიან კონტრაქტს მოვაწერე ხელი. "ინტერს" ახალი შემადგენლობა ეყოლება, მალე ევროპალიგაზე ვითამაშებთ. მთელი მონდომებით ვემზადებით და იმედი გვაქვს, რომ წარმატებით ვიასპარეზებთ ევროთასებზე.
- "ინტერში" ფინანსური პრობლემებია, მაგრამ თქვენ მაინც გადმოხვედით...
- დიახ, ვიცოდი, რომ კლუბს გარკვეული ფინანსური პრობლემები აქვს, მაგრამ საშიში არაფერია. ჩემი კონტრაქტი მისაღები პირობებითაა.
- ალბათ, აზალ-ში რაღაც არ მოგწონდათ. რა გითხრათ მწვრთნელმა
- ტარლან აჰმედოვი ძალიან კარგი ადამიანი და მწვრთნელია, მე მას ველაპარაკე და შევთანხმდით. კლუბმა გამიშვა და მას წარმატებებს ვუსურვებ.
- ამბობენ, აზალ-საც ფინანსური პრობლემები აქვსო...
- დიახ, იყო მცირე პრობლემები, მაგრამ აზალ-დან ამის გამო არ წავსულვარ, უბრალოდ, "ინტერში" ქართველი სპეციალისტია და ჩემთვის ეს უკეთესია.
- "ინტერში" ქართველი ფეხბურთელებიც არიან და ალბათ, არც ადაპტაცია გაგიჭირდებათ ახალ კლუბში...
- დიახ, ეს ერთ-ერთი ყველაზე დიდი უპირატესობაა ჩემთვის.
- დაცვაში თქვენ, ალბათ, ზურაბ ხიზანიშვილთან ერთად მოგიწევთ თამაში...
- ზურაბი ძალიან გამოცდილი მცველია. მისგან ბევრი რამის სწავლა შეიძლება.
- ევროპალიგაზე რას უმიზნებთ?
- პირველი ეტაპის დაძლევა გვსურს. ვნახოთ, რა იქნება, ჩვენი კოლექტივი ახალია.
- იცით, ალბათ, რომ "გაბალას" თბილისის "დინამოსთან" მოუწევს თამაში. ვის უფრო მეტი შანსი აქვს?
- საინტერესო წყვილია. "დინამო" კარგი გუნდია, მაგრამ კონკრეტულად ვერ გეტყვით, რა მოხდება.
![ზურა ხიზანიშვილის გადაცემა "სპორტალში" [VIDEO]](/pictures/image7/48c90b6d47e18b0be3220d84b25ec6ea.png "ზურა ხიზანიშვილის გადაცემა \"სპორტალში\" [VIDEO]")
![ვიდალი თუ ხიზანა? - "ბარსელონას" ფეხბურთელმა "ხიზანას სასწაული თამაში" გაიმეორა [VIDEO]](/pictures/image7/b09db80a65c6e3dc49ec2492565af289.jpg "ვიდალი თუ ხიზანა? - \"ბარსელონას\" ფეხბურთელმა \"ხიზანას სასწაული თამაში\" გაიმეორა [VIDEO]")
